مەملەكەتتىك حاتشى الدىمەن ەكسپو كورمەسى قالاشىعىندا بىرىككەن ۇلتتار ۇيىمى پاۆيلونىنىڭ تابىستى اشىلۋىمەن قۇتتىقتادى. گۇلشارا ابدىقالىقوۆانىڭ ايتۋىنشا, قورشاعان ورتانى قورعاۋ, گەندەرلىك تەڭدىك, بالالار قۇقىقتارى, جاسىل تەحنولوگيا, ەنەرگەتيكا جانە مەملەكەتتىك قىزمەت سالالارىنداعى بىرلەسكەن جوبالاردىڭ قارقىندى جۇزەگە اسىرىلىپ جاتقاندىعى قازاقستان مەن بۇۇ اراسىندا جاراسىمدى بايلانىس ورنىققانىن ايعاقتايدى.
– ەكسپو كورمەسىنىڭ «بولاشاقتىڭ ەنەرگياسى» تاقىرىبى بىرىككەن ۇلتتار ۇيىمىنىڭ تۇراقتى دامۋ ماقساتتارىمەن ۇندەس. بۇۇ وكىلدەرىنە ەلىمىزدىڭ جاسىل تەحنولوگيالارعا قاتىستى باستامالارىنا قولداۋ بىلدىرگەنىنە ريزاشىلىعىمىزدى بىلدىرەمىز. ەكسپو-2017 كورمەسىنە بەلسەندى قاتىسىپ, سەرپىندى جوبالارىڭىزدى الىپ كەلگەندەرىڭىز – سونىڭ جارقىن كورىنىسى. قازىرگى تاڭدا قازاقستاندا ورنىقتى دامۋ بويىنشا اۋقىمدى جۇمىستار جۇرگىزىلىپ جاتىر. مىسالى, ازيا بانك ۇسىنىسىمەن تۇراقتى دامۋ شەڭبەرىندەگى ماقسات-مىندەتتەردى جۇزەگە اسىرۋ ءۇشىن ۇكىمەت جانىنداعى جۇمىس توبىن قۇرۋدى قولعا الدىق. ونىڭ قۇرامىنا وتاندىق ساراپشىلارمەن قاتار, حالىقارالىق ساراپشىلاردى دا تارتىپ وتىرمىز, – دەدى ول.
ءوزارا ىنتىماقتاستىق دەڭگەيىن جوعارى باعالاعان مەملەكەتتىك حاتشى قازاقستان مەن بۇۇ اراسىنداعى بايلانىس جاڭا كەزەڭگە قادام باسقانىن اتاپ ءوتتى. ەندىگى كەزەكتە ءوزارا قارىم-قاتىناستى باسقا سالالاردا دا دامىتۋ كوزدەلۋدە. اتاپ ايتقاندا, الماتىدا بۇۇ-نىڭ كوپ سالالى ديپلوماتيالىق حابىن قۇرۋ ماسەلەسى قاراستىرىلىپ جاتىر. سونداي-اق, گۋمانيتارلىق كومەك كورسەتۋ, تابيعي اپاتتاردىڭ الدىن الۋ جونىندە باستامالار بار. «وسىنداي ماڭىزدى جوبالاردى جۇزەگە اسىرۋ ءۇشىن بىرلەسە جۇمىس ىستەۋگە ارقاشان دايىنبىز. قازاقستاندا وتباسىلىق جانە گەندەرلىك ساياسات جونىندەگى ارنايى تۇجىرىمداما بەكىتىلىپ, ەكى جىلعا جوسپار ازىرلەندى. قۇجاتتاعى مىندەتتەردى جۇزەگە اسىرۋعا باعىتتالعان بۇۇ-مەن بىرلەسكەن باعدارلاما ءۇش جىلعا جوبالانعان. بۇل جوسپارلار دا ساتىمەن ىسكە اسىرىلاتىنىنا كۇمان جوق», دەدى گۇلشارا ابدىقالىقوۆا.
ال بۇۇ-نىڭ ەۋروپا مەن تمد ەلدەرى بويىنشا دامۋ باعدارلاماسى وڭىرلىك بيۋروسىنىڭ ديرەكتورى جيحان سۇلتانوعلى ءوز كەزەگىندە قازاقستاننىڭ جاسىل تەحنولوگيانى دامىتۋ, قورشاعان ورتانى قورعاۋ جانە باسقا دا كوپتەگەن يگى باستامالارىن قولداۋعا دايىن ەكەنىن جەتكىزدى. ونىڭ ايتۋىنشا, استانادا ءوتىپ جاتقان ەكسپو حالىقارالىق مامانداندىرىلعان كورمەسى − قازاقستانعا قايتالاما ەنەرگەتيكا سالاسىندا سونى جەتىستىكتەرگە جەتۋدىڭ جانە تاجىريبە الماسۋدىڭ ۇلكەن مۇمكىندىگى. «جاسىل تەحنولوگيا – ماڭىزدى سالا. ءبىز ءارى ارزان, ءارى قورشاعان ورتاعا زيانىن تيگىزبەيتىن بالامالى ەنەرگيا كوزدەرىنسىز ورنىقتى ەكونوميكالىق دامۋدى ەلەستەتە المايمىز. بۇل جەردە ەنەرگيا ەشقانداي قوسپاسىز تازا بولۋ كەرەك. ونسىز اينالامىزداعى تابيعاتتى قورعاي المايمىز. سوندىقتان, ەكسپو الاڭىندا تالقىلانىپ جاتقان تاقىرىپ – الەمدىك دەڭگەيدەگى وزەكتى ماسەلە. قازاقستاننىڭ تاڭداعان جولى بۇۇ-نىڭ ورنىقتى دامۋ ماقساتتارىمەن سايكەس كەلەدى», دەدى ول.
قازاقستاننىڭ مەملەكەتتىك حاتشىسى كەزدەسۋ سوڭىندا جيحان سۇلتانوعلىنى بيىلعى جىلدىڭ 31 تامىزى مەن 1 قىركۇيەگى ارالىعىندا ەكسپو-2017 حالىقارالىق كورمەسى اياسىندا وتەتىن «ايەلدەر بولاشاقتىڭ ەنەرگياسى ءۇشىن» حالىقارالىق فورۋمىنا شاقىردى.
قىمبات توقتامۇرات,
«ەگەمەن قازاقستان»
