«قازىرگى تاڭدا ەۋرازيالىق لوگيستيكالىق ينفراقۇرىلىمدى دامىتۋعا ەرەكشە كوڭىل بولىنۋدە. جوبانى ىسكە اسىرۋعا «Eurotransit Terminal» جاۋاپكەرشىلىگى شەكتەۋلى سەرىكتەستىگى ىقىلاس تانىتىپ وتىر. ولارعا جوبانىڭ قۇرىلىس جۇمىستارىن جۇزەگە اسىرۋعا 20 گەكتار جەر بەرىلدى», دەيدى اۋدان اكىمى.
قازىرگى ۋاقىتتا زايسان اۋدانىندا گازداندىرۋ جۇمىستارى جۇرگىزىلىپ جاتقانى بەلگىلى. زايسان قالاسىندا سوڭعى ەكى جىلدا 766,4 ميلليون تەڭگەگە ءبىرىنشى كەزەكتەگى ىشكى ورامدىق گاز تاراتۋ جەلىلەرىن ىسكە قوسۋ جۇمىستارى جۇرگىزىلىپتى. وسى ۋاقىتقا دەيىن قالاداعى ءبىر مىڭنان استام تۇرعىن ۇيگە, 12 بيۋدجەتتىك جانە 78 كاسىپكەرلىكپەن شۇعىلداناتىن مەكەمەگە, مەكتەپتەرگە گاز جەتكىزىلىپتى. تەمىربەك قاسىمجانوۆ اۋدان ورتالىعىنداعى تۇرعىن ۇيلەر مەن نىسانداردى گازداندىرۋ جۇمىستارىنىڭ بيىل تولىق اياقتالىپ, اۋداننىڭ ەلدى مەكەندەرىن گازداندىرۋ شارالارى ودان ءارى جالعاساتىنىن ايتتى.
تاعى ءبىر جاعىمدى جاڭالىق, جاقىندا زايسان قالاسىندا 60 پاتەرلى ەكى ءۇيدىڭ قۇرىلىسى باستالادى. اۋداندا قازىر 900-دەن استام ادام پاتەر كەزەگىندە تۇرعان كورىنەدى. ەگەر قوس ءۇيدىڭ قۇرىلىسى مەرزىمىندە اياقتالعان جاعدايدا 120 وتباسىنىڭ باسپانا ماسەلەسى شەشىمىن تاباتىن بولادى. اۋدان اكىمى قازىرگى ۋاقىتتا وڭىرگە كەلگىسى كەلەتىن جاستاردىڭ قاتارى قالىڭ ەكەنىن جەتكىزىپ, سوندىقتان بۇل ماسەلەنىڭ ءتۇيىنىن تەزىرەك تارقاتۋدىڭ ماڭىزدىلىعىنا توقتالدى.
«وتكەن جىلى اۋدان ەكونوميكاسىنا 11 ميلليارد 729,2 ميلليون تەڭگە ينۆەستيتسيا تارتىلدى. اۋدانداعى اۋماقتىق يندۋستريالاندىرۋ كارتاسىنا ءۇش جوبا ەنگىزىلدى. ونىڭ ىشىندە «سمۋ-شىعىس» جاۋاپكەرشىلىگى شەكتەۋلى سەرىكتەستىگىنە قاراستى قۇرىلىس كومبيناتىنىڭ تەمىر-بەتون ونىمدەرىن شىعاراتىن زاۋىتى, «نۇر» شارۋا قوجالىعىنىڭ ەت كومبيناتى جوبالارى بار. كورشى قىتاي ەلىنىڭ ينۆەستورلارى اۋداندا «ەرتىس-تز» ماركالى تراكتور جانە اۋىل شارۋاشىلىعىنا قاجەت ءتۇرلى قۇرىلعىلاردى شىعاراتىن زاۋىتتى ىسكە قوستى», دەگەن اۋدان باسشىسى وتكەن جىلى اۋىلشارۋاشىلىق ونىمدەرىن ءوندىرۋدىڭ جالپى كولەمى 17 ميلليارد 502,1 ميلليون تەڭگەنى قۇراعانىن, مال تۇقىمىن اسىلداندىرۋ باعىتىندا بىرقاتار شارۋالاردىڭ قولعا الىنعانىن تىلگە تيەك ەتتى.
ازامات قاسىم,
«ەگەمەن قازاقستان»
شىعىس قازاقستان وبلىسى,
زايسان اۋدانى
