اتا-بابالارىمىز سان عاسىرلار بويى ارمانداعان ءتاۋەلسىزدىگىمىزگە قول جەتكىزگەنىمىزگە بيىل 20 جىل تولعالى وتىر. سوناۋ 1992 جىلى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ جارلىعىمەن قۇرىلعان ۇقك شەكارا قىزمەتى وسى جىلدار ارالىعىندا بيىك بەلەستەردى باعىندىردى. سولاردىڭ باستىلارىنا توقتالار بولساق, 2000-شى جىلداردىڭ باس كەزىندە ەلىمىزدىڭ ەندىكتەرى بويىنشا بىرنەشە وڭىرلىك باسقارما قۇرىلىپ, جاڭادان اشىلعان شەكارا وتريادتارى مەن شەكارا زاستاۆالارى از ۋاقىت ىشىندە قالىپتاسۋ كەزەڭىن باسىنان وتكەردى. سودان بەرى جاڭا ورتاعا بەيىمدەلىپ ۇلگەرگەن شەكاراشىلار اتادان بالاعا ميراس بولىپ قالعان ۇلان-عايىر جەرىمىزدى كوزدەرىنىڭ قاراشىعىنداي كۇزەتۋدە. ولاردىڭ تۇرمىستىق جاعدايلارىن وڭ شەشۋ ماسەلەسى ەلباسىنىڭ, ۇكىمەتتىڭ ۇنەمى نازارىندا. بۇرىندارى شەكارا شەپتەرىندە جاڭا زامانعا لايىقتالعان شەكارا زاستاۆالارى اشىلسا, ەندىگى كەزەك مەملەكەتتىك شەكارا شەبىن ينجەنەرلىك قۇرىلعىلارمەن قامتاماسىز ەتۋ جۇمىستارىمەن اينالىساتىن ينجەنەرلەرگە دە جەتتى.
مىنە, سونىڭ ايقىن دالەلى, مۇنان بىلاي شەكاراشى ينجەنەر-ساپەرلار الەمدىك ستاندارتقا ساي جاڭا كەشەندى ءمودۋلدى باسپانامەن قامتاماسىز ەتىلەتىن بولادى. ۇقك شەكارا قىزمەتىنىڭ ديرەكتورى, گەنەرال-مايور ن.مىرزاليەۆتىڭ باستاماسىمەن قولعا الىنعان شارا. وسى شارانى ىسكە اسىرۋ ماقساتىندا بيىلعى جىلدىڭ ىشىندە ۇقك شەكارا قىزمەتى «مودۋل» كەشەندى-ءوندىرىس بىرلەستىگى» اكتسيونەرلىك قوعامىنا 150-گە جۋىق ءمودۋلدى باسپانا جاساۋعا تاپسىرىس بەرگەن بولاتىن. لايىقتى باعاسىن بەرۋ كەرەك, اتالمىش مەكەمە وزدەرىنە ارتىلعان سەنىم ۇدەسىنەن شىعا ءبىلدى. ناتيجەسىندە, كۇنى كەشە ۇقك شەكارا قىزمەتى ورتالىق جوندەۋ زاۋىتىنا كەشەندى جىلجىمالى مودۋلدەردىڭ العاشقى لەگى جەتكىزىلدى. اتالمىش ورتالىق زاۋىتتىڭ ديرەكتورى, پولكوۆنيك ي.دورونكين قابىلداپ العان جىلجىمالى مودۋلدەردە شەكاراشىلاردىڭ قىزمەتى مەن تۇرمىس-تىرشىلىگىنە قولايلى جاعدايلار تولىق جاسالعان. اتاپ ايتار بولساق, وسىعان دەيىن دالالىق شاتىرلاردى ۋاقىتشا باسپانا ەتىپ كەلگەن ينجەنەرلەردىڭ بازاسى 18 مودۋلدەن تۇراتىن كەشەنمەن الماستىرىلدى. ءار مودۋل امبەباپ قىزمەت اتقارادى. ماسەلەن, ءبىر مودۋلدە اسحانا, اس ءۇي بولسا, مۇندا ءتىپتى كىشىگىرىم ناۋبايحانا دا بار, ەكىنشىسى جاتىن جايعا لايىقتالىپ قۇراستىرىلعان. ءۇشىنشىسى اقپارات جانە تاربيە جۇمىستارى ءبولمەسىنىڭ قىزمەتىن اتقارادى. مۇنان ءارى, كەڭسە, شەكاراشىلاردىڭ تۇرمىس جاعدايىنا ارنالعان بولمە بولىپ جالعاسا بەرەدى. ءبىر مودۋلدە قالعاندارىن ەلەكترمەن قامتاماسىز ەتەتىن ديزەلدى قۇرىلعى ورناتىلعان. ءبىر سوزبەن ايتقاندا, 18 مودۋلدەن تۇراتىن جاڭا كەشەن جىلدىڭ ءۇش مەزگىلىن شەكارا شەبىندە ءوتكىزەتىن ينجەنەرلەر ءۇشىن تاپتىرماس باسپاناعا اينالماق.
سونىمەن, جىلجىمالى سۋ جاڭا كەشەندەر الدىمەن ەلىمىزدىڭ باتىستاعى شەكارا شەبىنە قاراي جول تارتتى. شەكاراشىلاردى باسپانالى ەتكەن «مودۋل» كەشەندى-ءوندىرىس بىرلەستىگى» اكتسيونەرلىك قوعامىنىڭ تەحنيكالىق ديرەكتورى ا.تيمچەنكونىڭ ايتۋىنشا, ءبۇگىنگى پايدالانۋعا بەرىلگەن جىلجىمالى كەشەندەر ۇلكەن ءىستىڭ باستاماسى, قالعاندارى الداعى ۋاقىتتا تولىق دايارلانىپ بولعان سوڭ شەكارا شەپتەرىنە جىبەرىلەدى. قازاقستان رەسپۋبليكاسى تاۋەلسىزدىگىنىڭ 20 جىلدىعى قارساڭىندا وسىناۋ اۋقىمدى جوبا شەكاراشىلارعا جاسالعان تاماشا تارتۋ بولدى.
مەملەكەتتىك شەكارا كۇزەتىنە قاجەتتى مۇنداي جوبالار الداعى ۋاقىتتا دا جالعاسىن تابا بەرەدى.
«ەگەمەن-اقپارات».
