اۋەلدە الاتاۋدىڭ باۋرايىنداعى اسەم قالانى كوپشىلىككە اياقاستىنان قيىپ كەتۋ مۇمكىن ەمەستەي كورىنگەن. سولاردىڭ قاتارىندا ءوزىم دە بار ەدىم... ءبىر جاعى وسىنداي باققا ورانعان جاسىل قالادا ءوزىم تۋىپ-ءوستىم ەمەس پە؟ باسقا جەردەن ءدال وسىنداي قۇلپىرعان قالا سالۋ قولدان كەلمەيتىن ءىس سەكىلدى ەدى؟! ۋاقىتتىڭ جىلدامدىعىن سەزىنىپ تە ۇلگەرەر ەمەسپىز, مىنە, استاناداي اسەم قالا كوز الدىمىزدا ءوسىپ-وركەندەدى. كوزىڭ سۇيسىنەدى, كوڭىلىڭ ءان سالادى! قازىرگى ەكسپو سالتاناتى كەزىندە ەلىمىزدىڭ باس قالاسىنا ات باسىن بۇرىپ كەلگەن الەم جۇرشىلىعىنىڭ اسەم قالامىز تۋرالى پىكىرلەرىن ەستىگەندە, كوڭىلىڭ ءتىپتى جادىراپ كەتەدى ەكەن. وسىندايدا ءبىر كەزەڭدە تابيعاتى ادام كۇشىن مويىندامايتىن وڭىردەن قالا سالۋ مۇمكىن ەمەس دەگەن وي قۇشاعىندا بولعانىڭ ءۇشىن ۇيالىپ تا قالادى ەكەنسىڭ. اينالىپ كەلگەندە, ازاماتتىعى مەن اسقار تاۋداي ارمانىن ءبىر ارناعا توعىستىرىپ, ارمان قالانى اياعىنان تىك تۇرعىزعان نۇرسۇلتان ءابىش ۇلىنا باسىڭدى ءيىپ تۇرىپ العىسىڭدى جاۋدىرعىڭ-اق كەلەدى!
قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ ەۋرازيانىڭ كىندىگىندە بولاشاقتىڭ قالاسىن سالدى. الەم جۇرتشىلىعىنىڭ وكىلدەرى – دۇنيە ءجۇزىنىڭ نەبىر الپاۋىت مەملەكەتتەرى باسشىلارىنىڭ ءوزى استانانىڭ تورىندە حالىقارالىق مامىلەلەرگە قول جەتكىزىپ, قازاقستاننىڭ داڭقىن ارتتىردى. قازىر الەمدىك ساراپشىلار قاۋىمى استانانى ايماقتاعى دۋباي قالاسىمەن تەڭەستىرىپ جاتىر. بۇدان ون-ون بەس جىل بۇرىن ونداي وي ايتىلار ما ەدى, ويلانىڭىزشى؟ ايتىلسا, وعان ەل سەنەر مە ەدى؟ مىنە, استانا شاھارىنىڭ بۇگىنگى بولمىسى, بۇگىنگى تاڭداۋى ءدال وسىنداي مارتەبەگە يە! وسىندايدا ەلباسىمىز نۇرسۇلتان نازارباەۆتىڭ بولاشاقتى بولجاي بىلگەن كورەگەن ساياساتىنا سۇيسىنەسىڭ.
جالپى, قىزمەت بارىسىندا مەنىڭ ءوز باسىم نۇرسۇلتان ابىش ۇلىمەن سان رەت كەزدەستىم. الايدا, سولاردىڭ ىشىندە ەكى رەت جۇزدەسكەنىم مەنىڭ ەسىمدە ۇمىتىلماستاي بولىپ قالدى... ونىڭ وزىندىك سەبەبى دە جوق ەمەس. ەكى كەزدەسۋدە دە ەلباسىنا اڭگىمە اراسىندا ءوتىنىش ايتىپ ۇلگەرگەنىم بار. ونىڭ ءبىرىنشىسى قازاقستاننىڭ باق-تارىنا قاتىستى ەدى. ول كەزدە ۇيعىر تىلىندەگى گازەتتى باسقارعانىممەن, ءتىلىمدى سىندىرىپ, ۋنيۆەرسيتەتتەگى ورىس تىلىندەگى فاكۋلتەتتى ءبىتىردىم. ءبىلىمىمدى ودان ءارى ماسكەۋدە جەتىلدىردىم. مەنىڭ بار ارمانىم – ءوزىمىزدىڭ ءال-فارابي اتىنداعى قازمۋ-ءدىڭ وسى فاكۋلتەتىنىڭ جانىنان ۇيعىر ءبولىمىن اشۋ ەدى.
