25 جاستاعى فورۆارد پاريجدىك كلۋبپەن بەس جىلدىق, ياعني 2022 جىلدىڭ 30 ماۋسىمىنا دەيىنگى كەلىسىمشارتقا قول قويدى. بۇل ترانسفەردىڭ جالپى قۇنى 222 ملن ەۋرونى قۇرايدى.
قارجىلىق فەير پلەي ەرەجەسىن ساقتاۋ ماقساتىندا «بارسەلوناعا» فرانتسيالىق ۇجىمنان ەشقانداي قارجى تۇسپەدى. ال اتالعان سومانى نەيمار ءوز قالتاسىنان شىعاردى. ول 2022 جىلى قاتاردا وتەتىن الەم چەمپيوناتىنىڭ ەلشىسى بولعانى ءۇشىن بەرىلگەن 300 ملن ەۋرونى تولەپ, «بارسەلونامەن» كەلىسىمشارتىن ءۇزدى. ەندى ونىڭ جاڭا كومانداداعى ءبىر اپتالىق جالاقىسى 550 مىڭ ەۋرونى قۇرايتىن بولادى.
«فۋتبولشىنىڭ ءومىرى جاڭا بەلەستەردى باعىندىرۋدان تۇرادى. مۇنداي جايتتاردىڭ كەيبىرى كۇتپەگەن جەردەن پايدا بولسا, كەلەسى ءبىرى ءبىزدىڭ شەشىمىمىزدەن بولادى. «بارسەلونا» مەن باعىندىرعان ۇلكەن بەلەستەردىڭ ءبىرى. مۇنداعى ويىنشىلارمەن بالا كۇنىمنەن تەك ۆيدەوويىندار ارقىلى وينايتىنمىن. 21 جاسىمدا كاتالونياعا ارمان قۋىپ كەلدىم. بارسەلوناداعى ەڭ العاشقى كۇنىمدى ەشقاشان ۇمىتپاسپىن. مەسسي, ۆالدەس, حاۆي, ينەستا, پۋيول, پيكە, بۋسكەتس سەكىلدى الەمدىك دەڭگەيدەگى فۋتبولشىلارمەن بىرگە دايىندالدىم. ەڭ العاشقى دەبيۋتىمدى دە اسىعا كۇتكەنىم ەسىمدە.
«بارسەلونادا» فۋتبول تاريحىنداعى ەڭ ۇلى فۋتبولشىمەن بىرگە ونەر كورسەتكەنىمدى ماقتان تۇتامىن. ليونەل مەسسيگە ۇقسايتىن ويىنشىنى ەندى قايتىپ كورمەيتىنىمە سەنىمدىمىن. لەو مەنىڭ فۋتبولدا دا, ودان تىسقارى جەردەگى دە دوسىم بولىپ قالادى. ونىمەن بىرگە دوپ تەپكەن كۇندەرىمدى ماقتان تۇتامىن.
مەسسي, سۋارەسپەن فۋتبول تاريحىنداعى ۇزدىك ۇشتىكتى قۇردىق. فۋتبولشىلار جەڭىپ الۋى مۇمكىن جۇلدەلەردىڭ بارىنە قول جەتكىزدىك. ەسىمنەن كەتپەس باقىتتى كۇندەرىمدى وتكىزدىم. مەن ءومىر سۇرگەن قالا قاراپايىم عانا شاھار ەمەس, بۇل مەكەندى تۋعان جەرىم دەپ ايتسام قاتەلەسپەگەن بولار ەدىم. مەن بارسەلونا مەن كاتالونيانى جاقسى كورەمىن.
بىراق كەز كەلگەن فۋتبولشىعا (ماعان دا) جاڭا بەلەستەردى باعىندىرۋى كەرەك. وسىمەن ەكىنشى مارتە اكەمنىڭ شەشىمىنە قارسى كەلىپ وتىرمىن. اكە, سەنىڭ پىكىرىڭدى تۇسىنەمىن ءارى قاتتى سىيلايمىن. بىراق مەن ءوز تاڭداۋىمدى جاساپ قويدىم, بۇل جولى دا مەنى قولداۋىڭدى سۇرايمىن.
«بارسا» مەن كاتالونيا جۇرەگىمدە ماڭگىگە قالادى. بىراق ەندى العا قاراۋىم كەرەك. سول ءۇشىن پسج-نىڭ ۇسىنىسىن قابىل الدىم. ولاردىڭ جانكۇيەرلەرى كۇتىپ جۇرگەن جۇلدەنى جەڭۋگە كومەكتەسكىم كەلەدى. ءوز كارەرامدا ۇلكەن تاۋەكەلگە بەل بۋىپ وتىرمىن. بۇل سىناققا دايىنمىن دەپ ويلايمىن.
«بارسەلونانىڭ» جانكۇيەرلەرىن, بىرگە ونەر كورسەتكەن ارىپتەستەرىمدى قاتتى سىيلايمىن. جۇرەگىمدى تىڭداسام كەتۋىم كەرەك دەيدى. ەندى پسج الداعى جىلدارى مەنىڭ ءۇيىم بولادى. ولاردىڭ ۇمىتتەرىن اقتاۋعا تىرىسامىن.
ماعان قولداۋ بىلدىرگەن جانكۇيەرلەرىمە, دوستارىما, وتباسىما ءاردايىم قاسىمدا بولعان جانداردىڭ بارىنە العىس ايتامىن. بۇل مەنىڭ 25 جاسىما دەيىنگى جاساعان وتە ماڭىزدى ءارى قيىن شەشىمىم بولدى. بارسەلونا, ساعان دەگەن العىسىم شەكسىز! پسج, مەن ساعان قاراي بارا جاتىرمىن! جاراتقان ءبىر ءوزى جار بولعاي!» دەپ جازدى نەيمار Instagram-داعى پاراقشاسىندا.
ايتا كەتەيىك, نەيمار «بارسەلوناعا» 2013 جىلدىڭ جازىندا برازيليانىڭ «سانتوسىنان» اۋىسىپ كەلگەن بولاتىن. وسى ۋاقىت ارالىعىندا ول بارلىعى 186 رەسمي ويىنعا قاتىسىپ, 106 گولدىڭ اۆتورى اتاندى.
