گرەكيا پروبلەماسى كارى قۇرلىقتىڭ «باس اۋرۋى» بولۋىنان ءالى دە ارىلار ەمەس. كەشە ەۋرووداق, ەۋروورتالىقبانك, حالىقارالىق ۆاليۋتا قورى سياقتى ۇيىمداردىڭ ساراپشىلارى وعان بەرىلەتىن 8 ملرد. دوللارلىق كەزەكتى ترانشتىق كومەكتى كەيىنگە قالدىرۋ تۋرالى شەشىمگە كەلدى.
ساراپشىلار توبىنىڭ باسشىسى جان كلود يۋنكەردىڭ مالىمدەۋىنشە, ماسەلە گرەكيانىڭ بيلىگىنە تىرەلىپ تۇر. ول ەۋروپالىقتاردىڭ تالابىن تولىق ورىنداۋعا قول جەتكىزە الماي وتىر. اتاپ ايتقاندا, 7,6 پايىزعا بەلگىلەنگەن بيۋدجەت تاپشىلىعى 8,5 پايىزعا, 3,8 پايىزعا بەلگىلەنگەن ەكونوميكانىڭ قۇلدىراۋى 5,5 پايىزعا جەتكەن. وسىنداي جاعدايدا كەزەكتى ترانشتىق كومەكتى بەرۋ ماسەلەسىن شەشۋ 13 قازانعا قالدىرىلدى.
استرونومدار ەرلەدى
وسى كۇندەرى ناقتى عىلىمنىڭ ءتۇرلى سالاسىنداعى جەتىستىكتەر ءۇشىن بەرىلەتىن نوبەل سىيلىعىنىڭ يەگەرلەرىن انىقتاۋ قىزۋ ءجۇرىپ جاتىر. كەشە فيزيكا سالاسىنداعى سىيلىق وسىمەن ءتورتىنشى رەت استرونومدارعا بەرىلەتىنى بەلگىلى بولدى.
ونىڭ يەلەرى اقش-تىڭ كاليفورنيا جانە بالتيمور ۋنيۆەرسيتتەرىنىڭ پروفەسسورلارى سول پەرلمۋتتەر مەن ادام رايەس جانە اۆستراليانىڭ ۇلتتىق ۋنيۆەرسيتەتىنەن برايەن شميدت بولدى. ولار جەر ءجۇزى كەڭەيۋ جىلدامدىعى فەنومەنىن اشقان. سونىمەن بىرگە فيزيولوگيا مەن مەديتسينا سالاسى بويىنشا امەريكالىق بريۋس بويتلەر مەن ليۋكسەمبۋرگتىك جيۋل حوففماندار لاۋرەات اتاندى.
بولىسە الماي جاتقاندارى رەسەي بايلىعى
لوندوندا قۋعىنداعى رەسەيلىك وليگارح ب.بەرەزوۆسكي «سيبنەفت» پەن «رۋسال» كومپانيالارىنداعى ءوزىنىڭ ۇلەسىن ر.ءابراموۆيچتىڭ الداۋىمەن ارزانعا ساتىپ جىبەرگەنىن ايتىپ, ءوزىنىڭ بۇرىنعى ارىپتەسىنەن 5,6 ملرد. دوللار ءوندىرۋدى تالاپ ەتىپ سوتقا شاعىم تۇسىرگەن. سوت پروتسەسى كەشە باستالدى.
ب.بەرەزوۆسكي «سيبنەفتتەگى» ۇلەسىن ءابراموۆيچتىڭ الداۋىمەن 2003 جىلى وعان 1,3 ملرد. دوللارعا ساتىپ جىبەرگەن ەكەن. ال اناۋ بولسا ەكى جىلدان كەيىن بەرەزوۆسكيدىڭ ۇلەسىن «گازپرومعا» ون ەسە ارتىق باعاعا وتكىزىپتى. سونداي-اق «رۋسالداعى» 25 پايىزدىق ۇلەسىن ر.ابراموۆيچ ءوز ارىپتەستەرى ب.بەرەزوۆسكي مەن ب.پاتاركاتسشۆيليگە ايتپاي و.دەريپاسكاعا قىمباتقا ساتىپ جىبەرگەن, سونىڭ كەسىرىنەن انا ەكەۋىنىڭ ۇلەسى تىم ارزانداپ قالعان.
ادىلەتىن سوت ايتادى
ۋكراينانىڭ ەكس-پرەمەر-ءمينيسترى يۋليا تيموشەنكوعا 11 قازاندا سوت ۇكىمى شىعارىلادى دەپ كۇتىلۋدە. وتكەن سەنبى كۇنى سۋديا وعان سوڭعى ءسوز بەرگەندە يۋ.تيموشەنكو دايىندالاتىن ۋاقىتتىڭ مۇلدە از بەرىلگەندىگىن ايتىپ, ونى ايتۋدان باس تارتتى.
