وبلىستاعى 48 مىڭعا جۋىق كاسىپكەرلىك سۋبەكتىلەرىنىڭ 37 مىڭ 800-ءى جۇمىس ىستەپ تۇر. بيىلعى 1 توقساندا وڭىردە 312 ملرد تەڭگەنىڭ ءونىمى ءوندىرىلدى. «بيزنەستىڭ جول كارتاسى-2020» باعدارلاماسى اياسىندا وبلىستا نەسيە تۇرىندەگى جانە ينفراقۇرىلىم جەتكىزۋ تۇرىندەگى 713 جوبا مەملەكەتتىك قولداۋعا يە بولىپ, ونىڭ جالپى سوماسى 85,6 ملرد. تەڭگەنى قۇراعان. بۇل جونىندە باتىس قازاقستان وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ ورىنباسارى باقداۋلەت يبرايموۆ باتىس قازاقستان وڭىرلىك كوممۋنيكاتسيالار قىزمەتىنىڭ الاڭىندا وتكەن كەزەكتى بريفينگ كەزىندە حابارلادى.
بىرىڭعاي باعدارلامانى جۇزەگە اسىرۋ ءۇشىن 2017 جىلى 1,6 ملرد. تەڭگە بولىنگەن, ونىڭ ىشىندە نەسيەلەر بويىنشا پايىزدىق مولشەرلەمەنى سۋبسيديالاۋعا - 1,4 ملرد. تەڭگە, كەپىلدەمە بەرۋگە - 94 ملن. تەڭگە, گرانتتىق قارجىلاندىرۋعا - 47 ملن. تەڭگە قارالعان.
2017 جىلدىڭ باسىنان بەرى بقو ۇيلەستىرۋ كەڭەسىنىڭ 17 وتىرىسى ءوتىپ, وندا ەكىنشى دەڭگەيلى بانكتەر بەرگەن نەسيەلەردىڭ پايىزدىق مولشەرلەمەسىن سۋبسيديالاۋ بويىنشا جالپى قۇنى 9 ملرد. تەڭگە قۇرايتىن 79 جوبا ماقۇلداندى.
بۇگىنگى تاڭدا جاس, ءوز ءىسىن جاڭادان باستاعان كاسىپكەرلەر اراسىندا – قايتارىمسىز گرانتتىق قارجىلاندىرۋ ۇلكەن سۇرانىسقا يە. 2017 جىلى 19 كاسىپكەر جالپى قۇنى 47 ملن. تەڭگە گرانتقا قول جەتكىزدى, ونىڭ ىشىندە 14 كاسىپكەر اۋىلدا تۇرادى.
يندۋستريالاندىرۋ كارتاسى اياسىندا II بەسجىلدىقتا (2015-2019 جج) جالپى قۇنى 83,4 ملرد. تەڭگەنى قۇرايتىن 22 جوبا جۇزەگە اسىرىلۋدا, 1224 جاڭا تۇراقتى جۇمىس ورىنى اشىلماق. سولاردىڭ ىشىنەن 2015-2016 جىلدارى جالپى قۇنى 72,7 ملرد. تەڭگە قۇرايتىن 12 جوبا ىسكە قوسىلدى. 1800 جۇمىس ورنى, ونىڭ ىشىندە 595 تۇراقتى جۇمىس ورىندارى اشىلدى.
2017 جىلى كاسىپكەرلىكتى قولداۋ كارتاسى شەڭبەرىندە قۇنى 6,9 ملرد. تەڭگە بولاتىن 6 جوبا ىسكە قوسىلماق. بۇل جوبالار:
- ەلەكترقالقاندارى جابدىعى ءوندىرىسىن ۇيىمداستىرۋ («ۋرال ەلەكتريك» جشس);
- ماكاروۆ كىرپىش زاۋىتى;
- اسفالتبەتون زاۋىتى («بىرلىك» جشس);
- قۇرعاق تاعام ءوندىرۋ تسەحى («كازكون» كونديتەرلىك فابريكاسى);
- جىلىنا 6000 توننا قۇس ەتىن وندىرەتىن فابريكا («جايىك اگرو لتد» جشس);
- ماكارون ءوندىرۋ فابريكاسى («جەلاەۆ نان ونىمدەرى كومبيناتى» اق).
بۇل جوبالار ىسكە قوسىلعان كەزدە 558 جۇمىس ورىنى اشىلادى, ونىڭ ىشىندە 416 جۇمىس ورىنى تۇراقتى.
وسى جوبالاردىڭ ىشىندە 2 جوبا: ەلەكترقالقاندارى جابدىعى ءوندىرىسىن ۇيىمداستىرۋ («ۋرالەلەكتريك» جشس) جانە ماكاروۆ كىرپىش زاۋىتىنىڭ قۇرىلىسى اياقتالىپ, ىسكە قوسىلدى.
كارتادان تىس جالپى قۇنى 9,1 ملرد. تەڭگە بولاتىن 550 جۇمىس ورىنى اشىلىپ, 2017 جىلى ىسكە قوسىلاتىن 6 جوبا قولعا الىندى:
- ەسىك-تەرەزە ءوندىرىسى («ستەكلوسەرۆيس» جشس);
- سەندۆيچ-پانەل ءوندىرىسى («اگران» جشس);
- اسفالت زاۋىتى («ادالارنا» جشس);
- اياق-كيىم تىگۋ فابريكاسى («اسار» جشس);
- باسك قۇرىلىس كولىك-لوگيستيكالىق ورتالىعى («ەۋرازيان لوگيستيك» جشس);
-مال ءونىمىن وڭدەۋ تسەحى («كۋبلەي» جشس).
