قۇرىق پورتىنان باسقا ەلدەرگە جۇك تاسىمالداۋعا مۇمكىندىك بەرەتىن «بەينەۋ-اقجىگىت-وزبەكستان رەسپۋبليكاسىنىڭ شەكاراسى» اۆتوموبيل جولى – اسا ماڭىزدى كولىك ينفراقۇرىلىمدىق نىسان. جولدىڭ ەكىنشى كاتەگورياسى 85 شاقىرىمدى قۇرايدى. وزبەكستان شەكاراسىنان باستالاتىن جول بەينەۋ اۋدانىنان وتەدى.
«وتكەن جىلدىڭ سوڭىنان باستاپ ەلىمىزدىڭ وزبەكستان رەسپۋبليكاسىمەن قارىم-قاتىناسى نىعايا ءتۇستى. ۇستىمىزدەگى جىلدىڭ ءبىرىنشى توقسانىندا ەكى ەل اراسىنداعى ساۋدا اينالىمى 37 %-عا ءوستى. رەسپۋبليكانىڭ وزبەكستانمەن بايلانىس جولى تەك وڭتۇستىك قازاقستان وبلىسىنىڭ سارىاعاش اۋدانى مەن بەينەۋ اۋدانىندا عانا بار. بەينەۋ اۋدانى وزبەكستانمەن تەمىرجول جانە اۆتوموبيل جولى ارقىلى قاتىناس جاسايتىن ەلىمىزدىڭ كيەلى قاقپاسى عانا ەمەس, ورتا ازيانىڭ رەسەيگە, ودان ءارى ەۋروپاعا شىعاتىن بىردەن-ءبىر قاتىناس جولى. ماڭعىستاۋ وبلىسى ءىرى كولىكتىك لوگيستيكالىق ورتالىققا اينالىپ كەلەدى», – دەدى وبلىس اكىمى ەرالى توعجانوۆ.
ول سونداي-اق اۆتوموبيل جولىنىڭ رەكونسترۋكتسيا جاساۋ جۇمىستارى قارقىندى جۇرگىزىلەتىندىگىن, ويتكەنى بۇل كاسپي كولىك دالىزىندە جۇك تاسىمالداۋدى قامتاماسىز ەتەتىن ماڭىزدى نىسان ەكەنىن اتاپ ءوتتى.
قۇنى 19,8 ملرد تەڭگەنى قۇرايتىن جولدىڭ قۇرىلىس جۇمىستارى 2018 جىلى اياقتالماق. رەسپۋبليكالىق بيۋدجەتتەن قارجىلاندىرىلاتىن جوبانىڭ مەردىگەرى – «تەمىرجول جوندەۋ» جشس.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
