06 قازان، 2011

مەيىرىم شۋاعى نەمەسە مەن جامان اۋرۋدان قالاي جازىلدىم

279 رەت كورسەتىلدى
دارىگەردە قىراننىڭ كوزى،  قىزدىڭ ساۋساعى، جىلاننىڭ دانالىعى، ارىستاننىڭ جۇرەگى بولۋى كەرەك.                                      ءابۋ ءالي يبن سينا ادامدى جاقسىلىققا تاربيەلەيتىن، تەرىس جولعا ءتۇسىپ بارا جاتقاندارى بولسا، ولارعا وي سالىپ توقتاتاتىن، قىسىلىپ  قينالعان ساتتە كوڭىلىڭە جۇبانىش اكەلەتىن دۇنيەدە ءبىر عانا ساۋلە بار – ول مەيىرىم دەپ اتالادى. زامانى قانداي بولسا دا، ادام بالاسى مەيىرىمگە مۇقتاج، سەبەبى، ءومىردىڭ بۇرالاڭ جولدارىندا كەزدەسەتىن جاۋىن-شاشىنى، بۇرقاعان بورانى، اپتابى، قۇيىنى مەن دا­ۋى­لى ادامنىڭ جانىن جارالايدى. اسىرەسە، سىرقات ادامنىڭ كوڭىل كىربىڭى كوبىرەك بولا­تىنى بەلگىلى. دارىگەردىڭ الدىنا بارعان سىرقات ادام وعان قۇدايدىڭ وزىنە سەنگەندەي سەنىپ، ءدارى­گەر ونىڭ ەمەس، دارىگەردىڭ قاس-قاباعىنا ول قاراپ، جىلى ءسوزىن ەستىسە، جازىلىپ كەتكەندەي، ءزىل باسقان تۇلا بويى جەڭىلدەنىپ، ءتىپتى ساۋىققانداي اسەردە بولادى. «دارىگەردىڭ ءدارىسى ەمەس – ءسوزى ەم» دەگەندى حالىق بەكەر ايتپايدى. ەرتەرەكتە ماسكەۋدەگى ءبىر قالامداس جولداسىمنىڭ ايتقانى ەسىمنەن كەتپەيدى. ...ءسىبىر جاقتا تۇراتىن ءبىر ازامات «اس­قازانعا تۇسكەن راك» دەگەن دياگنوزبەن ءماس­كەۋگە كەلىپ، اۋرۋحاناعا جاتادى. جاپ-جاس جىگىت، بىراق جۇدەپ قۇر سۇلدەرى قالعان. وپەراتسيا جاساۋعا كىرىسكەن ونكولوگ-حيرۋرگ اۋرۋ­دىڭ ءىشىن اشادى دا، ەمگە نەمەسە الىپ تاس­تاۋعا كەلمەگەسىن، كەرى جاۋىپ تىگىپ تاستايدى. سىرقاتقا «ءبارى دۇرىس بولدى» دەپ، سىرتقى جاراسى جازىلعاسىن، اۋرۋحانادان شىعا­رادى. ءازىر قۋاتى باردا وتباسىنا جەتىپ السىن دەپ ويلايدى دارىگەر. جىل وتەدى. ءبىر كۇنى جۇمىس اياعىندا ۇيىنە كەتۋگە كيىنىپ جاتقان دارىگەردىڭ بولمەسىنە قولىندا ۇلكەن سومكەسى بار الپامساداي جىگىت كىرىپ كەلەدى. ول وتكەن جىلعى سىرقات ازامات ەكەن. دارىگەر الدەقاشان دۇنيە سالدى دەپ جۇرگەن كىسىنى كورىپ، تاڭ-تاماشا قالادى. – ءسىزدىڭ ەمىڭىزدەن كەيىن قۇلان تازا بولىپ جازىلىپ كەتتىم، جۇمىسىمنان دا قول ۇزگەنىم جوق. سىزگە العىسىمدى ايتايىن دەپ ادەيى كەلدىم، – دەپ ەكەۋى مارە-سارە بولىپ تابىسادى. بۇل وقيعا راس پا، وتىرىك پە – مەن بىلمەيمىن، بىراق دارىگەرگە، ونىڭ سوزىنە شىن نيەتىمەن قۇلاي سەنگەن ادامعا ەم قوناتىنى جايلى ايتىلعان اڭگىمە ەكەندىگىندە