سەناتورلار اسكەري ءبولىمنىڭ ماتەريالدىق تەحنيكالىق جاعدايىمەن, اسكەري قىزمەتشىلەردىڭ تۇرمىس-تىرشىلىگىمەن, قارۋ-جاراق جانە بايلانىس قۇرالدارى كورمەسىمەن, سونداي-اق جەدەل ماقساتتاعى بريگادانىڭ جانە «بۇركىت» ارنايى وتريادى جەكە قۇرامىنىڭ جابدىقتالۋىمەن تانىستى.
كوميتەتتىڭ كوشپەلى وتىرىسى بارىسىندا ۇلتتىق ۇلاننىڭ قولباسشىسى گەنەرال-لەيتەنانت رۋسلان جاقسىلىقوۆ «قازاقستان رەسپۋبليكاسى ۇلتتىق ۇلانى تۋرالى» زاڭدى ىسكە اسىرۋ ماسەلەلەرى بويىنشا بايانداما جاسادى.
ەلباسىنىڭ شەشىمىمەن قۇرىلعان 5573 اسكەري ءبولىم ەلورداداعى قوعامدىق قاۋىپسىزدىك پەن ءتارتىپتى قامتاماسىز ەتۋگە ارنالعان.
اسكەري قالاشىقتىڭ ينفراقۇرىلىمى جەكە قۇرامنىڭ كاسىبي شەبەرلىكتەرى جوعارى دەڭگەيدە بولۋىنا مۇمكىندىك بەرەدى. وندا تەحنيكالىق قىزمەت كورسەتۋ ورىندارىمەن جابدىقتالعان اۆتوموبيلدىك پارك, اسكەريلەردىڭ دەنە شىنىقتىرۋىنا مۇمكىن جاعدايلاردىڭ بارلىعى قاراستىرىلعان ەكى قاباتتى سپورت كەشەنى مەن زاماناۋي ۇلگىدە جابدىقتالعان مۋلتيمەديالىق نىسانا كوزدەۋ ءتيرى بار. سونىمەن بىرگە ستاديون, سپورتتىق جانە وقۋ عيماراتتارى, 60 ورىندىق لازارەت جانە 100 ورىندىق امبۋلاتوريالىق ەمدەۋ مەكەمەسى بار.
اسكەري قالاشىقتا وفيتسەرلەر مەن كەلىسىمشارت نەگىزىندەگى اسكەري قىزمەتشىلەر جانە ولاردىڭ وتباسى مۇشەلەرى ءۇشىن 104 پاتەرلى تۇرعىن ءۇي سالىندى.
كوشپەلى وتىرىس بارىسىندا سەناتورلار ۇلتتىق ۇلان تۋرالى زاڭدى جۇزەگە اسىرۋدىڭ وزەكتى تۇستارى مەن اسكەريلەردى الەۋمەتتىك جانە ماتەريالدىق-تەحنيكالىق قامتاماسىز ەتۋگە قاتىستى ماسەلەلەردى تالقىلادى.
