وسىنداي اقجولتاي جاڭالىقتى ەڭ ءبىرىنشى بولىپ بەلگىلى تاريحشى, «ساكرالدى قازاقستان» عىلىمي-زەرتتەۋ ورتالىعىنىڭ باسشىسى بەرىك ابدىعالي ءوزىنىڭ فەيسبۋگتەگى پاراقشاسىندا: «كونە ءداۋىردىڭ كوزىندەي بولعان قۇندى جادىگەر! ساق داۋىرىنە ءتان ءتۇرلى دۇنيەنى بۇگىنگە بۇتىندەي جەتكىزگەن التاي تاۋلارى ماڭىنداعى بەرەل قورىمىنان زەينوللا ساماشەۆ باستاعان ەكسپەديتسيالىق توپتىڭ قازبا جۇمىستارى ناتيجەسىندە تاعى ءبىر التىن ادام تابىلدى. «قاسيەتتى قازاقستان» باعدارلاماسى اياسىندا شىعىس قازاقستان وبلىسىنا ىسساپارعا بارىپ, وسىنداي ايتۋلى جاڭالىققا كۋا بولدىم», دەپ سۇيىنشىلەي حابارلاعان بولاتىن.
بۇل جاڭالىقتى ەستي سالا ءبىز دە ەلمەن بىرگە ەلەڭ ەتىسىپ بىردەن زەينوللا ساماشەۆپەن بايلانىسقا شىعىپ, ۇيالى تەلەفون ارقىلى از-كەم تىلدەسكەن ەدىك.
«جۇرتتىڭ ءبارى «التىن ادام تابىلدى» دەپ شۋلاپ جاتىر ەكەن. ولاي دەۋگە كەلمەس. مۇندا جەرلەنگەن ادامنىڭ ساق كەزەڭىنە جاتاتىنى, اقسۇيەكتەر اۋلەتىنىڭ وكىلدەرىنىڭ ءبىرى ەكەنى انىق. بىراق حانشايىم نەمەسە پاتشايىم دەۋگە كەلمەيدى. ولاردىڭ جەرلەۋ راسىمدەرى باسقاشا. قورعاننان شىققان ادامنىڭ جانىنان باس كيىمنىڭ بىرنەشە اشەكەي بولشەكتەرى تابىلدى. ساۋكەلەگە ۇقسايدى. سوعان قاراعاندا قورعاندا جەرلەنگەن كىسى ايەل ادام دەپ بولجاپ وتىرمىز. بۇل ادام جەرلەنگەننەن كەيىن ءبىر-ەكى جىلدان سوڭ اياۋسىز تونالعان بولۋى كەرەك. ءمايىتتى سۇيرەگەن كەزدە ساۋكەلە بولشەكتەرى قالىپ قويعان سەكىلدى. ۇستىندەگى ىشىك تونى دا كوپتەگەن جۇقا التىندارمەن بەزەندىرىلگەن بولۋى كەرەك, ونى دا تۇك قالدىرماي توناپ, الىپ كەتكەن. ءمايىت جانىنان قۇمىرا سىنىقتارى مەن قويدىڭ قۇيىمشاعىنىڭ قالدىقتارى تابىلدى. سونىمەن قاتار قورعان ىشىنەن ەكى ات تاپتىق. قوس اتتىڭ ءبىرىنىڭ باسىنداعى جۇگەننىڭ بولشەكتەرى جاقسى ساقتالعان ەكەن. جالپى, بۇل قورعان قاتتى تونالعان. ايەل ادامنىڭ سۇيەكتەرى بىت-شىت بولىپ, جان-جاققا شاشىلعان», دەگەن ارحەولوگ قورعانداعى قازبا جۇمىستارى ءالى دە جالعاسىپ جاتقانىن, الداعى ۋاقىتتا بۇل جەردى دە مۋزەيگە اينالدىرۋ قاجەت ەكەندىگىن ايتتى.
وسى قازبا جۇمىستارىنىڭ باسى-قاسىندا جۇرگەن بەرەلدەگى قورىق-مۋزەيدىڭ ديرەكتورى جانگەلدى احماديەۆتىڭ ايتۋىنشا, بۇل قورىمداعى, ياعني №5 قورعانداعى قازبا جۇمىستارى شىعىس قازاقستان وبلىسى اكىمدىگىنىڭ قولداۋىمەن, زەينوللا ساماشەۆتىڭ جەتەكشىلىگىمەن وسى جىلدىڭ ماۋسىم ايىنىڭ باسىندا باستالعان ەكەن. قورعاننان تابىلعان ادام قاراعايدان جاسالعان تابىتقا جەرلەنىپتى. تابىتتىڭ ۇزىندىعى – 2,5 مەتر, ەنى – 2 مەتر شاماسىندا. ال قورعاننىڭ بيىكتىگى 7 مەتر, ديامەترى 20 مەتر ەكەن.
ازامات قاسىم,
«ەگەمەن قازاقستان»
شىعىس قازاقستان وبلىسى,
كاتونقاراعاي اۋدانى
(سۋرەتتەر بەرىك ابدىعاليدىڭ فەيسبۋكتەگى پاراقشاسىنان الىندى)
