نۇرسۇلتان نازارباەۆ ءاربىر قازاقستاندىق ءۇشىن مەملەكەتتىك تۋ ەرەكشە ماڭىزعا يە ەكەنىن ايتىپ, ەلىمىزدىڭ تاۋەلسىزدىك جىلدارىندا ابىرويلى دامۋ جولىنان وتكەنىنە توقتالدى.
– ءبىز ەلوردا كۇنى قارساڭىندا مەملەكەتتىك تۋىمىزدى كوتەرۋ ءراسىمىن ءداستۇرلى تۇردە وتكىزىپ كەلەمىز. 25 جىل ىشىندە ءبىز قازاقستاندى ءبىر تۋدىڭ استىنا بىرىككەن ءبىرتۇتاس ۇلت رەتىندە قالىپتاستىرا الدىق, – دەدى مەملەكەت باسشىسى.
ەلباسى قازاقستاننىڭ جاھاندىق تەحنولوگيالىق دامۋدىڭ الدىڭعى شەبىنەن تابىلۋعا ۇمتىلاتىنىن ايتىپ, ەلىمىزدىڭ ەكونوميكا جانە سپورت سالالارىنداعى جەتىستىكتەرىنە ەرەكشە توقتالدى.
– قازاقستاننىڭ كوك بايراعى الەمنىڭ كوپتەگەن ءىرى ارەنالارىندا ۇلتتىق جەڭىسىمىزدىڭ سالتاناتىندا جەلبىرەيدى. ءبىز ەلىمىزگە دەگەن شىنايى قۋانىش پەن ماقتانىش سەزىمىنە تولى ساتتەرگە الماتىدا وتكەن قىسقى ۋنيۆەرسيادا ويىندارىنىڭ بارىسىندا كۋا بولدىق. اسپان تۇستەس كوك تۋىمىزدىڭ استىندا قازاقستان بۇكىل الەمگە تانىلدى, – دەدى قازاقستان پرەزيدەنتى.
ەلباسى قازاقستاننىڭ جاھاندىق ۇدەرىستەرگە بەلسەندى اتسالىسىپ وتىرعانىنا نازار اۋدارىپ, ەلىمىز حالىقارالىق ارەنادا بىتىمگەرشىلىك قىزمەتتى جالعاستىرا بەرەتىنىن ايتتى.
– ءبىز قاقتىعىسىپ جاتقان تاراپتاردى كەلىسىمگە كەلىپ, تاتۋلاسۋعا شاقىراتىن مەملەكەتكە اينالدىق. سول ارقىلى بەدەلىمىز دە ارتىپ كەلەدى. ءبىز جەر بەتىندە بەيبىتشىلىك ورناتۋ ءۇشىن كۇرەسىپ, يادرولىق قارۋدىڭ جويىلۋىنا اتسالىسۋدامىز. ءبىز سەنىمگە يە بولىپ, ءبىرتۇتاس ءارى تولەرانتتى قوعامدا ءومىر سۇرۋدەمىز. سوندىقتان مۇندا الەمدىك ءداستۇرلى دىندەردىڭ سەزى ءوتىپ وتىرادى, – دەدى مەملەكەت باسشىسى.
نۇرسۇلتان نازارباەۆ بىرلىك ەلىمىزدىڭ ودان ءارى دامۋىنىڭ جانە الدىمىزعا قويعان بارلىق مىندەتتەر مەن باعدارلامالاردى ىسكە اسىرۋدىڭ نەگىزى ەكەنىن اتاپ ءوتتى.
سونىمەن قاتار, ەلباسى استانانىڭ تاۋەلسىز قازاقستان تاريحىنداعى ءرولى مەن ءمانىنىڭ جوعارى ەكەنىن ايتتى.
– استانا – مۇمكىندىكتەرىمىزدىڭ, حالقىمىزدىڭ ۇلىلىعى مەن اۋىزبىرشىلىگىنىڭ نىشانى. ەلوردامىز – ورتالىق ازيا مەن ازيا قۇرلىعىنىڭ مارجانى. ءبىز باس قالامىزدى سۇيەمىز, ال قوناقتارىمىز وعان تاڭىرقاي قارايدى, – دەدى قازاقستان پرەزيدەنتى.
سالتاناتتى ءراسىم بارىسىندا مەملەكەت باسشىسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى ەلىمىزدىڭ جوعارى اسكەري وقۋ ورىندارى – قورعانىس مينيسترلىگى قۇرلىق اسكەرلەرى اسكەري ينستيتۋتىنىڭ, قورعانىس مينيسترلىگى راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ, ۇلتتىق قاۋىپسىزدىك كوميتەتى شەكارا اكادەمياسىنىڭ, ىشكى ىستەر مينيسترلىگى اكادەمياسىنىڭ, ىشكى ىستەر مينيسترلىگى ۇلتتىق ۇلان اسكەري ينستيتۋتىنىڭ, ىشكى ىستەر مينيسترلىگى كوكشەتاۋ تەحنيكالىق ينستيتۋتىنىڭ ۇزدىك تۇلەكتەرىنە وفيتسەرلىك شەندەر تاپسىردى.
قازاقستان پرەزيدەنتى جوعارى اسكەري وقۋ ورىندارىنىڭ بارلىق تۇلەكتەرىنە وتانىمىزعا قىزمەت ەتۋ جانە قازىرگى الەمدەگى ۇدەرىستەر جاعدايىندا ۇلتىمىزدىڭ مۇددەسىن قورعاۋ پارىزى جونىندە ايتتى.
– سىزدەردەن وفيتسەرلىك مىندەتتى مۇلتىكسىز ورىنداۋ تالاپ ەتىلەدى, قايدا جەردە بولماساڭىزدار دا, تۋىمىزدى قورعاپ, ونى بيىكتە ۇستاۋعا تيىسسىزدەر. سىزدەرگە كۇردەلى ءارى جاۋاپتى ميسسيا جۇكتەلەدى, ول – ازاماتتاردىڭ بەيبىت ءومىر ءسۇرۋىن قامتاماسىز ەتۋ جانە ەلىمىزدىڭ ۇلتتىق مۇددەسىن قورعاۋ, – دەدى ەلباسى.
سوڭىندا نۇرسۇلتان نازارباەۆ تۋ كوتەرۋ راسىمىنەن كەيىن ەلوردا كۇنى قۇرمەتىنە ارنالعان مەرەكەلىك ءىس-شارالاردىڭ باستالاتىنىن ايتىپ, بارشا جۇرتتى كەلە جاتقان مەيراممەن قۇتتىقتادى.
