استاناعا ەڭ العاش بەيجىڭ وليمپياداسىنىڭ الدىندا بارعانىم ەسىمدە. ول كەزدە ەلوردامىز ەندى-ەندى سالىنىپ, قۇرىلىسى قارقىن الىپ كەلە جاتقان بولاتىن. تال-تەرەك, اعاش, گۇل اتاۋلى كەمشىن ەدى. ال بۇگىنگى استانا مەن 2008 جىلعى استانانى سالىستىرۋ قيىنداۋ بولاتىن شىعار. استاناعا ءار بارعان سايىن قاناتتانىپ, مارقايىپ قايتامىز. ويتكەنى, ەۋرازيا توسىندەگى بۇل شاھار بۇگىندە ەلىمىزدىڭ ماقتانىشىنا عانا ەمەس, الەم نازارىنداعى قالالاردىڭ بىرىنە اينالىپ وتىر.
استانا جىل وتكەن سايىن جاڭارىپ, كۇن وتكەن سايىن كوركەيىپ كەلەدى. سپورتشى بولعاننان كەيىن شەت مەملەكەتتەرگە كوپ شىعامىز, جارىستارعا بارامىز. سوندا وزگە ەلدەگى ارىپتەستەرىم: «استانا – سونداي ادەمى شاھار. ۇلتتىق ۇلگىدەگى عيماراتتارى قانداي! از عانا ۋاقىتتىڭ ىشىندە وسىنداي كەرەمەت قالانى قالاي سالىپ ۇلگەردىڭىزدەر؟» دەپ تاڭدانىستارىن ءبىلدىرىپ جاتادى. ءوز ەلىڭ, ءوز جەرىڭ تۋرالى جىلى لەبىز ەستۋدىڭ ءوزى ءبىر عانيبەت.
بيىل, مىنە, ءبىزدىڭ ەلوردامىزدا حالىقارالىق ەكسپو كورمەسى ءوتىپ جاتىر. بۇگىندە بۇكىل الەم استاناعا كوز تىگىپ وتىر دەسەك قاتەلەسپەسپىز. مۇنداي دۇنيەجۇزىلىك دەڭگەيدەگى شارانى وتكىزۋ – ەلوردانىڭ عانا ەمەس, ەلدىڭ ابىرويى, ەلباسىنىڭ مارتەبەسىنىڭ اسقاقتاعانى دەپ بىلەمىن.
بارشا قازاقستاندىقتى, شىعىسقازاقستاندىق جەرلەستەرىمدى استانا كۇنى مەرەكەسىمەن قۇتتىقتايمىن! ەلىمىز ءوسىپ, وركەندەي بەرسىن!
ولگا رىپاكوۆا,
وليمپيادا چەمپيونى
وسكەمەن
