تامارا قاسىمقىزى الدىمەن قىزىلجار اۋدانىنداعى بايتەرەك اۋىلىنا كەلدى. وندا مينيستر مەن ايماق باسشىسى قۇمار اقساقالوۆ بىلتىر بوي كوتەرگەن مەكتەپتىڭ جاراقتاندىرىلۋىمەن, «ارۋجان» شاعىن ورتالىعىمەن تانىستى.
بۇرىن وقۋشىلار اۋدان ورتالىعىنا قاتىناپ وقىسا, ەندى جەرگىلىكتى جەردە وقۋعا مۇمكىندىك الىپ وتىر. جۇمىس توبى جەرگىلىكتى فاپ-تى ارالاپ, تۇرعىندارمەن كەزدەستى. وندا الەۋمەتتىك سالادا قولعا الىنعان باعدارلامالار جونىندە اڭگىمەلەندى.
«پرەزيدەنتتىڭ تىكەلەي تاپسىرمىسى بويىنشا زەينەتاقى مەن جاردەماقى 20 پايىزعا كوتەرىلدى. باسقا دا قولداۋلار كورسەتىلىپ جاتىر. مەملەكەتتىك جەكەمەنشىك ارىپتەستىك اياسىندا بالاباقشا, باسقا دا الەۋمەتتىك نىساندار اشۋعا بولادى», دەدى تامارا دۇيسەنوۆا.
ەڭبەك جانە تۇرعىنداردى الەۋمەتتىك قورعاۋ ءمينيسترى اۋدان ورتالىعىندا «جۇمىسپەن قامتۋدىڭ جول كارتاسى-2020» مەملەكەتتىك باعدارلاماسى اياسىندا سالىنعان 18 پاتەرلىك جاتاقحانادا بولدى. مۇندا ىشكى ميگراتسيانى رەتتەۋ باعدارلاماسى شەڭبەرىندە وڭتۇستىك وڭىرلەردەن قونىس اۋدارعاندار تۇرادى.
«قازىر وسىندا تۇرىپ, پاتەردى جالعا الىپ وتىرسىزدار. كەيىن اقشا جيناپ, ءۇي ساتىپ الۋعا بولادى. ەڭ باستىسى – ەڭبەك ەتىپ, اۋداننىڭ, تۇتاستاي العاندا ەلىمىزدىڭ دامۋىنا ۇلەس قوسۋ», دەدى ۆەدوموستۆو باسشىسى.
دەلەگاتسياعا «احمۋددينوۆ» جك-ءى شىعاراتىن ونىمدەر, جۇمىسشىلار ءۇشىن سالىنعان جاڭا ۇيلەر كورسەتىلدى.
«پەتروپاۆل اۋىر ماشينا جاساۋ زاۋىتى» اق-نىڭ باس ديرەكتورى قۋانىش ءبيشىموۆ مينيسترگە ازىرلەنگەن تەحنولوگيالىق جاڭعىرتۋ باعدارلاماسى تۋرالى ايتىپ بەردى. باسشىلىق ەڭبەكاقىنى 35%-عا كوتەرۋدى جوسپارلاپ وتىر. مۇندا ء ۇش جىلدان بەرى ۇشقىر رەجيمدە دۋالدى وقىتۋ جۇيەسى بوىنشا جۇمىس ىستەيدى. ول وندىرىسكە جاس مامانداردى تارتۋعا مۇمكىندىك.
«جاڭا ەڭبەك كودەكسىنە سايكەس مەملەكەت ەڭ تومەنگى ەڭبەككە اقى تولەۋ, ەڭبەك قاۋىپسىزدىگى ستاندارتتارىن بەلگىلەيدى. بۇل ستاندارتتار قاتاڭ باقىلاناتىن بولادى. الەۋمەتتىك پاكەتكە, ەڭبەكتى قورعاۋ قاۋىپسىزدىگى, ەڭبەككە قابىلداۋ مەن جۇمىس رەجيمىنە بايلانىستى قالعان ماسەلەلەر جۇمىسشى وكىلدەرى مەن جۇمىس بەرۋشىلەرگە بەرىلەدى», دەدى ت. دۇيسەنوۆا.
وبلىستىق اكىمدىكتە اكتيۆتىڭ قاتىسۋىمەن 28 ماۋسىم– 1 شىلدە ارالىعىندا وڭىردە وتكەن «اشىق ەسىك» كۇنىنىڭ جۇمىس قورىتىندىلارى شىعارىلدى.
«باستى مىندەت– تۇرعىندارعا اتقارىلىپ جاتقان رەفورمالاردى كەڭىنەن ءتۇسىندىرۋ, ءارتۇرلى ادىستەمەلىك, پراكتيكالىق كومەكتەر بەرۋ», دەدى ءوز سوزىندە مينيستر.
ول 2018 جىلدان ىسكە قوسىلاتىن رەفورمالاردىڭ ماڭىزدىلىعى مەن اۋقىمدىلىعىن اتاپ كورسەتتى. «2017-2020 جىلدارعا ارنالعان قۇنارلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىنا جۇزەگە اسىرۋعا جەرگىلىكتى بيلىكتىڭ نازارىن اۋداردى. داعدارىسقا قارسى شارالاردى كەشەندى جۇرگىزۋگە, جاڭا جۇمىس ورىندارىن اشۋعا جۇمىلا اتسالىسۋعا شاقىردى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى
