ەتنوسارالىق كەلىسىمدى نىعايتۋدى جانە قازاقستان حالقىنىڭ باي مادەنيەتىن ودان ءارى دامىتۋدى ماقسات ەتكەن فەستيۆالدا ەلىمىزدىڭ ءار وڭىرىنەن كەلگەن تەاتر مايتالماندارى قالىپتاسقان داستۇرمەن قىزىل كىلەم ۇستىمەن ءجۇرىپ ءوتتى. ءتىلى باسقا بولسا دا, تىلەگى ءبىر ونەر يەلەرى بۇل جولعى دوداعا ەرەكشە دايىندىقپەن كەلگەندەرىن بايقاتتى. ولاردىڭ قاتارىندا ق.قوجامياروۆ اتىنداعى رەسپۋبليكالىق مەملەكەتتىك اكادەميالىق ۇيعىر مۋزىكالىق كومەديا تەاترى, رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترى, رەسپۋبليكالىق اكادەميالىق نەمىس دراما تەاترى, وڭتۇستىك قازاقستان وبلىستىق وزبەك دراما تەاترى, م.گوركي اتىنداعى مەملەكەتتىك اكادەميالىق ورىس دراما تەاترى, اقمولا وبلىستىق ورىس دراما تەاترى, استانا جاستار تەاترى بار. ەندى ەلوردا تۇرعىندارى مەن قوناقتارى وقۋشىلار سارايى مەن م.گوركي اتىنداعى مەملەكەتتىك اكادەميالىق ورىس دراما تەاترى ساحنالارىندا ءبىر اپتا بويى ل.تولستوي, ي.گەتە, ءا.كەكىلباەۆ, ا.وستروۆسكي, ل.سولوۆەۆ سىندى كلاسسيكتەردىڭ قويىلىمدارىمەن تانىسادى.
ادىلقازىلار القاسى «ۇزدىك سپەكتاكل», «ۇزدىك رەجيسسەرلىك جۇمىس», «ۇزدىك ايەل ءرولى», «ۇزدىك ەر ادام ءرولى», «ۇزدىك ستسەنوگرافيا», «ەكىنشى پلانداعى ۇزدىك ايەل ءرولى», «ەكىنشى پلانداعى ۇزدىك ەر ادام ءرولى», «ۇزدىك ۇلتتىق دراماتۋرگيا» اتالىمدارى بويىنشا جەڭىمپازداردى انىقتايدى.
ۇيىمداستىرۋشىلاردىڭ پىكىرىنشە, وسىنداي ۇلتتىق مادەني شارالار قازاقستاندا ءومىر ءسۇرىپ, ەڭبەك ەتىپ جۇرگەن ءار ۇلت وكىلدەرىنىڭ قازىرگى زامانعى تالانتتار شوعىرىن كورۋگە مۇمكىندىك بەرەدى. فەستيۆال – اكتەرلەر مەن رەجيسسەرلەر ءۇشىن دامۋ, تاجىريبە الماسۋ الاڭى. ول ەلدىڭ تىلدىك جانە مادەني كوپتۇرلىلىگىن ساقتاۋعا, ءبىر-ءبىرىن تولىقتىرۋعا, قازاقستان حالقىنىڭ مادەنيارالىق سۇحباتىنىڭ ودان ءارى دامۋىنا ىقپال ەتەرى ءسوزسىز. ەلىمىزدىڭ ەتنوستىق تەاترلارى وسى ساحنادا مەملەكەتىمىزدەگى بارلىق ەتنوستار ونەرىن ناسيحاتتايتىن بولادى.
