قازاقستاندىق كلۋبتاردان ەۋرودودا باسەكەسىن ءبىرىنشى بولىپ پاۆلودارلىق «ەرتىس» باستاپ بەردى. ءبىرىنشى اينالىمدا بولگاريالىق «دۋناۆ» كومانداسىن ءوز الاڭىندا قابىلداعان كەرەكۋلىكتەر 1:0 ەسەبىمەن جەڭىسكە جەتتى. ويىنداعى جالعىز گولدىڭ اۆتورى پاۆلودارلىق كلۋبقا جاڭادان اۋىسىپ كەلگەن مولدوۆالىق شابۋىلشى يگور بۋگاەۆ بولدى. قارىمتا كەزدەسۋ 6 شىلدەدە بولگاريادا وتەدى.
ال, «قايرات» كلۋىبى ءوز الاڭىندا «اتلانتاس» كومانداسىن قابىلداپ, قارسىلاستار قاقپاسىنا جاۋاپسىز التى گول سوقتى. الماتىنىڭ ورتالىق ستاديونىندا وتكەن ويىننىڭ 21-ءشى مينۋتىندا جەرار گوۋ ەسەپ اشسا, اراعا بەس مينۋت سالىپ اندرەي ارشاۆين پەنالتيدەن گول سوعىپ, ەسەپتى ەسەلەي ءتۇستى. 30-شى مينۋتتا الاڭعا شىققان يۆو يليچەۆيچ, تابلوداعى كورسەتكىشتى 3:0-گە جەتكىزدى. ءبىرىنشى تايم اياقتالار تۇستا ارشاۆين ءوزىنىڭ ەكىنشى گولىن سالدى. ەكىنشى تايمدا گوۋ مەن يليچەۆيچ تاعى ءبىر-ءبىر گول سوعىپ, كەزدەسۋدى قورىتىندىلادى. جالپى ەسەپ – 6:0. ايتا كەتەيىك, قارىمتا ويىن 6 شىلدەدە ليتۆادا وتەدى.
ەۋروپا ليگاسىنا قاتىسىپ جاتقان ءۇشىنشى كوماندامىز وكىنىشكە قاراي سىرت الاڭدا جەڭىلىپ قالدى. بوسنيانىڭ «شيروكي بريەگ» كومانداسىمەن ويناعان شىمكەنتتىك «ورداباسى» كلۋبى 2:0 ەسەبىمەن قارسىلاستارىنا جول بەرىپ قويدى. ءبىرىنشى تايمنىڭ 37-ءشى مينۋتىندا قارسىلاس كوماندانىڭ فۋتبولشىسى يۆان كرستانوۆيچ 11 مەترلىك ايىپ سوققىسىن ءساتتى ورىنداسا, تايم اياقتالار تۇستا شابۋىلشى دۋبل اۆتورى اتاندى. «ورداباسى» مەن «شيروكي بريەگ» اراسىنداعى قارىمتا كەزدەسۋ 6 شىلدە كۇنى الماتىنىڭ ورتالىق ستاديونىندا وتەدى.
