ايتا كەتەرلىگى, بيىلعى شاقىرىلىمنىڭ ساربازدارى – ەلىمىزدىڭ بارلىق ءوڭىرىنىڭ وكىلدەرى, ولار استانادا ءوتىپ جاتقان ەكسپو-2017 حالىقارالىق كورمەسىنىڭ قاۋىپسىزدىگىن قامتاماسىز ەتۋگە قاتىسادى. سالتاناتتى شارا بارىسىندا اسكەري وركەستردىڭ سۇيەمەلدەۋىمەن ەلىمىزدىڭ ءانۇرانى ورىندالىپ, كوك تۋىمىز جوعارى كوتەرىلدى. اسكەري ءبولىم كومانديرىنىڭ قۇتتىقتاۋىنان كەيىن, ساربازدار بىرىنەن كەيىن ءبىرى ساپتىق الاڭعا شىعىپ, سالتاناتتى تۇردە اسكەري انت قابىلدادى.
«بيىل جاۋىنگەرلەرگە ۇلكەن جاۋاپكەرشىلىك جۇكتەلىپ وتىر. ولار ەلوردانىڭ كوشەلەرىندە قوعامدىق ءتارتىپ پەن قاۋىپسىزدىكتى قامتاماسىز ەتەدى. سونداي-اق, ەكسپو-2017 حالىقارالىق كورمەسى اياسىندا وتەتىن بۇقارالىق شارالاردىڭ تىنىشتىعىن كۇزەتۋگە اتسالىسادى. اسكەري انت قابىلداعان ساربازدار ارتىلعان ۇلكەن سەنىمدى اقتايدى دەپ بىلەمىن», دەيدى 5573 اسكەري ءبولىمىنىڭ كومانديرى, پولكوۆنيك ساكەنتاي شەكاربەكوۆ.