ءسوز جوق. دارىگەردىڭ  دە دارىگەرى بولادى، ارقايسى­سى­نىڭ مىنەز-قۇلقى دا اربولەك ەكەنى بەلگىلى. ونىڭ ۇستىنە، مۇرنىڭ اۋىرسا بىرەۋى، ءتىسىڭ اۋىرسا ەكىنشىسى دەگەندەي، ابدەن كۇلكى كەلتىرەتىن ارەكەتتەر-اق ءوزى اۋرۋ ادامدى ونان سايىن شارشاتادى. ال، ادام ورگانيزمى تۇتاس ءبىر الەم عوي. مىسالى، ءۇيدىڭ تەرەزە شىنىسى سىنسا، جەل ۇرلەپ بولمەلەر ازىناپ كەتەدى. ەسىگى جابىلماسا دا ءۇي ىشىندە بەرەكە بولمايدى. ادام ورگانيزمى دە سول سياقتى. وسى رەتتە بۇدان بىرنەشە جىل بۇرىن ەلىمىزدە قولعا الىنىپ، كەيىن باسىلىپ قالعان وتباسىلىق دارىگەر ءتيىمدى، ءارى اۋرۋ كىسىگە دە، دارىگەرگە دە پايدالى ءادىس سەكىلدى ەدى. مەن وسىدان ەكى جىل بۇرىن كەۋدەگە تۇسكەن جامان اۋرۋمەن اۋىردىم. كەۋدەمدە ءبىر  تۇيىنشەك بار ەكەنىن سەزىپ ءجۇردىم، بىراق دارىگەرگە كورىنگەنىم جوق. ءبىر كۇنى كەشكە قاراي باسىم اينالىپ بارا جاتقاسىن، پرەزيدەنت ءىس باسقارماسى اۋرۋحاناسىنىڭ باس دارىگەرى راحات وسەربايقىزى بايقوشقارو­ۆاعا تەلەفون شالىپ ەم، ون بەس مينۋتتا اۋرۋحانانىڭ جەدەل جاردەم بريگاداسى جەتىپ كەلدى. قان قىسىمىم ەكى جۇزگە جەتىپتى، بىردەن اۋرۋحاناعا اپارىپ سالدى. دارىگەر­لەردىڭ قولدارىنا تۇسپەي جۇرگەن مەنى راحات ءسىڭلىم «باسىڭىزدان باشپايىڭىزعا شەيىن تەكسەرتەمىن، ءسىز ءوزىڭىزدىڭ ساۋلىعىڭىزعا ءتىپتى كوڭىل بولمەيدى ەكەنسىز، وزگە زامانداستا­رى­ڭىز اۋىرماسا دا جىلىنا ەكى-ءۇش رەت اۋرۋحانادا جاتىپ تەكسەرىلەدى، ەم-دوم الادى، ال، ءسىز شاقىرساق تا كەلمەيسىز» دەپ ماماندار­دىڭ بارىنە كورسەتىپ، اقىرىندا كەۋدەمدەگى ىسىكتى انىقتاپ، استانا قالاسىنداعى مىقتى دەگەن ونكولوگ، حيرۋرگ، نەۆروپاتولوگ دارىگەر­لەر­دى جيناپ، كونسيليۋم جاسادى. «كەۋدەگە تۇسكەن راك» دەگەن دياگنوز قويىلدى. راحات پرەزيدەنت ءىس باسقارماسىنا قارايتىن مەدي­تسي­نالىق ورتالىققا جانە پرەزيدەنت ءىس باس­قارماسىنا سويلەسىپ، ولار گەرمانيانىڭ فراي­بۋرگ قالاسىنداعى ۋنيۆەرسيتەت كليني­كاسىنا جىبەرۋدى ۇيعارىپ قويىپتى. ءبىز جاستاۋ كەزىمىزدە مۇنداي اۋرۋعا شال­دىق­قان كىسىگە «ەم-دوم ىزدەپ اۋرە بولۋدىڭ كەرەگى جوق، بۇل قۇدايدىڭ بۇيرىعىمەن ولىمنەن كەلگەن حابار» دەگەندى ءجيى ەستيتىنبىز. وسى پىكىر قانىما ءسىڭىپ قالعان مەن: – ەشقايدا دا بارمايمىن، شەت ەلگە بارىپ ولگەنشە، ءوز وتانىمدا ولگەنىم جاقسى، – دەپ وتىرىپ الدىم. كونسيليۋمعا جينالعان جوعارى دارەجەلى مامان دارىگەرلەر جەر-جەردەن ماعان ۇرسا باستادى: – بۇل نە دەگەن ءسوز؟ ءوزىڭىز كوزى اشىق، حالىققا بەلگىلى ادامسىز، سويتە تۇرا وسىن­داي پىكىر ايتاسىز! ءدال وسىنداي سىرقاتتان قانشا ادام جازىلىپ، ءومىر ءسۇرىپ جۇرگەنىن بىلمەيسىز بە؟! فرايبۋرگ قالاسىندا توعىز اي جاتىپ، ەكى وپەراتسيادان ءوتتىم جانە حيميا، ساۋلە ەمدەرىن الىپ، ءتاۋىر بولعاسىن ەلگە ورالدىم. وبالدارى نە كەرەك، نەمىس دارىگەرلەرى العاش­قى كۇننەن باستاپ-اق شىنايى كوڭىلمەن قاراپ، قامقورلاي باستادى. وعان ءبىر جاعىنان ءبىزدىڭ پارلامەنت سەناتى شەت ەلدەرمەن بايلانىس كوميتەتىنىڭ توراعاسى قۋانىش سۇلتانوۆ باستاعان باۋىرلارىمىز بەرليندەگى قازاق­ستان ەلشىسى نۇرلان وڭجانوۆقا تەلەفون شا­لىپ، مەن جاتقان كلينيكانىڭ باس دارىگە­رىمەن سويلەسۋگە وتىنگەنى، ەلشى ءىنىمىزدىڭ مىڭ شاقى­رىمنان استام جەردەن كەلىپ، پروفەسسورمەن مەن جايلى سويلەسكەنى دە اسەر ەتكەن بولۋى كەرەك. ايەلدەردىڭ ونكولوگيالىق اۋرۋلارى بويىنشا ەۋروپا ەلدەرىنە ورتاق كوميسسيا بار ەكەن، مەنى سول كوميسسيانىڭ توراعاسى، پروفەسسور گەرولد گيچ قارادى، وپەراتسيالاردى دا ءوزى جاسادى. ارينە، شەت ەلدە، ونىڭ ىشىندە  گەرمانيادا ەمدەلۋ وتە قىمباتقا تۇسەدى ەكەن، بىراق ازامات باۋىرلارىمىزدىڭ كومەگىنىڭ ارقاسىندا ساۋىعىپ كەتكەن سياقتىمىن. ايتەۋىر، ازىرشە امان ءجۇرمىن. مەن بۇل حيكاياتتى جازعانداعى ماقساتىم – ماعان، ەڭ الدىمەن، مەيىرىم ساۋلەسىن ءتۇسىرىپ، مەنىڭ بارمايمىن، ەمدەلمەيمىن دەگەنىمە قاراماي، ءبارىن ءوزى رەتتەپ، تۋعان اناسىنداي جاقسىلىق جاساعان راحات وسەربايقىزى بايقوشقاروۆانىڭ ەڭبەگىن، ادامگەرشىلىگىن ايتقىم كەلىپ ەدى. ءبىز استانا قالاسىنىڭ تۇرعىنى بولعالى دا ون ءۇش-ون ءتورت جىل بولىپ قالىپتى. سودان بەرى وسى اۋرۋحانادا ەسەپتە تۇراتىنىم بولماسا، راحات وسەربايقىزىمەن پالەندەي الىس-بەرىس ارالاسىم نەمەسە جەرلەستىك، تۋىستىق دەگەندەي جاقىندىعىم جوق ەدى. گەرمانيادان كەلگەلى دە ەكى جىلعا جۋىق ۋاقىت ءوتتى، سودان بەرى دە راحات وسەربايقىزى مەزگىل-مەزگىل مەنى تەكسەرىپ تۇرۋدى داستۇرگە اينالدىرىپ الدى. قازىر ونىڭ ءار ءسوزى، ءار پىكىرى – مەن ءۇشىن زاڭمەن بىردەي دەسەم، ارتىق ايت­قانىم ەمەس. ينستيتۋتتا وقىپ جۇرگەنىمىزدە الەكساندر وستروۆسكيدىڭ «نايزاعايى» تۋرا­لى نيكولاي دوبروليۋبوۆتىڭ «قاراڭعى پاتشالىقتاعى جارىق ساۋلە» دەگەن ماقالاسىن وقىپ، كەرەمەتتەي ۇناتقانىم بار ەدى. اۋرۋ جانىنا باتقان ادامعا، ونىڭ ىشىندە ەمى جوق دەپ جۇرگەن جانعا دۇنيەنىڭ ءبارى تۇنەك پاتشالىعى بولىپ كەتەتىنىن ءوزىم با­سىمنان كەشىردىم. مىنە، سودان بەرى راحات وسەربايقىزىن مەن دە «تۇنەك پاتشالى­عىنداعى جارىق ساۋلە» دەپ اتايتىن بولدىم. ول تەك ماعان عانا ەمەس، سىرقات ادامنىڭ بارىنە بىردەي شىنايى جاناشىرلىقپەن قا­رايدى. قاشان كورسەڭ دە، ونىڭ جايباراقات جۇرگەنىن كەزدەستىرمەيسىڭ: جان ۇشىرىپ «اناۋ كليەنتتى مرت-عا ءتۇسىرۋ كەرەك، جەتىنشى پالاتاداعى سىرقاتتى كورسەتۋ ءۇشىن اكادەميك-ورتوپەدتى شاقىرىڭدار» دەگەن سەكىلدى اۋىزەكى قىسقا بۇيرىقتار بەرىپ، جۇگىرەدى دە جۇرەدى. اۋرۋحانادا، كلينيكادا قانشاما دارىگەر، قانشا مەدبيكە جانە سانيتارلىق جۇمىس اتقا­راتىن قىزمەتكەرلەر بار. ولاردىڭ ارقايسى­سىنىڭ تۇرمىس-جاعدايىن ءبىلىپ وتىرۋدى دا باس دارىگەر ەستەن شىعارماۋعا ءتيىس. باسقا­لاردى بىلاي قويعاندا دارىگەرلەردىڭ بارىندە بىردەي باسپانا جوق، ارقايسىسىن ءار وبلىستان تاڭداپ شاقىرتىپ العاندىقتان قيىندىعى بار. ارينە، استانادا تۇرعىن ءۇي ماسەلەسى وڭاي ەمەس، تومەنگى ساتىداعى قىزمەتكەرلەرگە ۋاقىتشا تۇراتىن جاتاقحانا بولسا دا جاقسى بولار ەدى... – ءبىزدىڭ سالامىزدا ەڭ باستىسى دارىگەردىڭ ءبىلىمدى، تاجىريبەلى بولۋى. سودان كەيىن ءاربىر سىرقات ادامعا جاناشىرلىقپەن قاراۋ. كەشكى ساعات 18.00. بولىسىمەن ۇيىنە اسىعاتىندار سىرقات ادامعا جانى اشيتىن دارىگەرلەر ەمەس، – دەيدى راحات وسەربايقىزى. – دارىگەر-تەراپەۆتەردىڭ اراسىندا ءبىر دە ءبىر جاس عىلىم دوكتورى جوق ەكەن، بۇكىل وبلىستارعا سۇراۋ سالىپ تابا المادىم. باس دارىگەردىڭ جۇمىسى باستان اسىپ جاتاتىنىن راحات وسەربايقىزىنىڭ تاڭعى ساعات سەگىزدەن كەشكى ساعات جيىرمادان اسقان­شا باس الا الماي جاتاتىن جۇمىسىنان كورۋگە بولادى. راحات كوپبالالى جانۇيادا وسكەن، اناسى ءساليما بۇل ونىنشى كلاستى بىتىرەتىن جىلى 46 جاسىندا قايتىس بولىپتى. جارقىلداعان سۇلۋ اناسىنىڭ جاپ-جاس كەزىندە دۇنيەدەن وزعانىنا قاتتى قينالعان قىز بالا «مەن قالايدا دارىگەر بولىپ ادام ومىرىنە اراشاشى بولام» دەپ ىشتەي بەكىنسە كەرەك. تسەلينوگراد قالاسىنداعى مەديتسينا ينس­تيتۋتىندا كۇندىز وقىپ، تۇندە سانيتاركا بولىپ جۇمىس ىستەيدى. بۇرىن سوۆحوز باسقارىپ، بالالارىنىڭ عانا ەمەس، بۇكىل ەلدىڭ الدىندا ايباتتى دا قايراتتى ازامات بولىپ كورىنەتىن اكە سۇيىكتى جۇبايىنىڭ قازاسىنان كەيىن وزىنە ءوزى كەلە الماي قاجي باستاعان