سالتاناتتى جيىننىڭ رەسمي بولىمىندە ادىلەت ءمينيسترىنىڭ ورىنباسارى ەلۆيرا ءازىموۆا ءسوز سويلەپ, ەكسپو-2017 كورمەسىن وتكىزۋگە استانانىڭ ۇمىتكەرلىگىن قولداعانى ءۇشىن گامبياعا ريزاشىلىعىن ءبىلدىردى. «قازاق ەلى تمد مەن ورتالىق ازيا مەملەكەتتەرى اراسىندا دۇنيەجۇزىلىك اۋقىمداعى وسىنداي ماڭىزدى ءىس-شارانى ءبىرىنشى بولىپ وتكىزىپ وتىر. وسى كورمەدە «بولاشاق ەنەرگياسىنا» ارنالعان الەمنىڭ ۇزدىك عىلىمي جانە ينجەنەرلىك جەتىستىكتەرى قويىلعان», – دەدى ول.
ۆيتسە-مينيستر ەكى ەلدى يسلام ىنتىماقتاستىعى اياسىنداعى دوستىق قارىم-قاتىناس بايلانىستىراتىنىن ايتتى. ونىڭ سوزىنشە, تامىز ايىندا كورمە الاڭىندا عىلىم مەن تەحنولوگيانى دامىتۋعا باعىتتالعان ءبىرىنشى سامميت وتپەك. بولاشاقتا ەكسپو قۇرىلىسى ناقتى جوبالار تۇرىندە جاڭا اتاۋعا يە بولادى. گامبيانىڭ ساۋدا ونەركاسىپ, ايماقتىق بىرىگۋ جانە جۇمىسپەن قامتۋ ءمينيسترى دوكتور ايساتۋ تۋەل قازاقستانعا قوناقجايلىلىعى ءۇشىن العىس ايتىپ, بولاشاقتاعى ناتيجەلى ىنتىماقتاستىققا مۇددەلى ەكەنىن جەتكىزدى. ء«بىزدىڭ رەسپۋبليكامىزدان كەلگەن رەسمي دەلەگاتسيا مەن ونەر قايراتكەرلەرىنە كورسەتىلگەن قوناقجايلىلىقتى جوعارى باعالايمىز. مەن سىزدەرگە جوعارى مارتەبەلى گامبيا پرەزيدەنتى ادام بارروۋدىڭ سالەمىن جەتكىزەمىن. بىزگە مۇندا ءوز ۇيىمىزدەگىدەي قامقورلىق جاسالۋدا. بۇل سىيلاستىقتارىڭىز ءبىزدىڭ جۇرەگىمىزدە ماڭگى ءىزىن قالدىرادى», دەگەن شەتەلدىك مينيستر قازاقستاندىقتارعا ساۋدا جانە ينۆەستيتسيالىق ۇسىنىستارىن تانىستىرۋعا ءازىر ەكەنىن جەتكىزدى. جاڭا گامبيا ەنەرگەتيكا بويىنشا «جول كارتاسىن» اياقتاعان ەكەن. ال ول ينۆەستورلاردى جىلى جاعاجايعا تارتۋعا سەپتەسەتىن كورىنەدى.
«استانادا ءوتىپ جاتقان ەكسپو-2017 حالىقارالىق كورمەسىنە كۇللى الەم كوز تىگۋدە. سەبەبى, ءدال وسىندا بالامالى قۋات كوزدەرىنە قاتىستى وزىق تەحنولوگيالار ۇسىنىلىپ, كوپتىڭ كوكەيىندە جۇرگەن ساۋالدارعا جاۋاپ الۋعا بولادى. ءبىز قازاقستانمەن ءارى قاراي دا بايلانىسىمىزدى بەكەمدەپ, كورمەدەگى بىرەگەي باستامالاردى ەل يگىلىگىنە قولدانۋدى كوزدەيمىز», دەپ تۇيىندەدى ءسوزىن ايساتۋ تۋەل.
رەسمي بولىمنەن كەيىن ۇلتتىق ساحنادا گامبيادان كەلگەن ارتىستەر ونەر كورسەتتى. اسىرەسە, «پولو دجۋبۋ بەنگ» توبىنىڭ ءان-جىرى قوناقتاردى ءتانتى ەتتى.
اسحات رايقۇل,
"ەگەمەن قازاقستان"