ەكس-پرەمەرگە پروكۋرور 7 جىل جازا بەرۋدى سۇراپ وتىر. ايىپتالۋشىنىڭ ءوزى دە, ونىڭ ادۆوكاتى دا ۇكىمنىڭ بوستاندىقتان ايىراتىن جازا بەرۋمەن اياقتالاتىنىنا كونىپ وتىرعان سىڭايلى. ويتكەنى, ولار وزدەرىن بۇرىنعىداي ساياسي تارتىستىڭ قۇربانىمىز دەپ اقتاۋدى قويىپتى. ال بۇرىنعى پرەمەردىڭ جاقتاستارى وزدەرىنىڭ پارمەندەرىن ءالى دە قويار ەمەس. ولار كەشە كەدەرگىگە قويىلعان قاقپانى بۇزىپ كەتتى.
تۋعان ەلدىڭ توپىراعىنا ورالدى
بۇدان 9 اي بۇرىن اقش-تىڭ مايامي شتاتىندا قايتىس بولعان ۆەنەسۋەلانىڭ بۇرىنعى پرەزيدەنتى كارلوس اندرەس پەرەستىڭ ءمايىتى تۋعان ەلىنە جەتكىزىلەتىن بولدى. بۇل ءىستىڭ سوڭىنان ءتۇسىپ, اقىرى ءوز تالابىنا قول جەتكىزگەن مارقۇمنىڭ العاشقى ايەلى بلانكا رودريگەس دە پەرەس ەكەن.
كارلوس پەرەس ۆەنەسۋەلانىڭ 1974-79 جانە 1989-93 جىلدارداعى ەكى دۇركىن پرەزيدەنتى بولعان. 1992 جىلى ەلدە ەكى رەت بيلىككە قارسى كوتەرىلىس بولدى, ونىڭ سوڭعىسىن ەلدىڭ قازىرگى پرەزيدەنتى ۋگو چاۆەس باستاعان. 1993 جىلى وپپوزيتسيا سىبايلاس جەمقورلىققا مالىنعاندىعى ءۇشىن پەرەسكە يمپيچمەنت جاريالاۋعا قول جەتكىزدى. سودان كەيىن ول اقش-قا ەمميگراتسياعا كەتكەن ەدى, ەندى, ءمايىتى ەلىنە ورالاتىن بولدى.
لاڭكەستەرگە توسقاۋىل قويىلاتىن كەز جەتتى
تۇركيا بيلىگى كوبەيىپ كەتكەن لاڭكەستىكتەرگە قارسى شەشىمدى ارەكەتتەرگە شىققان سياقتى. قازىر ەلدىڭ بارلىق تۇكپىرلەرىندە تەررورلىق ۇيىم دەپ تانىلعان كۇرد جۇمىسشى پارتياسىنىڭ مۇشەلەرىن تۇتقىنداۋلار ءجۇرىپ جاتىر.
سونىڭ ىشىندە ىستامبۇل قالاسىندا عانا پارتيانىڭ جەرگىلىكتى ۇياشىقتارىنىڭ مۇشەلەرى دەگەن كۇدىكپەن 83 ادام ۇستالدى. ەلدىڭ پرەمەر-ءمينيسترى تايپ رەدجەپ ەردوعان كەيبىر نەمىس قايىرىمدىلىق قورلارىنىڭ لاڭكەستىك ۇيىمداردى قارجىلاندىراتىنى تۋرالى ءمالىمدەدى. ال گەرمانيا بيلىگى بۇل ايىپتاۋلاردى تۇبەگەيلى تەكسەرەتىنى تۋرالى جاريا ەتتى.
قىسقا قايىرىپ ايتقاندا:
*باحرەيندە بيلىككە قارسى شىققانى ءۇشىن 14 شيت ومىرباقيلىق تۇرمەدە وتىرۋ جازاسىنا كەسىلدى. سونداي-اق كوتەرىلىسشىلەردى ەمدەگەنى ءۇشىن 20 مەديتسينالىق قىزمەتكەرگە 15 جىلدان جازا بەرىلدى. *سيريانىڭ پرەزيدەنت ب.اسادتى قولدايتىن باس ءمۇفتيدىڭ 21 جاستاعى بالاسى ساريا حۋسەيندى كەشە بەلگىسىز بىرەۋلەر اتىپ ولتىرگەن. بۇل ءىس ونىڭ اكەسىنىڭ پرەزيدەنتتى قولدايتىندىعىمەن بايلانىستىرىلىپ وتىر. *اۋعانستان پرەزيدەنتى ح.كارزاي پاكستان وكىمەتىن ەلدەگى سودىرلاردى قولدايدى دەپ اشىق ايىپتادى. رەسمي يسلاماباد ءبىزدىڭ ەل بويىنشا ەكى ءتۇرلى ستاندارت ۇستانۋدا, ءسوز جۇزىندە ول سودىرلاردى قولدامايمىز دەگەنىمەن ءىس جۇزىندە قولداپ وتىر, دەدى ح.كارزاي. *تايلاندتا يۋنەسكو-نىڭ ەسەبىنە ەنىپ, قورعاۋعا الىنعان چايۆاتتحانارام حرامى سۋعا كەتتى. سونداي-اق سۋ تاسقىنى باستالعاننان بەرى 224 ادام شەيىت بولىپ, ملن.-عا جۋىق ادام باسپاناسىز قالعانى بەلگىلى بولىپ وتىر.ينتەرنەت ماتەريالدارى نەگىزىندە ازىرلەندى.
