ءوڭىر تۇرعىندارى اۋىلدىق جەردەگى ەلەكتر باعانالارىنىڭ ەسكىرگەنىن, مەديتسينالىق ساقتاندىرۋ جۇيەسى, ايەلدەر گەندەرلىك ساياساتىنىڭ ماسەلەلەرىن قاۋزاپ,ء نازىر تورەقۇلوۆتىڭ تۋىلعانىنا 125 جىل تولۋىن اتاپ ءوتۋ, تۇرعىن ءۇي كەزەگىن جىلجىتۋ جونىندە كومەك سۇرادى. الدىنا كەلگەن ءار تۇرعىننىڭ ماسەلەسىن مۇقيات تىڭداعان ءوڭىر باسشىسى ءتيىستى ورىندارعا تاپسىرمالار بەردى.
قوعامدىق قابىلداۋعا كەلگەن سايرام اۋدانى تەسپە ەلدىمەكەنىنىڭ تۇرعىنى زەينەتكەر جامالبەك پەرنەەۆ اۋىلداعى ەلەكتر باعانالارىنىڭ ەسكىرگەنىن ايتىپ شاعىمداندى.
«اۋىلىمىزداعى ەلەكتر باعانالارى ابدەن توزىپ, قۇلاۋدىڭ الدىندا تۇر. بۇل ماسەلەنى كوتەرىپ, اۋدان باسشىلىعىنا دا شاعىم تۇسىرگەنبىز. الايدا بۇل ماسەلەنىڭ وڭ شەشىمى بولماۋ تۇر»,- دەدى زەينەتكەر.
وبلىس اكىمى اتالعان ماسەلەنىڭ 2018 جىلى ينۆەستيتسيالىق باعدارلاما اياسىندا شەشىلەتىنىن ايتتى.
«سايرام اۋدانى, كولكەنت اۋىلدىق وكرۋگى, تەسپە اۋىلىندا ورناتىلعان 6,254 شاقىرىم ەلەكتر جەلىسى مەن ترانسفورماتور «وڭتۇستىك جارىق ترانزيت» جشس-ءنىڭ تەڭگەرىمىندە. 2016 جىلى «وڭتۇستىك جارىق ترانزيت» جشس-گى ينۆەستيتسيالىق باعدارلاماسى ەسەبىنەن جارامسىز 12 دانا اعاش باعانالارى سىمدارىمەن اۋىستىرىلعان. ال بيىل قوسىمشا 1 دانا قۋاتى 100 كۆا بولاتىن ترانسفورماتور ورناتۋ جوسپاردا بار. 2018 جىلعى ينۆەستيتسيالىق باعدارلاماعا سايكەس تۇرعىنداردى قامتاماسىز ەتۋدەگى 100 كۆا ترانسفورماتوردى 160 كۆا ترانسفورماتورعا, تومەنگى كەرنەۋلى 0,4 كۆ-تىق ەلەكتر باعانالارى مەن قوسا ەلەكتر جەلىسىن تولىعىمەن اۋىستىرۋ جوسپارلانعان», - دەدى جانسەيىت قانسەيىت ۇلى.
مۇنان سوڭ اكىم الدىنا وبلىستىق ايەلدەر كەڭەسىنىڭ ءتورايىمى بايان جاندوسوۆا كىردى. بايان ايتبەكقىزى وڭىرىمىزدەگى ايەلدەر قاۋىمىنىڭ جانە وتباسى قۇندىلىقتارىن ساقتاۋ توڭىرەگىندەگى قوردالانعان ماسەلەلەرگە توقتالدى.
الماتى قالاسىنىڭ تۇرعىنى ءنازىر تورەقۇلوۆ حالىقارالىق قايىرىمدىلىق قورىنىڭ پرەزيدەنتى ءابدىجاپپار ساپارباەۆ قوعام قايراتكەرى ءنازىر تورەقۇلوۆتىڭ تۋىلعانىنا 125 جىل تولۋىن وڭتۇستىك جەرىندە اتاپ ءوتۋدى سۇراندى.
قازاقستاندىق دەنساۋلىق ساقتاۋ قىزمەتكەرلەرىنىڭ سالالىق كاسىپوداعىنىڭ وقو فيليالىنىڭ ءتورايىمى ايانيازوۆا ريتا اۋىلدىق جەرلەردەگى مەديتسينالىق ساقتاندىرۋ جۇيەسىنىڭ ورىندالۋ بارىسىن ءسوز ەتتى.
ال سايرام بالالار ءۇيىنىڭ تۇلەگى لۋيزا ساليمجانقىزى 2013 جىلدان ءۇي كەزەگىنە تىركەلگەنىن, الايدا باسپاناعا قول جەتكىزە الماي وتىرعانىن جانە كۇيەۋىنىڭ جۇمىسسىز جۇرگەنىن ايتىپ شاعىمداندى. كەزدەسۋ بارىسىندا اكىم شاعىمدانۋشىعا جىل سوڭىنا دەيىن پاتەر بەرىلەتىنىن مالىمدەپ, جۇمىسسىز جۇرگەن وتاعاسىن جاۋاپتى ازاماتتارعا ەڭبەكپەن قامتاماسىز ەتۋدى تاپسىردى.
