بۇل ورايدا, وبلىس اكىمدىگى وڭىرلىك تۋريستىك ۇيىمدارمەن بىرلەسىپ, كورمە قوناقتارىنا ارنالعان 3 جانە 5 كۇندىك تۋريستىك باعىتتار ازىرلەپتى. ناقتىراق ايتساق, وڭتۇستىككە كەلگەن قوناقتار تۇركىستان قالاسىندا «ازىرەت سۇلتان» قورىق-مۇراجايىن, ساۋران قالاشىعىن ارالاپ, وتىرار اۋدانىنداعى ارىستان باب كەسەنەسىندە جانە وتىرار قالاشىعىندا بولىپ ەل تاريحىنا قانىعا الادى. سونداي-اق, بايدىبەك اۋدانىنداعى اقمەشىت ۇڭگىرى, دومالاق انا كەسەنەسىنىڭ, قازىعۇرت اۋدانىنداعى «كەمە قالعان» مەموريالدى كەشەنى مەن «ادام اتا-جەر انا» تابيعي ەسكەرتكىشى شەتەلدىكتەردى قىزىقتىرارى انىق. ال تولەبي اۋدانى اۋماعىنداعى «سايرام-وگەم» مەملەكەتتىك ۇلتتىق تابيعي پاركى مەن تۇلكىباس اۋدانىنداعى «اقسۋ-جاباعىلى» مەملەكەتتىك تابيعي قورىقتىڭ ەكولوگيالىق باعىتتاعى ءتۋريزمدى ۇناتاتىندار ءۇشىن بەرەرى مول. ارينە, وبلىس ورتالىعى شىمكەنتتىڭ وزىندە تانىمدىق ەكسكۋرسيا جاسايتىن ورىن كوپ. سايالى اعاشتارىمەن تانىمال دەندروساياباقتا, اۆتورلارى مەملەكەتتىك سىيلىق يەگەرى اتانعان ەرەكشە جوبا – تاۋەلسىزدىك ساياباعى, بايدىبەك بي ەسكەرتكىشى, ناۋرىز الاڭى, جاز ايلارى جاعاسى بوسامايتىن «جايلاۋكول»... تىزە بەرسەك وبلىس ورتالىعىندا قوناقتارعا ماقتان ەتە كورسەتەتىن ورىن كوپ.
ەكسپو-2017 حالىقارالىق كورمەسى قوناقتارىنا ۇسىنىلاتىن تۋريستىك مارشرۋتتاردىڭ بويىنداعى قوناق ۇيلەردىڭ بارلىعى قىزمەت كورسەتۋگە دايىن. سونداي-اق, قوناقتار نازارىنا تۇركىستان جانە وتىراردا ورنالاسقان 2 ەتنواۋىل ۇسىنىلادى.
سونداي-اق, كورمە شەڭبەرىندە تامىزدىڭ 29-ى مەن قىركۇيەكتىڭ 3-ءى ارالىعىندا وڭتۇستىك قازاقستان وبلىسىنىڭ مادەني كۇندەرى وتەدى. وعان 610 ادامنان قۇرالعان 17 شىعارماشىل ۇجىم قاتىسىپ, ونەرلەرىن كوپشىلىككە ۇسىنادى. ونىڭ ىشىندە جەرگىلىكتى 22 قولونەر شەبەرلەرى دە بار.
وڭتۇستىككە كەلۋگە نيەت بىلدىرگەن تۋريستەرگە بارلىق جاعداي جاساپ وتىرعان وبلىس اكىمدىگى حالىقارالىق كورمەگە باراتىن جەرگىلىكتى تۇرعىندارعا دا قولداۋ كورسەتپەك. بۇل ورايدا, استانا قالاسىندا وبلىستان كورمەگە قاتىسۋشىلاردى ورنالاستىرۋ ءۇشىن ەكى ۋنيۆەرسيتەتتىڭ جاتاقحانالارىنان كۇنىنە 600 ورىن الدىن الا الىنىپ قويىلعان. كورمەنىڭ ءوتۋ كەزەڭىنە كولىك قاتىناسى ۇلعايتىلىپ, قوسىمشا ورىندار قاراستىرىلعان. مىسالى, تەمىر جول قۇرامدارى 86 ۆاگونمەن تولىقتىرىلسا, اۋە قاتىناسى بويىنشا قوسىمشا 16 755 ورىن بەرىلىپتى. سونداي-اق, 450 ورىندىق 10 اۆتوبۋس قوسىلاتىن بولادى. وبلىستان 3 750 مەكتەپ وقۋشىسىن, 179 ارداگەر, زەينەتكەر جانە مۇمكىندىگى شەكتەۋلى ازاماتتاردى كورمەگە الىپ بارۋ جوسپارلانعان.
حالىقارالىق كورمەنىڭ تاقىرىبىنا ساي قۋات كوزىن جاڭعىرتۋ بويىنشا وڭتۇستىكتەن 4 جوبا ينتەراكتيۆتى كارتادا تانىستىرىلاتىن بولادى. اتاپ ايتقاندا, وبلىستا ەلەكتر ەنەرگياسىن ءوندىرۋدىڭ تاپشىلىعىن تومەندەتۋ جانە جاڭعىرمالى ەنەرگيا كوزدەرىن قولدانۋ ماقساتىندا جۇزەگە اسىرىلعان سايرام اۋدانىنداعى كۇن ەلەكتر ستانساسى, سارىاعاش اۋدانى كەلەس وزەنىندەگى شاعىن گەس. سونداي-اق, ەلىمىزدەگى جانە سىرتقى نارىقتاعى تۇتىنۋشىلار مەن ءىرى كومپانيالاردى جوعارى ساپالى مايلاۋ ماتەريالدارىمەن قامتاماسىز ەتۋ ماقساتىندا جۇمىس ىستەيتىن, وندىرىستىك قۋاتى جىلىنا 70 مىڭ توننا بولاتىن «Hill Corporation» جشس-ءنىڭ جوباسى ۇسىنىلماق. بيوگاز وندىرەتىن جانە ءارى قاراي ەلەكتر ەنەرگياسىن الۋعا مۇمكىندىك بەرەتىن شوگىندىلەردى وڭدەۋ باعىتىنداعى جوبا دا كورمە قاتىسۋشىلارىنا تانىستىرىلادى. بۇدان بولەك 35 كاسىپورىن ەلوردا تۇرعىندارى مەن قوناقتارىنا اۋىلشارۋاشىلىق ونىمدەرىن ۇسىنباق.
عالىمجان ەلشىباي,
«ەگەمەن قازاقستان»
