بقو جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ميرجان ساتقانوۆتىڭ ايتۋىنشا, وسى قارجىعا 126 كم جول جوندەلمەكشى. اتاپ ايتقاندا, چاپاەۆ-جاڭاقالا-سايقىن جانە ورال-كيرسانوۆ باعىتىنداعى جولدار رەتكە كەلتىرىلۋدە. سول سەكىلدى بارباستاۋ-اقجايىق-يندەر جولىنىڭ 0-43 شاقىرىم ارالىعى دا جوندەلۋدە. كۇردەلى جوندەلەتىن ۇلكەن شاعان-پەرەمەتنىي-ۆەچنىي جولىنىڭ ماڭىزدىلىعى سول, ول رەسپۋبليكالىق ورال-اتىراۋ جانە ورال-تاسقالا-رف شەكاراسى جولدارىن جالعايدى.
بيىل سونداي-اق رەسپۋبليكالىق ماڭىزى بار جولداردى جوندەۋ مەن ۇستاۋعا 15 ملرد استام تەڭگە قارالدى. بۇل قارجىعا ورال-تاسقالا-رف شەكاراسى (4-104 كم, سونىڭ 54 شاقىرىمى), چاپاەۆ-جالپاقتال-قازتالوۆ-رف شەكاراسى (97-157 كم,12,63 شاقىرىمى), قازتالوۆ-جانىبەك-رف شەكاراسى, سامارا-شىمكەنت - (490-526 كم, 36 شاقىرىمى), ورال-اتىراۋ ( 27-108 كم, 81 شاقىرىمى) جوندەلمەكشى.
ەسكە سالا كەتەيىك, وڭىردەگى اۆتوموبيل جولدارىنىڭ جالپى ۇزىندىعى 6530,1 شاقىرىم بولسا, سونىڭ 1392,55 شاقىرىمى - رەسپۋبليكالىق, 5137,55 شاقىرىمى - وبلىستىق جانە اۋداندىق ماڭىزى بار جولدار. بيىل وسى جولداردىڭ بارلىعى 500 شاقىرىمىن جوندەۋ كوزدەلۋدە.
