مونوگرافيالىق ەڭبەكتەردە قازاق زيالىلارىنىڭ شىعارماشىلىق مۇرالارىن زەردەلەۋ جانە ونى بۇگىنگى كۇنمەن بايلانىستىرا وتىرىپ, جانداندىرۋ ماسەلەلەرى قاراستىرىلعان.
اتاپ ايتقاندا, «الاش جانە ۇلت ادەبيەتى» وقۋ-ادىستەمەلىك قۇرالىندا XX عاسىردىڭ باسىنداعى قازاق ادەبيەتىنىڭ تاريحى مەن دامۋ ۇردىسىندەگى وزىندىك ەرەكشەلىكتەرى, سول كەزەڭدەگى ءتۇرلى ادەبي باعىتتاعى اقىن-ءجازۋشىلاردىڭ ومىرى مەن شىعارماشىلىعى جان-جاقتى سارالانعان.
سونىمەن قاتار, وقۋ قۇرالىندا ستۋدەنتتەردىڭ ءبىلىمىن تەرەڭدەتۋگە ارنالعان تەست تاپسىرمالارى ۇسىنىلعان. كىتاپ جوعارى وقۋ ورىندارىنداعى «XX عاسىر باسىنداعى قازاق ادەبيەتى» ءپانى مەن جالپى ورتا مەكتەپتەردىڭ جوعارى سىنىپتارىندا جۇرگىزىلەتىن «الاشتانۋ» كۋرسىن وقىتۋدا قولدانىلادى.
عىلىمي ەڭبەك اۆتورلارى – پەداگوگيكا عىلىمدارىنىڭ دوكتورى, پروفەسسور تۇرسىناي ابدىقادىروۆا مەن عىلىم ماگيسترى ەدىلبەك ءابدىمومىنوۆ.
ال, قازاقتىڭ داڭقتى پەرزەنتتەرىنىڭ ۇلتتىق ءتىل مادەنيەتى مەن ويلاۋ جۇيەسىنە, ەتنوپەداگوگيكا سالاسىن قالىپتاستىرۋعا جانە ادەبيەت پەن مادەنيەت سالالارىنا قوسقان ۇلەستەرى «الاش جانە ۇلت قايراتكەرلەرى» مونوگرافياسىندا كەڭىنەن قامتىلعان.
كىتاپ اۆتورلارىنىڭ ايتۋىنشا, عىلىمي ەڭبەكتە تاۋەلسىزدىك, حالىقتار بىرلىگى سياقتى قۇندىلىقتار وتكەن عاسىردىڭ باسىنداعى قازاق زيالىلارىنىڭ ەڭبەكتەرىندەگى ورامدى ويلارمەن بايلانىستىرىلا وتىرىپ زەردەلەنگەن.
سونداي-اق, بولاشاق ۇرپاقتى يماندىلىققا, ادامگەرشىلىككە, وتانسۇيگىشتىككە تاربيەلەۋدەگى الاشتىڭ اردا ازاماتتارىنىڭ پايىمدى پىكىرلەرىنىڭ تۇيىندەرى سارالانعان.
– تاۋەلسىزدىك قوعامدىق ومىرگە, الەۋمەتتىك سالالار مەن مادەني-رۋحاني ارنالارعا كوپتەگەن وزگەرىستەر اكەلدى. جاڭاشىل باعىتتار مەن ىرگەلى ىزدەنىستەرگە مۇمكىندىك بەرىلدى. ۇلت تاريحىن تانىپ-تارازىلاۋعا, تانىمال تۇلعالاردىڭ كەزەڭى مەن قىزمەتىن, ءومىرى مەن شىعارماشىلىق مۇرالارىن زەرتتەپ-زەردەلەۋگە جاڭا كوكجيەكتەر اشىلدى. ءبىز ءتول تاريحىمىزدى تولىققاندى تانىپ ءبىلۋىمىز ءۇشىن ەڭ الدىمەن, قازاقتان شىققان بەلگىلى تۇلعالاردىڭ ەڭبەكتەرىن كوپشىلىككە كەڭىنەن ناسيحاتتاۋىمىز قاجەت. بۇل عىلىمي ەڭبەكتەر الاش ارداقتىلارىنىڭ قارىمدى قىزمەتى مەن مۇرالارىن تانىتۋعا سۇبەلى ۇلەس قوساتىن دۇنيەلەر, – دەپ اتاپ ءوتتى تاراز مەملەكەتتىك پەداگوگيكالىق ينستيتۋتىنىڭ اقپاراتتىق-يميدجدىك قىزمەتىنىڭ جەتەكشىسى جاندار اسان.