سەكىلدى. بالالار شيەتتەي جاس، اكەنىڭ زەينەتاقىسى بىرىنە جەتسە، ەكىنشىسىنە جەتپەيدى. وزدەرى قاراعاندى وبلىسىنىڭ وساكاروۆكا اۋدانىندا اۋىلدا تۇرادى. راحات وسەربايقىزىنىڭ اڭگىمەسىن ەستىگەندە، وزدەرى وقيتىن جوعارى وقۋ ورنىنىڭ جانىنان ماشينالارىن قوياتىن ورىن تابا الماي جۇرگەن قازىرگى ستۋدەنتتەر جانە كۇندىزگى وقۋىنان كەيىن اۋرۋحانا بولمەلەرىن جۋىپ-شايىپ تازالاپ، قا­راڭعى كوشەلەرمەن قورقىپ باسىپ، كىتاپ-داپتەر تولى سومكەسىن ارقالاعان كۇيى قالانىڭ شەتىندەگى «سلوبودكادا» تۇراتىن ۇيگە كەلە جاتاتىن تالدىرماش كىشكەنە قىز كوز الدىما كەلەدى. اناسى بۇعان اياعى اۋىر كەزىندە اكە-شەشەسى ۇل بولادى دەپ دامە ەتىپ، راحات تۋعاسىن اكەسى ونى ەر بالاشا كيىندىرىپ، جانىنا ەرتىپ ەركەلەتىپ وسىرگەن ەكەن، سونىڭ ءبارى ءبىر كۇنگىدەي بولماي وتە شىعىپ، دۇنيەنىڭ قاپەلىمدە وزگەرە كەتكەنى ونىڭ ەرتە ەسەيۋىنە قاتتى اسەر ەتكەن سەكىلدى. ءبىر كۇنى بىرگە وقيتىن قىزدار قوياردا-قويماي اۋىل شارۋاشىلىعى ينستيتۋتىندا وتەتىن كەشكە بارايىق دەپ قولقالادى. سول كەشتە جۇزىنەن مەيىرىم نۇرى توگىلگەن اققۇباشا سۇلۋ جىگىتتىڭ راحاتقا كوزى ءتۇسىپ، اينالسوقتاپ جانىنان كەتپەي قويعانى. ءوزى باياناۋىلدىڭ تۋماسى ەكەن، اقىرى راحات ءۇشىنشى كۋرسقا كەلگەندە مۇباراك ەكەۋى قوسى­لىپ تىندى. ودان تۇڭعىشى تالعات دۇنيەگە كەلدى. جارتى جىل كىشكەنتايىمەن مۇباراك جۇمىس ىستەيتىن پاۆلودار وبلى­سىنا قاراستى باياناۋىلداعى سوۆحوزدا ەنەسى ماپىشپەن بىرگە تۇردى. ەنەسى وتە اقىلدى ادام ەكەن: – قاراعىم، وقۋىڭدى تاستاما، تالعا­تىڭدى ءوزىم باعىپ بەرەم، – دەپ كەلىنىن وقۋعا اتتاندىردى. جاس كەلىنشەك كىشكەنتاي ۇلىن ساعىنىپ، كەيدە لەكتسيانىڭ ۇستىندە كونسپەكت جازىپ وتىرعان داپتەرىنە كوزىنىڭ جاسى تامعانىن كورگەن كۋرستاستارى بۇعان جالت-جالت ەتىپ قاراپ قوياتىن. وسى جاعدايدى تۇسىنگەن ەنەسى  كوپ ۇزاماي مۇباراكتى دا كەلىنشەگىنىڭ سوڭىنان جىبەرىپ: – جاسسىڭدار، اش بولساڭدار دا، توق بولساڭدار دا، بىرگە بولىڭدار! سول جاقتان دا جۇمىس تابىلار، – دەپ ۇلىن اتتاندىردى. تاربيەلى قازاق ءۇشىن انانىڭ ءار ءسوزى – زاڭ. وقۋدى بىتىرگەسىن ەڭبەك جولىن قالاداعى «تسەلينەنەرگو» مەكەمەسىندە ۋچاسكەلىك ءدارى­گەر بولىپ باستاعان راحات العاشقى كۇندەر­دەن-اق قاراپايىم ادامداردىڭ العىس-راحمەتىنە يە بولا باستادى. «تسەلينەنەرگو» ول كەزدە وبلىستاعى ەڭ ۇلكەن مەكەمە، ونىڭ اۋرۋحانا، ەمحانا­سىندا