اتالعان شارا اياسىندا جازعى ترانسفەردە كلۋب ساپىن تولىقتىرعان ەكى جاڭا ويىنشىلارى – لاسلو كلياينحايسلەر مەن مارين توماسوۆتى جانكۇيەرلەرگە تانىستىرۋ ءراسىمىن وتكىزدى. فۋتبولشىلاردى كوماندا جانكۇيەرلەرىنە كلۋبتىڭ اتقارۋشى ديرەكتورى قايسار بەكەنوۆ تانىستىرىپ, رەسمي تۇردە سپورتتىق جەيدەلەرىن تابىستادى.
29 جاستاعى حورۆاتيالىق جارتىلاي قورعاۋشى مارين توماسوۆ «استانا» كومانداسىنا حورۆاتيانىڭ «ريەكا» كومانداسىنان ءبىر جىلدىق جالعا الۋ كەلىسىمشارتىمەن اۋىسقان بولاتىن. مارين حورۆاتيا چەمپيوناتىنىڭ 2015/16 ماۋسىمىندا ۇزدىك فۋتبولشى اتانعان. Transfermarkt.de سايتى توماسوۆتىڭ ترانسفەر قۇنىن ەكى ميلليون ەۋروعا باعالاعان.
ال 23 جاستاعى ۆەنگريالىق جارتىلاي قورعاۋشى لاسلو كلياينحايسلەر «استانا» ساپىنا گەرمانيالىق «ۆەردەر» كومانداسىنان اۋىسىپ كەلدى. لاسلو دا ەلوردالىق كلۋب ساپىندا ءبىر جىلدىق كەلىسىمشارت نەگىزىندە دوپ تەبەتىن بولادى. كلياينحايسلەر ۆەنگريا ۇلتتىق قۇراماسىمەن 13 ويىن وتكىزىپ, ءبىر گول سوققان. 2016 جىلى وتكەن ەۋرو-2016 چەمپيوناتىندا ول اۆستريا قۇراماسىنا قارسى ويىندا ناتيجەلى پاس ۇزاتىپ, ماتچتىڭ ۇزدىك ويىنشىسى اتانعان بولاتىن. لاسلو كلياينحايسلەر وتكەن ماۋسىمدا گەرمانيالىق «دارمشتادت» جانە ۆەنگريا چەمپيوناتىنداعى «فەرەنتسۆاروش» كوماندالارىندا جالدا ويناعان.
سونىمەن قاتار, «فۋتبول استاناسى» جوباسى اياسىندا تەننيسبولدان قالالىق تۋرنير ۇيىمداستىرىلدى. كورەرمەندەر اراسىندا ۆيكتورينالىق سۇراقتار ويناتىلىپ, فريستايلشىلار سايىسى ءوتتى. تەننيسبول تۋرنيرىندە جەڭىمپاز اتانعان, ۆيكتورينالىق سۇراقتار مەن ويىندارعا قاتىسقان جانكۇيەرلەرگە «استانا» فۋتبول كلۋبىنىڭ اتريبۋتكالارىمەن «بالداۋرەن» بالالاردى ساۋىقتىرۋ ورتالىعىنا جولداما تابىستالدى.
شارا سوڭىندا «استانا» كومانداسىنىڭ قاقپاشىسى نەناد ەريچ, قورعاۋشى يگور شيتوۆ, جارتىلاي قورعاۋشسى سردجان گراحوۆاتس جانە كلۋبقا جاڭادان قوسىلعان لاسلو كلياينحايسلەر مەن مارين توماسوۆ جانكۇيەرلەرگە قولتاڭبا بەرىپ, ەستەلىككە سۋرەتكە ءتۇستى.
«استانا» كلۋبى ەرتەڭ قالا كۇنى قارساڭىنداعى مەرەكەلىك كۇنتىزبەگە ەنگەن قازاقستان پرەمەر-ليگاسىنىڭ 20-تۋر اياسىندا قىزىلوردالىق «قايسار» كلۋبىنمەن وينايدى.
ايتا كەتەيىك, «استانا» 12-شىلدە كۇنى چەمپيوندار ليگاسىنىڭ ەكىنشى ىرىكتەۋ كەزەڭى اياسىندا سىرت الاڭدا لاتۆيالىق «سپارتاكس يۋرمالا» كومانداسىمەن ماتچ وتكىزەدى.
ءالي بيتورە,
«ەگەمەن قازاقستان»
