سۋرەت inform.kz سايتىنان الىندى
«الاش بارىسى» رەسپۋبليكالىق تۋرنيرىنە استانا قالاسىنان, اقتوبەدەن جانە باتىس قازاقستان وبلىسىنىڭ اۋداندارىنان 40-تان استام بالۋان قاتىستى.
تۋرنيرگە قاتىسقان سالماعى 90 كەلىدەن جوعارى 15 بالۋاننىڭ جەتەۋى – جىل سايىن ەل پرەزيدەنتىنىڭ جۇلدەسى ءۇشىن وتەتىن «قازاقستان بارىسى» ءتۋرنيرىنىڭ شەشۋشى بەلدەسۋىنە قاتىسقاندار ەدى. سوندىقتان سايىس اسا تارتىستى ءوتتى.
سالماعى 90 كەلىگە دەيىن تارتاتىن بالۋاندار اراسىندا جەرگىلىكتى سىرىم اۋدانىنىڭ جىگىتتەرى دەس بەرمەدى. فينالدىق بەلدەسۋدە ايبول ورازعاليەۆ پەن نۇرىمجان عابباسوۆ كەزدەستى. ناتيجەسىندە, نۇرىمجان عابباسوۆ 90 كەلىگە دەيىنگى بالۋاندار اراسىندا جەڭىمپاز اتاندى. كەلەسى ورىنداردى ايبول ورازعاليەۆ پەن ايبەك عابدەشوۆ ءبولىستى. ال 90 كەلىدەن جوعارى توپتا قاراتوبەلىك دارحان تەمىرحانوۆ پەن جانىبەكتىك ەرنازار حامزين فينالعا شىعىپ, بوز كىلەمنىڭ شاڭىن قاقتى. جارىستىڭ باس تورەشىسى, ۇلتتىق دارەجەدەگى تورەشى, باتىس قازاقستان وبلىسى قازاق كۇرەسى فەدەراتسياسىنىڭ ۆيتسە-پرەزيدەنتى ارتۋر شەرعاليەۆ جارىستىڭ باس جۇلدەسى – 1 ميلليون تەڭگەنى ە.ءحامزيننىڭ قانجىعاسىنا بايلادى. ەكىنشى-ءۇشىنشى ورىن قاراتوبەلىك دارحان تەمىرحانوۆ پەن بورلىلىك تەمىرلان كولباەۆقا بۇيىردى.
– «الاش بارىسى» تۋرنيرىندە كاسىبي تورەشىلىك قۇرام جۇمىس جاسادى. جارىس بارىسىندا داۋ تۋدىرعان تۇستاردىڭ ءبارىن تورەشىلەر ەلدىڭ قاق الدىنا قاعىلعان LED ەكراننان قايتالاپ قاراپ وتىردى. جالپى, ءتۋرنيردىڭ ۇيىمداستىرىلۋى, اسىرەسە سوڭعى مۋزىكالىق تەحنولوگيالار مەن جارىق اپپاراتتارىنىڭ پايدالانىلۋى وتە كەرەمەت بولدى, – دەيدى ارىپتەسىمىز باۋىرجان شيرمەدين ۇلى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