جۇزدەگەن ادامدار جۇمىس ىستەيتىن. سولار­دىڭ اراسىندا قازاق ۇلتىنان جالعىز راحات بايقوشقاروۆا ەدى. ەلىمىز تاۋەلسىزدىك تۋىن قاداعاننان كەيىن پرەزيدەنت اكىمشىلىگى، ۇكىمەت، پارلامەنت – اقمولاعا كوشىپ كەلگەسىن، مەديتسينا­لىق ورتالىققا قارايتىن اۋرۋحانا اشىلىپ، ونىڭ باس دارىگەرلىگىنە گەننادي گرودەر تاعايىندالدى. ول بۇرىن «تسەلينەنەرگو­نىڭ» ەمحاناسىندا باسشى، ال راحات ءبولىم مەڭگەرۋشىسى بولعان. راحاتتى وزىنە ەمدەۋ جونىندەگى ورىنباسار ەتىپ تاعايىنداعان دا سول كىسى. وتە ىسكەر، تالاپتى وتە قاتتى قوياتىن مارقۇم گەننادي گەرمانوۆيچتەن باسقارۋ جۇيەسىنە بايلانىستى بۇل كوپ نارسەنى ۇيرەندى. قازىر ول پرەزيدەنت اكىمشىلىگىنىڭ ءىس باسقارماسىنا قاراستى اۋرۋحانانىڭ باس دارىگەرى. الەمدىك مەديتسينا جەتىستىكتەرى 2006 جىلدان مۇندا دا  پايدالانىلا باستا­دى. جوعارى دارەجەلى مەدبيكەلەر مەن ءدارى­گەرلەر ىستەيدى. دەنەنى كەسپەي وپەراتسيا جاساۋ دا وسى اۋرۋحانادا ىسكە اسا باستادى. تەحنيكا عىلىمدارىنىڭ دوكتورى، اكادەميك مۇباراك ادۋوۆتىڭ  سۇيىكتى جارى، تالعات پەن نۇرلاننىڭ ارداقتى اناسى، الديار مەن ءايليننىڭ دۇنيەدەگى ەڭ ادەمى، ەڭ مەيىرىمدى، ەڭ جاقسى اجەسى، ال، مەن سەكىلدى تەڭىز سۋىنا باتىپ كەتە جازداعانداردىڭ قۇتقارۋشى شەڭبەرى – وسى ورتا بويلى، بيداي ءوڭدى ادەمى كەلىنشەك. قۇراندا، ىنجىلدە ايتىلعانداي، ادامنىڭ باسقالارعا جاساعان جاقسىلىعى تابيعاتتىڭ زاڭى بويىنشا وزىنە نە بالا-شاعاسىنا، ءتىپتى ءۇرىم-بۇتاعىنا ەكى ەسە جاقسىلىق بولىپ ورالادى دەگەن قاعيدا راس بولسا، راحات وسەربايقىزىنىڭ بارلىق ۇرپاعى مەيىرىم نۇرىنا بولەنەتىن شىعار. دارىگەردىڭ جۇمىسى سونشالىقتى قيىن دا كۇردەلى ەكەنىن جۇرتتىڭ ءبارى بىردەي بىلە بەرمەيدى. ادەتتە، ادام جانىنا سىرقات ابدەن باتقاندا عانا دارىگەردى تاۋىپ، ول قالايدا قۇتقارۋعا ءتيىستى كىسىدەي مىندەتسي قارايدى. ۇيىنە بارىپ ۇيقىعا كەتەر ۋاقىتتا دا سىرقات ادامدى ويلاپ دارىگەردىڭ مازاسى كەتەتىنىن اركىم بىلسە عوي... ەلىمىزدە وسىنداي جانى جايساڭ ادام­داردىڭ بار ەكەنىن كورگەندە، ءوزىڭدى ماڭگى جاسايتىن ادامداي سەزىنىپ، قانات بىتكەندەي قۋاتتاناتىن ساتتەردىڭ جان راحاتىنا نە جەتسىن، شىركىن!.. شۇكىرشىلىك ەتۋ دەگەن وسى شىعار. فاريزا وڭعارسىنوۆا.
سوڭعى جاڭالىقتار

ءالتىنساريننىڭ ادامي بولمىسى

رۋحانيات • بۇگىن، 00:01

ۋاقىت جاراتقان ۇلى جىر

ادەبيەت • كەشە

ۇقساس جاڭالىقتار