ءىس-شارا قازاقستان پارلامەنتى سەناتى توراعاسىنىڭ ورىنباسارى سەرگەي گروموۆ پەن رەسەي فەدەرالدىق جينالىسى فەدەراتسيا كەڭەسىنىڭ توراعاسىنىڭ ورىنباسارى يلياس ۋماحانوۆ توراعالىق ەتتى. كوميسسيا ەكى ەلدىڭ جوعارى زاڭ شىعارۋشى ورگاندارىنىڭ جوعارعى پالاتالارى اراسىنداعى ىنتىماقتاستىق تۋرالى كەلىسىمنىڭ نەگىزىندە ارەكەت ەتەدى.
كەڭەستى اشا وتىرىپ, سەرگەي گروموۆ كوميسسيانىڭ سوڭعى توعىز جىلداعى وتىرىستارى ءوزىنىڭ تيىمدىلىگىن كورسەتتى, دەپ اتاپ ءوتتى. «پارلامەنتتىك ىنتىماقتاستىقتىڭ جاڭا دەڭگەيىنە قول جەتكىزىلدى. بىرىڭعاي ەكونوميكالىق كەڭىستىك اياسىندا ءبىزدىڭ ەلدەرىمىزدىڭ زاڭدارىن ۇيلەستىرۋ ماقساتىندا اۋقىمدى ىستەر اتقارىلدى, - دەدى سەناتى توراعاسىنىڭ ورىنباسارى.
وتىرىستىڭ كۇن ءتارتىبى اياسىندا بىرىڭعاي ەكونوميكالىق كەڭىستىك شەڭبەرىندە قازاقستان رەسپۋبليكاسى مەن رەسەي فەدەراتسياسى اراسىنداعى ترانسشەكارالىق ايماقتاردىڭ (اتىراۋ وبلىسى مەن استراحان وبلىسىنىڭ) دامۋى, ترانسشەكارالىق ورال وزەنى باسسەينىنىڭ ەكوجۇيەسىن ساقتاۋ مەن ءبىلىم سالاسىنداعى ىنتىماقتاستىق ماسەلەلەلەرى تالقىلاندى.
سونىمەن قاتار, پارلامەنتشىلەر كوميسسياسىنىڭ 2016 جىلعى 25 قاراشادا سانكت-پەتەربۋرگ قالاسىندا وتكەن توعىزىنشى وتىرىسى شەشىمدەرىنىڭ ىسكە اسۋى بارىسىن, سونداي-اق, قازاقستان رەسپۋبليكاسى پارلامەنتى سەناتى مەن رەسەي فەدەراتسياسى فەدەرالدى جينالىسى فەدەراتسيا كەڭەسىنىڭ اراسىنداعى ىنتىماقتاستىق جونىندەگى كوميسسيانىڭ ون ءبىرىنشى سەسسياسىنىڭ دايىندىق ماسەلەلەرىن قارادى.
قازاقستان تاراپىنان كوميسسيانىڭ جۇمىسىنا اتىراۋ وبلىسىنىڭ اكىمى نۇرلان نوعاەۆ, سەناتورلار: سەرگەي پلوتنيكوۆ, سەرىك بەكتۇرعانوۆ, سارسەنباي ەڭسەگەنوۆ, جەڭىس نۇرعاليەۆ, ولگا پەرەپەچينا, سونداي-اق, ەنەرگەتيكا, ءبىلىم جانە عىلىم مينيسترلىكتەرىنىڭ وكىلدەرى قاتىستى.
كوميسسيانىڭ كەلەسى كەزەكتى, ون ءبىرىنشى وتىرىسى رەسەيدە وتەتىن بولىپ جوسپارلانعان.
