تسينحاي پروۆينتسياسى كۋنلۋن شىڭىندا ورنالاسقان. اۋدانى 720 شارشى شاقىرىمعا سوزىلعان ايماق تابيعي بايلىعىمەن جانە تاماشا مادەنيەتىمەن تانىمال. «سوڭعى ون جىل ىشىندە تسينحاي رەسۋرستاردى يگەرۋ ەسەبىنەن ەرەكشە سالالاردى دامىتۋدا. جالپى, ۇلتتىق ءونىمنىڭ ۇزدىكسىز ءوسۋ قارقىنى 10 پايىزدان اسادى. ەكونوميكالىق قۋاتتىلىعى, حيميا ونەركاسىبى ەداۋىر وسكەن, بۇل مۇناي جانە تابيعي گاز, تاۋلاردا وسەتىن وسىمدىك شارۋاشىلىعى, مال شارۋاشىلىعى جانە باسقا دا سالالاردىڭ ىلگەرىلەگەنىن اڭعارتادى.
قىتاي جانە تيبەت دارىلەرى, ۇلتتىق كيىم مەن اشەكەيلەر, سونداي-اق, وڭدەۋ ونەركاسىبى جاقسى دامۋدا. گيدروەنەرگەتيكا, جەل ەنەرگەتيكاسى, گاز گيدراتتارى جانە باسقا دا ەكولوگيالىق تازا ەنەرگيا رەسۋرستارىن يگەرۋ جانە پايدالانۋ ايرىقشا قارقىنمەن العا جىلجۋدا», دەيدى «XiNing Moonlight PV Technology» كومپانياسىنىڭ باس ديرەكتورى حاو يونگ. ول الەمدىك نارىقتا جەتەكشى ورىن الاتىن كۇن پانەلدەرىن جەتكىزۋ بويىنشا قازاقستانمەن ارىپتەستىكتى رەتتەۋ ماقساتىندا كەلگەنىن دە جاسىرمادى.
ء«بىز استاناداعى ەكسپو-2017 كورمەسىندە ءوتىپ جاتقان تسينحاي پروۆينتسياسىنىڭ اپتاسىنا قاتىسىپ, قازاقستاننىڭ نارىعىن زەرتتەپ, زەردەلەۋدى ماقسات ەتتىك. كۇن پانەلدەرىن شىعارۋمەن اينالىساتىن كومپانيامىز مۇنداعى ارىپتەستەرمەن جۇمىس جاساۋعا دايىن. قازاقستان – ءبىز ءۇشىن وتە ۇلكەن نارىق. ونىمدەرىمىز يننوۆاتسيالىق تەحنولوگيالارمەن جانە باعاسىمەن ەرەكشەلەنەدى. ولاردىڭ ءاربىر بولشەكتەرى تولىق پىسىقتالىپ, تسينحاي پروۆينتسياسىندا دا, جالپى قىتايدا دا بەلسەندى ساتىلۋدا. ءبىز افريكا, يراك, پاكىستان سيياقتى ەلدەرمەن جۇمىس جاسايمىز. ەندى ء«بىر بەلدەۋ, ءبىر جول» باعدارلاماسى مەن ەكسپو كورمەسىنىڭ ارقاسىندا قازاقستان نارىعىنا دا شىعاتىنىمىزعا سەنەمىز», دەدى باس ديرەكتور.
اسحات رايقۇل,
"ەگەمەن قازاقستان"
