«100 ناقتى قادام» ۇلت جوسپارىنىڭ 81-قادامىندا «الەۋمەتتىك مەديتسينالىق ساقتاندىرۋ جاعدايىنداعى باستاپقى مەديتسينالىق الەۋمەتتىك كومەكتى قارجىلاندىرۋ – باسەكە ەسەبىنەن مەديتسينالىق ۇيىمداردىڭ كورپوراتيۆتىك باسقارۋ قاعيداتتارىنا كوشۋىن قامتاماسىز ەتەتىنى» ايتىلىپ, مەملەكەتتىك مەديتسينالىق ۇيىمداردى جەكەشەلەندىرۋدى ىنتالاندىرۋ, مەملەكەتتىك ەمەس ۇيىمدار ارقىلى تەگىن مەديتسينالىق كومەكتىڭ كەپىلدەندىرىلگەن كولەمىن بەرۋدى كەڭەيتۋ قاجەتتىگى اتاپ كورسەتىلگەن.
جەكەمەنشىك مەديتسينانى دامىتىپ, مەديتسينالىق مەكەمەلەرگە كورپوراتيۆتىك باسقارۋدى ەنگىزۋ ءۇشىن ەلىمىزدىڭ دەنساۋلىق ساقتاۋ سالاسىندا كوپتەگەن وزگەرىس قولعا الىنا باستادى.
جوعارىدا اتاپ وتكەنىمىزدەي, مەنەدجمەنت سالاسى دۇرىس جولعا قويىلماعان ۇيىمدار دا بار. كەيبىر باس دارىگەرلەر ءوزى باسقارىپ وتىرعان مەكەمەدە قالىپتاسقان كۇرمەۋلى ماسەلەلەردىڭ ءتۇيىنىن شەشەيىن دەپ تە تالپىنبايدى. سونىمەن بىرگە, ۋچاسكەلىك دارىگەرلەردىڭ الاڭسىز جۇمىس ىستەۋىنە كوڭىل ءبولىپ, جۇمىسىنىڭ ناتيجەسىنە قاراي جالاقى تولەۋ دە قاراستىرىلماعان. وسىدان كەلىپ, دارىگەرلەردىڭ تاپشىلىعى, بەلگىلى ءبىر سالاعا بەيىمدەلگەن مامانداردىڭ جەتىسپەۋشىلىگى تۋىندايدى. سوندىقتان جۇمىسىن جونگە كەلتىرە الماي وتىرعان دەنساۋلىق ساقتاۋ ۇيىمدارى جاقسى جۇمىس ىستەيتىن باسقا ارىپتەسىنىڭ قاراۋىنا, ياعني جاقسى مەنەدجمەنت قالىپتاسقان ۇيىمعا بەرىلىپ, جاقسى باسقارۋشىلاردىڭ قولىنا تاپسىرىلادى. مەملەكەت-جەكەمەنشىك ارىپتەستىگى داميدى. باسقارۋدىڭ مۇنداي ءتاسىلى باسەكەلەستىك ورتانىڭ قالىپتاسۋىنا سەبەپكەر بولىپ, حالىققا كورسەتىلەتىن قىزمەتتىڭ ساپاسىن ارتتىرماق. ال مەملەكەت ءۇشىن بۇل – زاماناۋي ينفراقۇرىلىمعا جانە عيماراتتاردى ۇستاۋ شىعىندارىن ازايتۋعا قول جەتكىزۋدىڭ جولى.
جەكەشەلەندىرۋدىڭ كەشەندى جوسپارىنىڭ شەڭبەرىندە ازىرشە 9 دەنساۋلىق ساقتاۋ نىسانى: ەكى رەسپۋبليكالىق جانە 7 جەرگىلىكتى مەديتسينالىق ۇيىم جەكەشەلەندىرىلمەك. 10 مەديتسينالىق ۇيىم, سونىڭ ىشىندە 8-ءى ساتىپ الۋ قۇقىمەن, ەكەۋى ساتىپ الۋ قۇقىنسىز سەنىمدى باسقارۋعا بەرىلەدى. بۇگىندە مەملەكەت-جەكەمەنشىك ارىپتەستىگى اياسىندا بارلىعى 11 جوبا بويىنشا كەلىسىمشارت جاسالىپتى.
جاقىندا استاناداعى «ۇلتتىق عىلىمي كارديوحيرۋرگيا ورتالىعى» اق بازاسىندا «قازاقستان رەسپۋبليكاسىنىڭ دەنساۋلىق ساقتاۋ ۇيىمدارىندا مەنەدجمەنتتى جانە كورپوراتيۆتىك باسقارۋدى دامىتۋ» تاقىرىبىندا وتكەن رەسپۋبليكالىق كونفەرەنتسيادا دەنساۋلىق ساقتاۋ ءمينيسترى ەلجان ءبىرتانوۆ مەملەكەتتىك كاسىپورىندارعا كورپوراتيۆتىك باسقارۋ تاسىلدەرىن ەنگىزۋ ارقىلى شارۋاشىلىق جۇرگىزۋ قۇقىعىنداعى مەملەكەتتىك كاسىپورىن نىسانىنا تولىق كوشىرىلەتىنىن اتاپ ءوتىپ, مەملەكەتتىك مەديتسينالىق مەكەمەلەردى قايتا قۇرۋ جۇمىستارى 2019 جىلدىڭ اياعىندا اياقتالاتىنىن جەتكىزدى. سونداي-اق, ءار وڭىردە ادام رەسۋرستارىن باسقارۋدىڭ ايماقتىق ساياساتى, مەديتسينالىق ۇيىمدار دەڭگەيىندە پەرسونال باسقارۋدىڭ ناتيجەلى باعدارلاماسى ەنگىزىلەدى.
