سالتاناتتى راسىمنەن كەيىن بولعان سۇحبات بارىسىندا م.بايمۇحان پولشا باسشىسىنا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ سالەمدەمەسى مەن يگى تىلەكتەرىن جەتكىزدى.
ا.دۋدا قازاقستان پرەزيدەنتىنىڭ ىستىق ىقىلاسىنا ريزاشىلىق پەن العىسىن ءبىلدىردى. سونداي-اق, ول ەلباسىنىڭ بىلتىر تامىز ايىنداعى ۆارشاۆاعا مەملەكەتتىك ساپارى ەكىجاقتى قاتىناستارداعى اسا ماڭىزدى وقيعا بولعانىن جانە ەكىجاقتى ىنتىماقتاستىقتىڭ دامۋىنا قوسىمشا قۋات بەرگەنىن اتاپ ءوتتى.
پولشا پرەزيدەنتىنىڭ ايتۋىنشا, سول كەزدە قول جەتكىزگەن ۋاعدالاستىقتاردىڭ ارقاسىندا بيىلعى 1 قاڭتاردان باستاپ پولياك ازاماتتارىنىڭ قازاقستانعا بارۋ ءۇشىن ۆيزاcىز ساپار شەگۋ ءتارتىبى جانە 29 مامىردان بەرى ەكى ەلدىڭ استانالارى اراسىندا تىكەلەي اۋە قاتىناسى ورناتىلدى. ا.دۋدا ەكىجاقتى ەكونوميكالىق ىنتىماقتاستىقتىڭ ەلەۋلى دامۋى قازاقستان پرەزيدەنتىنىڭ مەملەكەتتىك ساپارىنىڭ اسا ماڭىزدى ناتيجەلەرىنىڭ ءبىرى بولىپ تابىلاتىنىن ريزاشىلىقپەن اتاپ ءوتتى. پولياك مەملەكەتىنىڭ باسشىسى بۇۇ قاۋىپسىزدىك كەڭەسىنىڭ 2018-2019 جىلدارى تۇراقتى ەمەس مۇشەسى بولىپ سايلانۋىنا ۆارشاۆا كانديداتۋراسىن قولداعانى ءۇشىن قازاقستان تاراپىنا العىس ءبىلدىردى.
پولشا پرەزيدەنتىنىڭ پىكىرىنشە, ەكسپو-2017 كورمەسى ءوزارا بايلانىستاردىڭ ودان ءارى دامۋىنا جاڭا سەرپىن بەردى. پولشا دا 2022 جىلى لودز قالاسىندا وسىنداي حالىقارالىق مامانداندىرىلعان كورمەنى وتكىزۋ قۇقىعىنا يە بولۋعا نيەتتى. استاناداعى حالىقارالىق كورمەدە پولياك پاۆيلونى ورناتىلىپ, وندا وتكىزىلەتىن ءىس-شارالاردىڭ قانىقتىرىلعان جوسپارى جاسالعان. ا.دۋدا ەكسپو-2017 اياسىندا وتكىزىلەتىن پولشا ۇلتتىق كۇنىنە قاتىسۋ ءۇشىن قىركۇيەك ايىنىڭ باسىندا قازاقستانعا ساپارىن جوسپارلاپ وتىرعانىن راستادى.
استاناعا ساپارىنىڭ تاعى دا ءبىر سەبەبى, ول قازاقستان – پولشا بيزنەس-فورۋمىنا قاتىسۋ. ونىڭ جۇمىسىنا پولشادان ءىرى قاسىپكەرلەردەن جاساقتالعان توپتىڭ قاتىسۋى كوزدەلۋدە. پولياك مەملەكەتىنىڭ باسشىسى قازاقستان استاناسىنا ساپارىنىڭ شەڭبەرىندە وتەتىن ىسكەرلىك فورۋم ەكىجاقتى ەكونوميكالىق ىنتىماقتاستىقتىڭ دامۋ فاكتورىنا اينالاتىنىنا ءۇمىت ارتاتىنىن ءبىلدىردى.
كەزدەسۋ سوڭىندا پولشا پرەزيدەنتى ا.دۋدا قازاقستان پرەزيدەنتى ن.نازارباەۆقا زور دەنساۋلىق پەن تابىس تىلەكتەرىن جەتكىزۋدى سۇراپ, قازاقستان پرەزيدەنتىمەن قازاق جەرىندە جاقىن ارادا كەزدەسۋىنە ءۇمىت ارتاتىنىن ءبىلدىردى.
«ەگەمەن-اقپارات»
