«جاس كۇنىمدە بەينەت بەر, قارتايعاندا زەينەت بەر» دەيدى دانا حالقىمىز. بولاشاقتى جاستاردىڭ قولىندا دەسەك تە, كەلەشەگىڭنىڭ كەمەل بولۋى ءۇشىن دە قارتتاردىڭ ءرولى زور. وقو, سوزاق اۋدانىنىڭ دا ارداگەرلەرىنىڭ جاسىنان تارتقان بەينەتتىڭ زەينەتىن كورىپ وتىرعان جايى بار. ءبىرى مۇعالىم, ءبىرى اگرونوم, ەندى ءبىرى مەملەكەتتىك قىزمەتتەن زەينەتكەرلىككە شىققان سوزاقتىق اسقار تاۋداي اتالار مەن اق سامايلى اجەلەر بۇگىندە استانا تورىندە ءجۇر. قۇرىلعانىنا 30 جىل تولعان رەسپۋبليكالىق «ارداگەرلەر ۇيىمى» قوعامدىق بىرلەستىگىنىڭ ايماقتىق فيليالدارىنان «ەكسپو-2017» كورمەسىنە العاش بولىپ سوزاق اۋدانىنىڭ قاريالارى قوناق بولعانىن ايتا كەتەيىك.
قىرىق ارداگەردىڭ باسىن قوسىپ, وڭتۇستىكتەن ارقا تورىنە ات تەرلەتىپ كەلگەن سوزاق اۋدانىنىڭ قۇرمەتتى ازاماتى, اۋداندىق ارداگەرلەر كەڭەسىنىڭ توراعاسى قابىلبەك ەسپەنبەتوۆ: ء«بىز كوپتى كوردىك. بىراق, ءدال مۇنداي الەمدىك كورمە, ءمانى زور تاقىرىپتار تالقىلاناتىن بىرەگەي شارا ەلىمىزدە وتەدى دەپ ەشقاشان ويلاماپپىز. ءوزىمنىڭ دە, قاريالاردىڭ دا كورمەدەن العان اسەرى سوزبەن ايتىپ جەتكىزۋگە كەلمەيدى. بارشامىز بولاشاعىمىز قالاي بولار ەكەن دەپ الاڭداپ ءجۇرمىز عوي. ايتسە دە, كەلەشەگىمىزدىڭ كەمەل بولارىنا كورمە ارقىلى كوزىمىز جەتتى. وسى ءىستىڭ باسىندا تۇرعان ەلباسى نۇرسۇلتان نازارباەۆقا ءبارىمىز شەكسىز ريزامىز. ال, بۇعان دەيىن ءوڭىر باسشىسى جانسەيىت تۇيمەباەۆ «ەكسپو-2017» تۋرالى بىزگە ناسيحاتتاپ ايتىپ كەلگەن بولسا, ەندى مىنەكي, ءوز اياعىمىزبەن كەلىپ, كوزىمىزبەن كورىپ, قولىمىزبەن ۇستاۋعا مۇمكىندىك الدىق. سوعان بار جاعدايدى جاساعان وبلىس, اۋدان باسشىلىعىنا ارداگەرلەردىڭ اتىنان العىسىمدى جەتكىزگىم كەلەدى,-دەيدى.
وڭتۇستىك وڭىرىنەن كەلگەن قاريالارىمىز «ەكسپو-2017» كورمەسىنەن بولەك, قۋعىن-سۇرگىن قۇرباندارىنا ارنالعان «الجير» مەموريالدىق مۋزەي-كەشەنىنە بارىپ رەپرەسسيا كەزىندەگى تاريحي اقتاڭداقتاردىڭ كۋاسى بولسا, جۋىردا عانا كۇردەلى جوندەۋدەن وتكەن استانانىڭ سيمۆولى «بايتەرەك» مونۋمەنتى جانە «بەيبىتشىلىك پەن كەلىسىم سارايىمەن» تولىعىراق تانىستى. ولاردىڭ كوبى «الجير» مۋزەيىندەگى جادىگەرلەردىڭ قاتتى اسەر ەتكەنىن ايتسا, ەندى ءبىرى «ەكسپو-2017» كورمەسىندەگى «نۇر الەم» پاۆيلونىنىڭ باسقا مەملەكەتتەردىكىنە قاراعاندا تارتىمدى ءارى ىشىندەگى قۇندى دۇنيەلەر مەن مالىمەتتەردىڭ ۇتىمدى ۇيىمداستىرىلعانىن تىلگە تيەك ەتتى.
نۇرداۋلەت جەڭىس
