وبلىس اكىمىنىڭ ورىنباسارى اسەم ءنۇسىپوۆا بۇل جوبانىڭ اسىرەسە ءالى قانداي ماماندىق تاڭدارلارىن بىلمەي جۇرگەن جاستار ءۇشىن پايداسى زور ەكەندىگىن ايتادى. «ايماق باسشىسى دانيال احمەتوۆتىڭ قولداۋىمەن 2017 وقۋ جىلىندا 100 تەحنيكالىق ماماندى دايارلاپ شىعارۋ ءۇشىن بيۋدجەتتەن 200 ميلليون تەڭگەدەن استام قاراجات ءبولىنىپ وتىر. نەگىزىنەن تاۋ-كەن, كەن بايىتۋ سالالارىنا قاجەتتى ماماندار ازىرلەنەدى», - دەيدى ول.
«قازتسينك» جشس-ءنىڭ اكىمشىلىك ماسەلەلەر جونىندەگى اتقارۋشى ديرەكتورى اندرەي لازارەۆ كاسىپورىنعا ەڭ الدىمەن كەن-بايىتۋ جانە مەتاللۋرگيا سالاسىنىڭ ماماندارى قاجەتتىگىن جەتكىزدى. «ريددەر قالاسىنىڭ ءاربىر بەسىنشى تۇرعىنىنىڭ تاعدىرى ءبىزدىڭ وندىرىسپەن بايلانىستى. سول سەبەپتى كەلەشەكتە شاھاردى دامىتۋعا قاتىستى دا ويلارىمىز بار. ەڭ باستىسى – بۇل جەردە قازاقستاننىڭ ەش جەرىندە جوق ەرەكشە وقۋ ورتالىعى بار. وندا ارنايى جابدىقتالعان كابينادا وتىرعان وقۋشى ءوز بەتىمەن جۇرەتىن ماشينانى باسقارىپ, داعدىلانادى. قۇرال-جابدىق شاحتاداعى ءىس-قيمىلداردى تولىق قايتالايدى. بارلىق ءىس-ارەكەتتەر ەكراننان 3D كەسكىنىندە كورىنگەندىكتەن, ستۋدەنت ءوزىن شاحتادا جۇرگەندەي سەزىنەدى. سونىڭ ناتيجەسىندە ولارعا كەيىن وندىرىستە جۇمىس ىستەۋگە جەڭىل بولادى», - دەيدى ا.لازارەۆ.
كاسىپورىن وكىلىنىڭ سوزىنە قاراعاندا, وقۋ ورتالىعىنىڭ باستى جەتىستىگى – جاس مامانداردى وندىرىستە پايدالانىلاتىن بارلىق جاڭا قۇرال-جابدىقتارمەن جۇمىس ىستەۋگە ۇيرەتىپ شىعارادى. قازىرگى تاڭدا ءوندىرىس قۇرال-جابدىقتارىنىڭ 90 پايىزى جاڭارتىلعان.
وبلىستىق ءبىلىم باسقارماسىنىڭ باسشىسى نۇرگەلدى ءابجاپاروۆتىڭ ايتۋىنشا, 2017-2018 وقۋ جىلدارىندا وبلىستا كوللەدجدەردە ءبىلىم الۋعا التى مىڭنان استام مەملەكەتتىك گرانت ءبولىنىپتى. «كازتسينك» كاسىپورنى ءبىزدىڭ بۇرىننان كەلە جاتقان سەرىكتەسىمىز. بارلىق گرانتتاردىڭ ءتورت جارىم مىڭى جەرگىلىكتى بيۋدجەتتەن, 1,7 ورىن رەسپۋبليكالىق بيۋدجەتتەن قارجىلاندىرىلادى. ۇستىمىزدەگى وقۋ جىلىندا 210 بالا «سەرپىن» باعدارلاماسىمەن ماماندىق مەڭگەرىپ شىعاتىن بولادى. اتالمىش باعدارلاما بويىنشا بارلىعى 400-دەن استام جاس ءبىلىم الىپ جاتىر. ءبىتىرىپ شىققان 20 تۇلەك قازىر «كازتسينك» كاسىپورنىنىڭ ريددەردەگى ءوندىرىس ورىندارىندا جۇمىس ىستەيدى», - دەيدى باسقارما باسشىسى.
مەموراندۋم اياسىندا ءبىلىم الىپ شىققان جاستار تەك «قازتسينك» كومپانياسىندا عانا ەمەس, سونىمەن قاتار «قازمينەرالس» سياقتى كاسىپورىنداردا دا جۇمىس ىستەي الاتىن بولادى. الداعى ۋاقىتتا بۇل جوبانى وسكەمەن قالاسىندا جۇزەگە اسىرۋ جوسپارلانعان.
ازامات قاسىم,
«ەگەمەن قازاقستان»
شىعىس قازاقستان وبلىسى
سۋرەتتى تۇسىرگەن - اۆتور
