ۇلتتىق كۇن اياسىندا ەكسپو قوناقتارىنىڭ نازارىنا تاي مادەنيەتىن جانە ونىڭ تۇرمىس سالتىن بەينەلەيتىن اسەرلى شوۋ ۇسىنىلدى. كورەرمەندەر «حون», «كينناري», «رامايانا ماسكالار» ۇلتتىق بيلەرىن جانە دجو لۋيس قۋىرشاقتارىنىڭ قويىلىمىن تاماشالادى. شوۋ بارىسىندا 2016 جىلعى تايلاند ۆيتسە-ءميسى پينتحيپ «كۆان» وراكحورن حانىم جينالعان جۇرتتى ءوز ەلىنىڭ بيىنە ۇيرەتتى. ول, اسىرەسە, ونەرىمەن ءارى سۇلۋلىعىمەن كوپشىلىكتى ءتانتى ەتتى. بۇدان بولەك, قوناقتارعا تاي ەلىنىڭ بالامالى ەنەرگەتيكا سالاسىنداعى جەتىستىكتەرى, اۋىل شارۋاشىلىعىندا بيوەنەرگەتيكا ءوندىرۋ تەحنولوگيالارى ارنايى بەينەباياندار ارقىلى كورسەتىلدى.
مەرەكەنىڭ رەسمي بولىمىندە تايلاندتىڭ ەنەرگەتيكا ءمينيسترى انانتاپورن كاندجانارات بالامالى ەنەرگيا الۋ جولىندا اۋىل شارۋاشىلىعى قالدىقتارىن قايتا قولدانۋ تاجىريبەسىمەن بولىسۋگە دايىن ەكەندىكتەرىن جەتكىزدى. ء«بىزدىڭ ەنەرگەتيكالىق ساياساتىمىز تۇراقتىلىق پەن تەحنولوگيالىق دامۋعا باعىتتالعان. پاۆيلونىمىز «بارلىق ادامعا ارنالعان بيوەنەرگەتيكا» قۇرىلىمىنا ساي قۇراستىرىلعان. بۇل تايلاند ۇكىمەتىنىڭ ەنەرگەتيكالىق ستراتەگياسىن جۇزەگە اسىرۋعا سەپتىگىن تيگىزىپ قانا قويماي, ءبىزدىڭ جەرگىلىكتى فەرمەرلەرىمىزگە دە كومەكتەسەدى», دەدى ول.
باسقوسۋدا قازاقستان رەسپۋبليكاسى دەنساۋلىق ساقتاۋ ۆيتسە-ءمينيسترى الەكسەي تسوي ەكى ەل اراسىندا تىعىز ديپلوماتيالىق قارىم-قاتىناس ورناعانىن ايتىپ, تاي حالقىنا دەگەن ءىلتيپاتىن اڭگىمەلەدى. «ۇلتتىق كۇندى وتكىزۋ قاتىسۋشىلارعا ءوزىنىڭ مادەنيەتىن, ءداستۇرىن, ءومىر ءسۇرۋ ۇلگىسىن جانە ۇلتتىق تاعامدارىن كورسەتۋگە مۇمكىندىك بەرەدى. تايلاند مەرەكەسى ەكىجاقتى ءتيىمدى ارىپتەستىكتى نىعايتىپ, سول ەلدىڭ بيزنەس قاۋىمداستىعىنا ورتالىق ازيا مەن تمد اۋماعىندا جەتەكشى كومپانيالاردىڭ ءبىرى اتانۋىنا مۇمكىندىك بەرەدى», دەدى ا.تسوي.
تايلاند پاۆيلونى كورمە باستالعالى كوپشىلىك كوڭىلىنەن شىعىپ كەلەدى. حالىقارالىق شارا اشىلعالى بەرى پاۆيلوندى 100 مىڭعا جۋىق ادام تاماشالاپ ۇلگەرگەن ەكەن. 900 شارشى مەتردەن اساتىن تاي ايماعى ويىن-ساۋىق پەن تانىمدىقتى ۇيلەستىرە قۇرىلعان ءۇش كورمە زالىنان تۇرادى. وندا ينتەراكتيۆتى دەمونستراتسيا ارقىلى قانت قۇراعى, ەۆكاليپت, كاۋچۋك, كۇرىش, جۇگەرى, تاپيوكي, كوڭ مەن پالما مايىنان ەنەرگيا الۋ تەحنولوگيالارىمەن تانىسۋعا بولادى. ولار ەكسپو-2017 كورمەسىندە ۇزدىك بەس پاۆيلوننىڭ قاتارىنان كورىنۋدى كوزدەيدى. بۇل ماقساتقا تىڭعىلىقتى دايىندالعاندارى دا كورىنىپ تۇر.
پاۆيلوندا بىرنەشە ۇيىم بولمەلەرىن اشقان. ولاردان تاي مەملەكەتىنىڭ ەكونوميكاسى, قولونەرى, مادەنيەتى مەن ءتۋريزمى تۋرالى بارلىق اقپاراتتى الۋعا بولادى. بۇدان بولەك, تايلاند ينۆەستيتسيالار جونىندەگى كەڭەسى 30 ماۋسىم-5 شىلدە, 11-16 تامىز ارالىعىندا ىسكەرلىك توپتار مەن ينۆەستورلار ءۇشىن شەبەرلىك سىنىپتارىن وتكىزبەك. سونداي-اق, تاي تەاترى, بەينەلەۋ مەن قولونەرىنە ارنالعان سان الۋان مادەني-بۇقارالىق شارالار جوسپارلانعان. جاقىندا مەملەكەتتىڭ ساۋدا مينيسترلىگى ەكسپو-2017 كورمەسىنە تاعى 16 كومپانيا تارتتى. ولار «حالال» ونىمدەرىن تانىستىرادى.
