ەلوردا تورىندە وتكەن سالتاناتتى شارا قازاقستان مەن ماداگاسكار ەلدەرىنىڭ ءانۇراندارىن ورىنداۋمەن باستالدى.
– ماداگاسكار ەلىمەن ارامىز الشاق جاتسا دا, وسىنداي اۋقىمدى شارادان قالىس قالماي, ارقا تورىنە كەلىپ, ءوز يدەياسىن, جاڭا تەحنولوگياسىن ۇسىنىپ وتىرعانى ءبىز ءۇشىن ۇلكەن قۇرمەت. مەيمانداردان ءبىر بايقاعانىم, وتە قوناقجاي, باۋىرمال بولىپ كەلەدى. وسى جاعىنان ولار قازاق حالقىنا قاتتى ۇقسايدى, – دەدى اقپارات جانە كوممۋنيكاتسيالار مينيسترلىگىنىڭ جاۋاپتى حاتشىسى جانات قوجاحمەتوۆ.
سونىمەن قاتار, جيىن بارىسىندا ءسوز العان ماداگاسكار رەسپۋبليكاسىنىڭ جاستار ءىسى جانە سپورت ۆيتسە-ءمينيسترى روبەرت راندريانيرينا ءوز ەلىندە ەنەرگيا سۇرانىسى كوبىنەسە اعاش وتىن جانە مۇنايدى پايدالانۋ ارقىلى جۇزەگە اساتىنىن ايتتى.
– ەلىمىزدە ەنەرگيا كوزى كوبىنەسە اعاش وتىن جانە مۇنايدى پايدالانۋ ارقىلى الىنادى. سوندىقتان, جاڭارتىلاتىن ەنەرگيا كوزدەرىن پايدالانۋ جالپى مولشەردىڭ
1 پايىزىن قۇرايدى. گيدراۆليكا, كۇن, جەل جانە بيوگاز سياقتى بالامالى قۋات كوزدەرى قورشاعان ورتاعا زيان تيگىزبەيتىنىن بىلەمىز. ەندى, مىنە, ەكسپو-دا تاجىريبە الماسۋعا كەلدىك. سونىمەن قاتار, ماداگاسكاردا كۇن جىلىنا
2 800 ساعات بويى شۋاعىن شاشىپ تۇرادى. وسىنى ءتيىمدى پايدالانۋ ءۇشىن كۇن پانەلدەرى كوپتەپ ورناتىلىپ, ەلەكتر قۋاتىن وندىرەتىن زاۋىتتار سالىنىپ جاتىر, – دەدى روبەرت راندريانيرينا.
ماداگاسكار رەسپۋبليكاسى استاناعا قانداي ەرەكشەلىكتەرىن الا كەلگەنى كوپشىلىكتىڭ كوكەيىندەگى ماڭىزدى سۇراق بولىپ تۇردى. بۇل رەتتە, دەلەگاتسيانىڭ مۇشەسى رۋتس راسيمباريسون الدىمەن ماداگاسكار ازىرگە گيدروەلەكتريكالىق ەنەرگيانى پايدالانىپ كەلە جاتقانىن, ۋاقىت وتە كەلە «جاسىل ەكونوميكاعا» دا كوشۋ جوسپاردا تۇرعانىن ءمالىم ەتتى.
– كورمەنىڭ باستى تاقىرىبى «بولاشاقتىڭ ەنەرگياسى» دەپ اتالۋىنىڭ استارىندا كوپتەگەن وي جاتىر. بالامالى ەنەرگيا كوزدەرىن دامىتۋمەن قاتار, ەنەرگەتيكاداعى ساپالى وزگەرىستەر جولى, ونى تاسىمالداۋ تاسىلدەرىنە بۇكىل الەم اتسالىسۋى كەرەك. قازىر ماداگاسكاردا قوقىس ماسەلەسى ۇلكەن قيىندىق تۋدىرىپ وتىر. وسىعان بايلانىستى ءبىز سول تۇرمىستىق قالدىقتاردى ءتيىمدى پايدالانىپ, ەنەرگيا كوزىن الۋدىڭ جولىن تاپتىق. جاھان جۇرتشىلىعىنا ەكسپو-2017 كورمەسى ارقىلى وسى ەرەكشەلىگىمىزدى پاش ەتكىمىز كەلەدى, – دەدى دەلەگاتسيانىڭ مۇشەسى.
مادەني باعدارلاما بارىسىندا ماداگاسكاردىڭ تانىمال «Tsienimparihy» مۋزىكالىق توبى ونەر كورسەتتى. بۇل توپ جينالعان قاۋىمدى ءوز ەلىنىڭ ونەرىمەن تانىستىردى. ولار «Jejy voatavo», «Djembe» سەكىلدى ءداستۇرلى اسپاپتارىمەن «Masakany manga/ripe mangoes», «Maitsokely/little green», «Zendana surprised» سەكىلدى تۋىندىلارىن ورىندادى.
ءار ەل ءوزىنىڭ ۇلتتىق قۇندىلىقتارىمەن, سالت-داستۇرىمەن ەرەكشەلەنەدى. مالاگاسيلاردىڭ ۇلتتىق كيىمى, قىزىلدى-جاسىلدى تاقياسى, سونداي-اق, جالاڭ اياق ءجۇرۋى كوپشىلىك نازارىن ەرىكسىز اۋدارتتى. ۇلتتىق كيىمنىڭ اتاۋى – گروفيا. ايتۋىنا قاراعاندا, ارنايى دايىندالعان ماتانى كەپتىرىپ بارىپ, ازىرلەنەدى ەكەن. ال بەلىنە جىبەك ماتا بەلبەۋ رەتىندە تاعىلادى. اياق كيىمسىز ءجۇرۋى ماداگاسكاردىڭ اۋا رايىنا تىكەلەي بايلانىستى.
ماداگاسكار – افريكا قۇرلىعىنىڭ وڭتۇستىك-شىعىسىندا, ءۇندى مۇحيتىندا ورنالاسقان مەملەكەت. الەمدەگى ارالداردىڭ ىشىندە كولەمى بويىنشا ءتورتىنشى ورىندا تۇر. اۋماعى 587,045 شارشى شاقىرىمدى قۇرايدى. 26 ماۋسىم كۇنى تاۋەلسىزدىگىنىڭ 57 جىلدىعى اتالىپ ءوتتى.