جيىندا دەنساۋلىق ساقتاۋ ۆيتسە-ءمينيسترى ءلاززات اقتاەۆا كورپوراتيۆتىك باسقارۋ تاسىلدەرىن ەنگىزۋگە كەدەرگى كەلتىرىپ وتىرعان ماسەلەلەردى العا تارتتى. ونىڭ ايتۋىنشا, كورپوراتيۆتىك باسقارۋ تاسىلدەرىن ەنگىزۋ اياسىندا وكىلەتتى جانە جەرگىلىكتى اتقارۋ ورگاندارىنىڭ قۇزىرەتتەرىن, قامقورشىلىق كەڭەسىنىڭ وكىلەتتىگىن كەڭەيتۋ كەرەك. ول ءۇشىن الدىمەن نورماتيۆتىك قۇقىقتىق بازالاردى جەتىلدىرىپ, جەرگىلىكتى اتقارۋشى ورگانداردىڭ بەلسەندىلىگىن ارتتىرۋ قاجەت.
ەلىمىزدە جاقسى مەنەدجمەنتتى جولعا قويىپ, جۇمىسىن ءساتتى جۇرگىزىپ وتىرعان مەديتسينالىق ۇيىمداردىڭ شوعىرى دا قالىپتاسىپ ۇلگەرىپتى. كوشتىڭ باسىندا استانا قالاسى مەن الماتى جانە شىعىس قازاقستان وبلىستارى تۇر. بۇل وڭىرلەردە بىلتىردىڭ وزىندە-اق شارۋاشىلىق جۇرگىزۋ قۇقىنداعى مەديتسينالىق مەكەمەلەردىڭ قاتارى 80 پايىزعا جەتكەن. ال دەنساۋلىق ساقتاۋ ۇيىمدارىنىڭ 70 پايىزىندا قامقورشىلىق كەڭەسى قۇرىلعان.
كەرىسىنشە, 8 اۋداندا كورپوراتيۆتىك باسقارۋدى ەنگىزۋ جۇمىستارىنىڭ تومەن دەڭگەيى نەمەسە مۇلدە جوقتىعى انىقتالىپ وتىر. وڭتۇستىك قازاقستان وبلىسىندا كورپوراتيۆتىك باسقارۋ تاسىلدەرىن ەنگىزۋدىڭ تومەنگى كورسەتكىشى (15,9 پايىز) بايقالادى, مۇندا قامقورشىلىق كەڭەستەر دە اتىمەن جوق.
ۆيتسە-مينيستر پەرسونالدى باسقارۋدىڭ كورپوراتيۆتىك ساياساتى اۋەلى مەديتسينالىق ۇيىمداردىڭ 20 پايىزىنىڭ بازاسىندا ەنگىزىلەتىندىگىن جەتكىزدى. دەنساۋلىق ساقتاۋ سالاسىنىڭ كادر رەسۋرستارىن باسقارۋدىڭ ۇلتتىق ساياساتىن جۇزەگە اسىرۋ نەگىزىندە مىناداي قاعيداتتار ەنگىزىلەتىن بولادى: قاجەتتى (قولجەتىمدى) ادام رەسۋرستارىنىڭ بولۋى; جۇمىسكەرلەردىڭ ءتيىستى وكىلەتىنىڭ قالىپتاسۋى جانە ۇزدىكسىز كاسىبي دامۋ مەن ادام رەسۋرستارىنىڭ ونىمدىلىگى.
مينيسترلىكتىڭ مالىمەتى بويىنشا, كورپوراتيۆتىك باسقارۋ جۇيەسى پەرسونالدى باسقارۋ قىزمەتىنىڭ مارتەبەسىن كوتەرەدى, قىزمەتكەرلەرىنىڭ الەۋەتىن ارتتىرۋعا سەپتىگىن تيگىزەدى.
ەندىگى كەزەكتە مەديتسينالىق ۇيىمدارعا زاماناۋي HR-تەحنولوگيالاردى ەنگىزۋ قاراستىرىلىپ وتىر. بۇل دا مەديتسينا سالاسىنىڭ ساپاسىن ارتتىرىپ, جۇرتشىلىققا كورسەتىلەتىن قىزمەت تۇرلەرىن جەتىلدىرۋگە ىقپال ەتپەك. جالپى, دەنساۋلىق سالاسىنداعى وزگەرىستەر بارلىق مەديتسينا ۇيىمىنىڭ جۇمىس ونىمدىلىگىن ارتتىرادى دەپ كۇتىلۋدە.
قىمبات توقتامۇرات,
«ەگەمەن قازاقستان»
