كىشكەنتاي ءسابيدىڭ ۇلكەن قۋانىش اكەلەتىنى الميساقتان بەلگىلى عوي. ال استانانى ميلليونەر قالا دەگەن مارتەبەلى مەجەگە جەتكىزگەن شاقالاق التى الاشتىڭ بالاسىنىڭ بوركىن اسپانعا اتقىزىپ, قۋانىشقا كەنەلتتى. اقىندار جىردان شاشۋ شاشتى, اكىمدەر سىي-سياپاتىن ۇسىندى. مەملەكەت باسشىسى ن.نازارباەۆ ەلوردا تويىنىڭ باستالعانىن پاش ەتەتىن مەملەكەتتىك تۋدى كوتەرۋ سالتاناتىندا ءسوز سويلەپ, حالىقتان ءسۇيىنشى سۇرادى, اق تىلەگىن جەتكىزدى.
سارىارقانىڭ سالقار توسىندە دۇنيەگە كەلگەن ءسابيدىڭ ەسىمى – سايدا. «سايدا» – اراب تىلىنەن اۋدارعاندا «باقىتتى» دەگەن ماعىنانى بىلدىرەدى. اتا-اناسىنىڭ كوزىن اشىپ كورگەن تۇڭعىشى. اكەسى ولجاس مۇحامەدياروۆ − ەلوردانى ەلەكترمەن قامتۋشى «استانا-رەك» كاسىپورنىندا ەنەرگەتيك. اناسى ارايلىم بولسا «نۇرشاشۋ» بالاباقشاسىنداعى جۇمىسىنان ۋاقىتشا قول ءۇزىپ, سايدانى باعىپ-قاعۋمەن اينالىسۋدا. ەرلى-زايىپتىلار استانادا تانىسقان, استانادا تابىسقان, وسىندا شاڭىراق كوتەرگەن. بۇگىندە جىگىتتىڭ اكە-شەشەسىمەن بىرگە تۇرادى.
استانانىڭ اكىمى اسەت يسەكەشەۆكە راحمەت, كىسىلىگى مول كوشەلى ازامات ەكەنىن ايقىن كورسەتتى. ميلليونىنشى تۇرعىن دۇنيە ەسىگىن اشاتىن ءساتتى توسىپ, ءتۇن ۇيقىسىن بولگەن اكىم كىشكەنتاي سايدانىڭ كىندىگى كەسىلگەن ءتۇنى تاڭ ازانمەن باقىتتى اتا-انانى قۇتتىقتاپ, ەكى بولمەلى پاتەردىڭ كىلتىن ءوز قولىمەن تاپسىرعان-دى. كۇلشەلى كىشكەنتاي قازىر سول قۇتحانادا ءوسىپ جاتىر.
بىلتىر بولعان قۋانىشتى وقيعانى بيىل قايتا قوزعاپ وتىرعانىمىز بەكەر ەمەس. استانانىڭ ميلليونىنشى تۇرعىنى ء بىر جاسقا قادام باسقان تۇستا حابارلاسىپ, جاي-كۇيىن ءبىلىپ, ەلدىڭ اتىنان, ەل گازەتى – «ەگەمەننىڭ» اتىنان قۇتتىقتاعاندى ءجون كورگەن ەدىك.
– سايدانىڭ تۋعان كۇنى قۇتتى بولسىن! تۋعان ساتىنەن باستاپ ەلدىڭ بالاسىنا اينالعان كىشكەنتايدى قۇتتىقتايىق دەپ ارنايى حابارلاسىپ تۇرمىز!
– كوپ راحمەت سىزدەرگە! بىلتىر قۇتتىقتاعان بۇقارالىق اقپارات قۇرالدارىنىڭ اراسىنان ءبىرىنشى بولىپ «ەگەمەن قازاقستان» حابارلاستى,– دەگەن اناسى ارايلىم قۋانىپ قالدى.
اناسىنىڭ ايتۋىنشا, سايدانىڭ دەنساۋلىعى جاقسى, ءتارتىبى ءتۇزۋ. قاتارلاستارىنان قالماي ءوسىپ كەلەدى. تەك اتا-اجەسىنىڭ سۇيىكتى نەمەرەسى بولعان سوڭ ەركەلىگى باسىمداۋ كورىنەدى. بالالارىمەن بىرگە تۇراتىن قاريالار نەمەرەلەرىن بەتىنەن قاقپاي, ەمىن-ەركىن باعىپ-قاعىپ جاتىر ەكەن.