تالاي ەسىكتى قاعىپ ءجۇرىپ, الداعى 10 جىلدىڭ كولەمىندە قانشا ۇيعىر ءتىلدى جۋرناليست كەرەكتىگىن سارالاپ, ول ءبولىمدى اشتىق تا. ەڭسەمىز ەندى كوتەرىلگەندە, ۋنيۆەرسيتەتتىڭ سول كەزدەگى رەكتورى بالا سانى جەتىمسىز دەگەن سىلتاۋمەن ول ءبولىمدى جاپتى. ءبىر قىزىعى, مەنىڭ ىزىمشە, كورەيلەر مەن نەمىستەر فاكۋلتەت جانىنان سونداي ءبولىم اشىپ العان ەدى. ءىستىڭ ورايى كەلسە جاقسى عوي, ءبىر شارا ۇستىندە نۇرسۇلتان ابىش ۇلىمەن جۇزدەسىپ قالدىم دا, ۋاقىتىنىڭ تاپشىلىعىنا قاراماستان, جايسىز بولسا دا الگى پروبلەمانى جايىپ سالدىم. ەلباسى ءوزىنىڭ اكىمشىلىگىندەگى سالاعا قاتىستى ءبىر ارىپتەسىمدى شاقىرىپ الدى دا, «كەڭسەنىڭ سىرتىندا نە بولىپ جاتقانىن بىلمەيسىڭدەر», دەپ جەدەل تاپسىرما بەردى. جۇرتتىڭ قۋانىشىندا شەك جوق, ءبولىم قايتا اشىلدى.
قازاقستان حالقى اسسامبلەياسىندا جۇرگەن كەزىمدە قازاقستانداعى, ءتىپتى ورتالىق ازياداعى دەيىكشى, جالعىز عانا ۇيعىر تەاترىنا جابىلۋ قاۋپى ءتوندى. ەلباسى الماتىعا ساپارمەن كەلگەندە, اسسامبلەيانىڭ جۇمىسىمەن تانىستى. سونداي ءساتتى پايدالانىپ, تەاتردىڭ باسىنا تونگەن قاۋىپ بۇلتى تۋرالى تاپتىشتەپ باياندادىم. مۇقيات تىڭداعان نۇرسۇلتان ءابىش ۇلى سول جەردە سالا قىزمەتكەرلەرىنە تاپسىرما بەردى. تەاتردىڭ جاڭا تۇرپاتتا اشىلۋ سالتاناتىنا ءوزى كەلىپ قاتىساتىنىن ەسكەرتتى. راسىندا دا, كەيىن تەاتردىڭ العاشقى ساحنالىق قويىلىمىنا نۇرسۇلتان ءابىش ۇلىنىڭ ءوزى كەلدى. بىرەگەي ونەر وتاۋىنىڭ قىزمەتىنە, قازاق ونەرىندەگى ونىڭ الار ورنىنا توقتالىپ, وڭ باعاسىن بەردى.
قانداي ءبىر ساتتە ەلىمىزدەگى ازاماتتاردىڭ مۇقتاجىنا, قاجەتىنە ايرىقشا كوڭىل ءبولىپ, ونىڭ ورىندالۋىن مۇقيات نازاردا ۇستايتىن ەلباسىنىڭ وسى ءبىر قاسيەتتەرىنە مەن ءوز ومىرىمدە وسىلايشا كۋا بولعان جايىم بار. كۇن ساناپ قۇلپىرىپ, قاناتىن كەڭگە جايىپ كەلە جاتقان ايشىقتى استانانىڭ ءسان-سالتاناتىن كورگەن سايىن, شاھار سالۋداعى نۇرسۇلتان ءابىش ۇلىنا عانا ءتان مۇقياتتىلىق نىشانىن انىق اڭعارامىن.
يۋلداش ازاماتوۆ,
«قازاق گازەتتەرى» جشس
باس ديرەكتورى – رەداكتورلار كەڭەسى توراعاسىنىڭ كەڭەسشىسى
