وسى ءبىر اي ىشىندە پاۆلودار اۋدانى زاريا اۋىلىنا كەلدى. سپورت كەشەنىنە جۇرگىزىلگەن جوندەۋ جۇمىستارىن كوردى. بىرلىك اۋىلىنداعى بايگە اتتارىن باپتايتىن شىنىقتىرۋ بازاسىندا بولدى. ولگينكا اۋىلىن ارالاپ وبلىس اكىمى «ەرتىس» شق-نا تيەسىلى گيدروپونيكا تسەحىن, شاقات اۋىلىندا اشىلعان «ترۋحين» بالىق شارۋاشىلىعىن ارالاپ كوردى. جەكە كاسىپكەر گەننادي ترۋحين 50 گا اۋماقتا ءوز كۇشىمەن بالىق وسىرەتىن توعاننىڭ قۇرىلىسىن باستاعان. بۇل ماقساتقا ول ءوز قاراجاتىنان 11 ميلليون تەڭگە جۇمساعان. توعاندا تۇقى مەن سازان تۇقىمداس بالىقتار وسىرىلەدى. كراسنوارمەيكا اۋىلىندا بوس تۇرعان عيماراتىن بيۋدجەتتىك سالانىڭ قىزمەتكەرلەرى ءۇشىن كوپ پاتەرلى تۇرعىن ءۇي رەتىندە قايتا قۇرۋ جانە ورتالىق قازاندىققا جوندەۋ جۇرگىزۋ جۇمىستارىنىڭ جوبالارىن تانىستىردى. تولىباي اۋىلىندا جەرگىلىكتى تۇرعىندار بولات باقاۋوۆتان ءۇيى ورتەنگەن قارت اناعا جاردەمدەسۋىن سۇرادى. بۇدان سوڭ بولات باقاۋوۆ اقتوعاي اۋدانىنا بارىپ, اۋدانداردان كەلگەن اۋىلشارۋاشىلىق, كوكونىس وسىرۋشىلەردى جيناپ «ەگىستىك كۇنى« مەرەكەسىن وتكىزىپ قايتتى. كورمەدە ەگىنشىلەرگە “روستسەلماش”, “كيروۆەتس”, “John Deere” زاۋىتتارىنىڭ اۋىل شارۋاشىلىق تەحنيكاسى كورسەتىلدى. «اقتوعاي-اگرو» جشس-ءى وزدەرى وسىرەتىن كارتوپ پەن جۇگەرىنىڭ جاڭا سۇرىپتارىن كورسەتتى. قازىرگى كەزدە كاسىپورىندا كارتوپتىڭ گوللاندتىق سۇرىپتارىمەن قاتار قازاقستاندىق ءتۇرى دە وسىرىلەدى. اينالىسادى. ودان كەيىن لەبياجى اۋدانىنا بارىپ قاربىز وسىرۋشىلەرگە بارىپ, جاڭا ءپىسىپ جاتقان قىزىل قاربىزدان اۋىز ءتيدى. اۋداندا باقشا ونىمدەرى 2,7 مىڭ گەكتار جەرگە ەگىلگەن.
ەندى مىنە, كەشە قاشىر اۋدانىنىڭ اۋىلدارىن ارالادى. لۆوۆكا دەگەن اۋىل بار. بۇل جەردە مەملەكەتتىك-جەكە مەنشىك ارىپتەستىك شەڭبەرىندە بالاباقشا قۇرىلىسى ءجۇرىپ جاتىر. كاسىپورىن باسشىسى ا. ۆيلگەلم تۋعان اۋىلىنىڭ كىشكەنتايلارىنا وسىنداي سىيلىق جاساپ وتىر. پەسچان دەگەن دە اۋىل بار. پەسچان ورتا مەكتەبى دە بار. مەكتەپ اۋلاسىندا قۇستار مەن اڭداردىڭ مۇسىندەرىن كورىپ تاڭقالىپتى. بۇلاردى جاساعان مارات الەنوۆكە قولداۋ كورسەتپەكشى. اۋىلداردى ءجيى ارالايتىن وبلىس اكىمى اۋىلداردىڭ بايىرعى اتتارىن قايتا ورالتۋدى ەسكە الا جۇرسە دەيمىز.
فاريدا بىقاي
«ەگەمەن قازاقستان»
پاۆلودار وبلىسى