ءسابيى دۇنيەگە كەلگەننەن كەيىن ەرلى-زايىپتىلار ەلدەگى مەديا-تۇلعالارعا اينالىپ كەتە جازداعانىن ايتىپ كۇلەدى. سودان كەيىن بىرنەشە اي بويى جۋرناليستەر ءجيى حابارلاسىپتى, رەسپۋبليكالىق ارنالارداعى توك-شوۋلار مەن باسقا دا باعدارلامالاردىڭ كەيىپكەرىنە اينالىپتى. بۇل ءۇردىس بىرنەشە ايدان كەيىن عانا تولاستاعان ەكەن.
– بۇل − كىشكەنتايىمىزدىڭ نەسىبەسى, اللانىڭ بىزگە بۇيىرتقان باقىتى دەپ بىلەمىز. ءبىر-اق كۇندە ەلگە ايگىلى بولىپ كەتەمىز دەپ كىم ويلاعان؟! ءدال قازىرگىدەي ەسىمىزدە. ايەلىمدى تولعاق قىسىپ, پەرزەنتحاناعا اپارعاندا, ەڭ الدىمەن امان-ەسەن اياق-قولىن باۋىرىنا الۋىن تىلەدىم. باسقا وي مۇلدە بولعان جوق. قاراپايىم قازاقستاندىقتارعا جايلى ءومىر سۇرۋگە جاعداي جاساعان پرەزيدەنتىمىزگە العىسىمىز شەكسىز! قالا باسشىلىعىنىڭ قامقورلىعىنا كوپ راحمەت!– دەيدى اكەسى ولجاس مۇحامەدياروۆ.
سارىارقانىڭ ساۋىرىندا قازىعى قاعىلىپ, كەرەگەسى كەرىلگەن استانانىڭ ميلليونەر قالا اتانىپ, مەگاپوليسكە اينالعانىنا دا ءبىر جىل زاۋلاپ وتە شىعىپتى. الەمدە ميلليونەر قالا كوپ بولعانىمەن, قازاقستان ءۇشىن كوپ ەمەس, ءبىر قولدىڭ ساۋساعىنا دا تولمايدى. الماتىدان كەيىن رەسمي مويىندالعانى وسى استانا بولدى. شىمكەنت تە تىركەلگەن تۇرعىنداردىڭ سانى بويىنشا ميلليونەرلەردىڭ ساناتىنا قوسىلىپ, ۇشتىكتى تۇيىندەپ تۇر.
بولار ەلدىڭ باستى بايلىعى – ادامي كاپيتالى ەكەنىن دامىعان ەلدەر الدەقاشان دالەلدەگەن. ادامي كاپيتالىن دامىتقان, حالقىنا جان-جاقتى جاعداي جاساعان ەلدىڭ عانا كوسەگەسى كوگەرىپ, كوش باستايتىنىن كوزىمىز كورىپ وتىر. ساننان ساپا تۋاتىنىن ەسكەرسەك, اتتوبەلىندەي قازاقتىڭ قاراسىن كوبەيتۋ بۇگىنگى كۇننىڭ باستى مۇراتتارىنىڭ ءبىرى بولۋى حاق! استانانىڭ ميلليونىنشى ازاماتى, كىشكەنتاي سايدانى باسىلىمنىڭ اتىنان ءبىر جاسىمەن قۇتتىقتاۋداعى ءبىر ماقساتىمىز وسى بولدى!
«سايدا» ەسىمى «باقىتتى» دەگەن ماعىنانى بىلدىرەتىنىن ءسوز باسىندا ايتىپ وتتىك. ولاي بولسا, باس قالانىڭ ميلليونىنشى تۇرعىنى اتىنا زاتى ساي بولىپ, باقىتتى ەلدىڭ باستى ورداسىنىڭ باقىتتى ازاماتتارىنىڭ ءبىرى بولىپ ءوسسىن! ءبىزدىڭ تىلەك وسى!
ارنۇر اسقار,
«ەگەمەن قازاقستان»
