قازاق حالقىنىڭ, ونىڭ ىشىندە كوشپەندىلەر وركەنيەتىن سيپاتتايتىن قالانى جوباعا اۆتورلارى «بوزوق» دەگەن اتاۋ بەرگەن. ءدۇيىم جۇرتپەن بىرگە قالاشىقتىڭ اشىلۋىنا استانا اكىمى اسەت يسەكەشەۆ قاتىسىپ, قالا تۇرعىندارىن باعانالى وردانىڭ مەرەيلى مەرەكەسىمەن قۇتتىقتادى.
جوبا اۆتورى جاندوس قىرىقباەۆتىڭ ايتۋىنشا, كوشپەندىلەر قالاشىعىن تۇرعىزۋعا ەكى اي بويى جۇمىس ىستەگەن. اتالعان كەشەن ءۇش اي بويى – 10 قىركۇيەككە دەيىن ەلوردا تۇرعىندارى مەن مەيماندارى ءۇشىن جۇمىس ىستەيتىن بولادى. تاڭەرتەڭگى ساعات 10.00-دەن كەشكى 22.00 ارالىعىندا «بوزوققا» كەلگەن قوناقتار سالت-ءداستۇر مەن تاريحتان سىر شەرتەتىن تەاترلاندىرىلعان كورىنىستەردى تاماشالاي الادى.
«كوپشىلىك كوشپەندىلەردىڭ تۇرمىس-تىرشىلىگىن تانىستىراتىن وسىنداي كەشەندەردى ەتنواۋىل دەپ اتايدى. مەنىڭشە ول دۇرىس ەمەس. ءبىزدىڭ اتا-بابالارىمىز تەك اۋىلدا تۇردى دەپ كىم ايتتى؟ ورتا عاسىردا قازاق دالاسىندا قانشاما قالالار بولعان. سول سەبەپتى, ءبىز كەشەندى «بوزوق» كوشپەندىلەر قالاسى دەپ اتادىق. كۇن سايىن بۇل كەشەندە ءتۇرلى مادەني شارالار مەن تەاترلاندىرىلعان قويىلىمدار وتكىزىلەدى», - دەدى مەديا ورتالىقتىڭ تىلشىسىنە بەرگەن سۇحباتىندا كوشپەندىلەر قالاشىعى جوباسىنىڭ اۆتورى ءارى جەتەكشىسى ج.قىرىقباەۆ.
سونداي-اق قالاشىقتىڭ ىشىندە ءتۇرلى كورمەلەر مەن جارمەڭكەلەردىڭ ۇيىمداستىرىلاتىنىن دا ايتتى. ىسمەرلەر مەن ۇستالاردىڭ قولىنان شىققان تۇرمىستىق جابدىقتار مەن زەرگەرلىك جانە تۇرمىستىق بۇيىمدار ساتىلىمعا قويىلدى. سونداي-اق اق جاۋلىقتى اجەلەر مەن ون ساۋساعىنان بال تامعان ىسمەرلەر جينالعاندارعا ۇلتتىق بۇيىمداردى جاساۋدان شەبەرلىك سىنىپتارىن وتكىزەدى. كوشپەندىلەر قالاسىنىڭ اشىلۋ سالتاناتىنا حالىقپەن بىرگە استانا اكىمى اسەت يسەكەشەۆ قاتىسىپ, جينالعانداردى ەلوردا كۇنىمەن قۇتتىقتادى.
«قۇرمەتتى استانا قالاسىنىڭ تۇرعىندارى جانە قوناقتارى! بارشاڭىزدى استانا كۇنى مەرەكەسىمەن شىن جۇرەكتەن قۇتتىقتايمىن. بارلىقتارىڭىزعا زور دەنساۋلىق, باق-بەرەكە تىلەيمىن. ارقاشاندا قۋانىش پەن ساتتىلىك باۋلاپ ءجۇرسىن. استانامىز كوركەيە بەرسىن. مەرەكە قۇتتى بولسىن!», - دەدى ەلوردا باسشىسى ءوز سوزىندە. سونىمەن بىرگە ءوز قۇتتىقتاۋىندا جاڭا ەلوردانىڭ نەگىزىن قالاۋشى ءارى اۆتورى ەلباسى نۇرسۇلتان نازارباەۆتىڭ ءسوزىن تىلگە تيەك ەتتى.
«استانا حالقىمىزدىڭ مۇمكىندىگى مەن ەلىمىزدىڭ جاڭارۋىنىڭ سيمۆولى بولىپ تابىلادى. وسى كۇندەرى ەلوردامىزدا ەكى مىڭنان استام ءتۇرلى مادەني-بۇقارالىق شارالار ءوتىپ جاتىر. بارلىق ساياباقتار مەن گۇلزارلاردا, قالانىڭ شەت اۋداندارىندا مەرەكەلىك كونتسەرتتەر مەن فەستيۆالدەر, ءتۇرلى شوۋلار وتكىزىلىپ جاتىر. مۇنىن بارلىعى قالا تۇرعىندارىنىڭ مەرەكەنى سەزىنۋى ءۇشىن جاسالدى. ويتكەنى, بۇل مەرەكە جالپىحالىقتىق مەيرام. ونى تەك ەلوردادا عانا ەمەس, ەلىمىزدىڭ بارلىق اۋماعىندا كەڭ اۋقىمدا تويلانۋدا. وسىعان وراي بارلىقتارىڭىزعا تەك جاقسىلىق, باقىت پەن اماندىق تىلەيمىن», - دەدى ءا.يسەكەشەۆ اقجارما تىلەگىن تۇيىندەي كەلە.
استانا اكىمى كەشەننىڭ اۋماعىنداعى قايناعان تىرلىكپەن تانىسىپ, مەرەكەلىك قويىلىمدى تاماشالادى. ءبىرى ءجۇن ءتۇتىپ, ءبىرى ۇرشىق ءيىرىپ وتىرعان ىسمەر اجەلەردىڭ ورىنداۋىنداعى ءاندى تىڭداپ, قۇرمەتىن ءبىلدىردى. ءتىپتى, شەبەرلەر جارمەڭكەسىنە بارىپ, ەستەلىككە ۇلتتىق ناقىشتاعى كادەسىيدى ساتىپ الدى. اقشاڭقاي ۇيگە باس سۇعىپ, ۇلتتىق تاعامنان دا ءدام تاتتى.