سونىمەن قاتار, 2018-2019 جىلدارى 491 جۇمىس ورنى, ونىڭ ىشىندە 213 تۇراقتى جۇمىس ورنى بار جالپى قۇنى 3,7 ملرد. تەڭگەنى قۇرايتىن ءتورت جوبا ىسكە اسىرىلادى:
- كەراميكالىق كىرپىش زاۋىتى («134» جشس);
- حيميالىق وندىرىستىك بازاسى («توپان» جشس);
- بقو-دا مينەرالدى ۇنتاق, سۇيىق ءناتريلى شىنى جانە پەنوشىنى ءوندىرىسى زاۋىتى («Foamsil» جشس);
- شاعىن كاتەرلەر ءوندىرىسىن جاڭعىرتۋ جانە ۇلعايتۋ ( «ني «گيدروپريبور» اق).
2017 جىلى «اۋىل شارۋاشىلىعىن قارجىلاي قولداۋ قورى» اق-مەن بىرلەسىپ, اگروونەركاسىپ كەشەنىندەگى جوبالاردى قارجىلاندىرۋ تاجىريبەسىن ودان ءارى قاراي جالعاستىرۋ جوسپارلانۋدا. ول ءۇشىن وبلىستىق بيۋدجەت پەن اتالمىش قوردىڭ ارقايسىسىنان 300 ملن. تەڭگەدەن قارالادى. سونداي-اق, «دامۋ» كاسىپكەرلىكتى دامىتۋ قورى» اق ەكىنشى دەڭگەيلى بانكتەرمەن بىرلەسىپ قارجىلاندىرۋ ءۇشىن 700 ملن. تەڭگەدەن قارجى بولەدى.
«سونىمەن بىرگە, مەملەكەتتىك-جەكە ارىپتەستىك باعدارلاماسى ارقىلى 8 جوبا قولعا الىندى, سونىڭ ىشىندە 4 بالاباقشا, 1 دەنە شىنىقتىرۋ-ساۋىقتىرۋ كەشەنىنىڭ قۇرىلىسى جۇرۋدە, ورالداعى №7 ەمحانانى, №8 ورتا مەكتەپتىڭ اسحاناسىن سەنىمگەرلىك باسقارۋعا بەرۋ ماسەلەسى شەشىلمەك, - دەدى ب.يبرايموۆ.
- وتكەن 2016 جىل ىشىندە باتىس قازاقستان وبلىسىندا سۋبسيديالاۋ بويىنشا جالپى قۇنى 20,4 ملرد. تەڭگە قۇراعان 111 كەلىسىمشارت جاسالعان. بيىلعى جىلدىڭ العاشقى التى ايىندا جالپى نەسيە پورتفەلى 8 ملرد. 123,7 ملن. تەڭگە بولاتىن 69 جوبا بويىنشا سۋسبسيديالاۋ كەلىسىمشارتىنا قول قويىلعان. جالپى, باعدارلاما باستالعالى بەرى نەسيە پورتفەلى 86,7 ملرد. تەڭگە بولاتىن 603 جوبا ماقۇلداندى, - دەيدى «دامۋ» كاسىپكەرلىكتى دامىتۋ قورى» اق ايماقتىق فيليالىنىڭ ديرەكتورى ەربول يدەنوۆ.
ەكىنشى دەڭگەيلى بانكتەردەن نەسيە الۋ بارىسىندا كەپىلدەمە جەتىسپەسە, كاسىپكەر سۋبسيديالاۋ باعدارلاماسى اياسىندا «دامۋ» قورىنىڭ كەپىلدەمەسىن الا الادى. ياعني, جۇمىس ىستەپ وتىرعان كاسىپكەردىڭ بانككە قويعان كەپىلدەمەسىنىڭ قۇنىنان ەكى ەسە ارتىق مولشەردە نەسيە الۋىنا مۇمكىندىگى بار. شارۋاسىن ەندى باستاعان كاسىپكەرگە «دامۋ» قورى الاتىن نەسيەسىنىڭ 85 پايىزى كولەمىندە كەپىلدەمە بەرەدى. وتكەن التى ايدا باتىسقازاقستاندىق كاسىپكەرلەرگە جالپى قۇنى 490,8 ملن. تەڭگە قۇرايتىن 24 كەپىلدەمە بەرىلگەن.
«بيزنەستىڭ جول كارتاسى-2020» باعدارلاماسى شەڭبەرىندە كاسىپكەرلىكتى قارجىسىز قولداۋ شارالارى دا تابىستى ىسكە اسىرىلۋدا. مىسالى, «نازارباەۆ ۋنيۆەرسيتەتى» بيزنەستىڭ جوعارى مەكتەبى (استانا قالاسى) بازاسىندا قولعا الىنعان «شاعىن جانە ورتا بيزنەس توپ-مەنەدجمەنتىن وقىتۋ» جوباسى شەتەلدىك وقىتۋ ورتالىقتارىن قاتىستىرۋ ارقىلى ءبىلىم بەرۋدى كوزدەيدى. وقىتۋ تەگىن. جوبا باستالعان ۋاقىتتان بەرى وبلىستاعى 64 كاسىپكەر وسى جەردە وقىعان.
2016 جىل ىشىندە كاسىپكەرلەرگە قىزمەت كورسەتۋ ورتالىعى ارقىلى 4 مىڭنان اسا كومەك-كەڭەس بەرىلگەن. 2017 جىلدىڭ العاشقى التى ايىندا اقىل-كەڭەس تۇرىندەگى قىزمەت سانى 2734-كە جەتىپتى.
قازبەك قۇتتىمۇرات ۇلى,
باتىس قازاقستان وبلىسى
