اشىق اسپان استىنداعى مۇراجاي تاعى 14 جادىگەرمەن تولىققان. ولاردىڭ قاتارىندا ابىلقايىر مەن قارابۋرا كەسەنەلەرىنىڭ, قاراعاندى سپورت سارايىنىڭ, قازاق مىرىش زاۋىتىنىڭ, «كوسموناۆت» مونۋمەنتىنىڭ, 4 وبلىستىڭ تاريحي ولكەتانۋ مۋزەيىنىڭ ماكەتتەرى بار. تۋريستەرگە كەڭ-بايتاق جەرىمىزدى بارىنشا كورسەتۋ ءۇشىن كەشەن اۋماعىنا قوسىمشا 5 LED ەكران ورناتىلعان.
مۇراجاي گيدتەرى جىل سايىن مەكتەپ وقۋشىلارى اراسىنان ارنايى سىناق ارقىلى ىرىكتەلىپ الىنادى ەكەن. جازعى دەمالىستارىندا قوناقتارعا ەكسكۋرسيا جۇرگىزەتىن ولار كەمىندە ءۇش ءتىلدى مەڭگەرگەن. اعىلشىن تىلىنەن بولەك, فرانتسۋز, نەمىس, قىتاي, تۇرىك, يسپان جانە كورەي تىلدەرىن بىلەتىن جەتكىنشەك-گيدتەر دە بار.
«اتامەكەن» قازاقستان كارتاسى» ەتنومەموريالدىق كەشەنىندە شەتەلدىك مەيمانداردى قازاقتىڭ قوناقجايلىلىعىمەن جاقىنىراق تانىستىرۋ ءۇشىن ءۇش كيىز ءۇي تىگىلىپتى. «ەتنواۋىل قۇرۋدىڭ ماقساتى تەرەڭ. سەبەبى, قازىرگى ۋاقىت پەن ءبىزدىڭ وتكەن تاريحىمىز ۇشتاسقان دەپ تە ايتا الامىن. وسىنداي كەرەمەت ساقتالعان قازاقى ۇيگە كەلگەن ادام تاڭعالاتىنىنا كۇمانىم جوق. اسىرەسە, وزگە ۇلتتارعا ءبىزدىڭ كەشەگىمىز بەن اتا-بابالارىمىزدىڭ تۇرمىس-تىرشىلىگى قىزىقتى دەپ ويلايمىن», دەيدى استانا قالاسى اكىمدىگىنىڭ مادەنيەت, مۇراعات جانە قۇجاتتامالار باسقارماسى باسشىسىنىڭ ورىنباسارى ناريما مۇحامبەتالينا.
اسحات رايقۇل,
«ەگەمەن قازاقستان»
