3 شىلدە كۇنى اشىلعان فەستيۆالدە جانعالي ءجۇزباي, ايگۇل ۇلكەنباەۆا, سەرجان شاكىراتوۆ سىندى كۇيشىلەر, «تۇران» ەتنو-فولكلورلىق ءانسامبلى, ەركىن شۇكىمانوۆ, ەرلان رىسقالي, كلارا تولەنباەۆا سىندى انشىلەر, قوبىزشى سايان اقمولدا, تاعى دا باسقا قازاقستاندىق ءداستۇرلى مۋزىكانىڭ مايتالماندارى ونەر كورسەتتى. كورەرمەن قاۋىم قۇمىق جىرشىسى زۋگانات چۋناەۆا, تۋۆادان كەلگەن ونەرپاز نيكولاي وورجاك, مونعوليالىق سىبىزعىشى باۋىرجان مۇحامەتباي, ازەربايجاندىق ارسىلان نوۆراسلى جانە باسقا دا حاس شەبەرلەردىڭ ونەرىنە قول سوقتى.
– «استانا – ارقاۋ» – تۇركى حالىقتارىنىڭ تامىرى تەرەڭدە جاتقان مۋزىكالىق مۇرالارىن دامىتۋعا, تۋىستاس حالىقتاردىڭ اراسىندا مادەني بايلانىس ورناتۋعا باعىتتالعان شارا, – دەيدى ۇيىمداستىرۋشىلار.
تۇرىك مادەنيەتىن جاڭعىرتۋعا, ۇلتتىق ءداستۇردى ناسيحاتتاۋعا, حالىق بىرلىگىن نىعايتۋعا ۇلەس قوسىپ جاتقان شارا بيىل ونىنشى جىل قاتارىنان ۇيىمداستىرىلعانىن اتاپ وتكەن ءجون.
ايبىن اقپاتشا
