پارلامەنت سەناتى دەپۋتاتتىعىنا كانديداتتاردىڭ ءبىرى توبى مامليۋت اۋدانىندا بولىپ, اۋداندىق ءماسليحات دەپۋتاتتارىمەن كەزدەسۋ وتكىزدى.
حالىق قالاۋلىلارى الدىندا ايماقتىڭ بۇرىنعى باسشىسى ەرىك سۇلتانوۆ ءوز باعدارلاماسى جايلى جان-جاقتى بايانداپ بەردى. ەرىك حامزا ۇلىنىڭ مەملەكەتتىك ورگانداردىڭ باسقارۋ سالاسىنداعى تاجىريبەسى مول. وڭىرگە جەتەكشىلىك ەتكەن ءۇش جىلدىڭ بەدەرىندە كوپتەگەن جۇمىستار اتقارىلعان.
ۇمىتكەرلەر «سولتۇستىك» الەۋمەتتىك-وندىرىستىك كومپانيانىڭ ديرەكتورى ەسجان ورازالين, وبلىستىق جەر ينسپەكتسياسى باسقارماسىنىڭ باسشىسى مەيرام مەڭدىباەۆا دا سايلاۋالدى باعدارلامالارىمەن ءبولىستى.
سايلاۋشىلار جول جوندەۋ, تۇرعىن ءۇي, مەكتەپ, بالاباقشا سالۋ, شاعىن ەلدى مەكەندەر ماسەلەلەرىنە قاتىستى پروبلەمالاردى ورتاعا سالدى. ءىرى اگروقۇرىلىمنىڭ ديرەكتورى ەركەبۇلان مامبەتوۆ مەملەكەت تاراپىنان جەڭىلدەتىلگەن سۋبسيديا جايى جولعا قويىلعانىمەن, قىسقا مەرزىمگە عانا بەرىلەتىنىن, بۇلاي قارجىلاندىرۋ اۋىلشارۋاشىلىق سالاسى ءۇشىن ءتيىمسىز ەكەنىن جەتكىزدى.
پارلامەنت سەناتى دەپۋتاتتىعىنا كانديداتتار تولعاقتى ماسەلەلەلەر باقىلاۋعا الىناتىنىنا سەندىردى.
ءومىر ەسقالي,
«ەگەمەن قازاقستان»
