الەمدىك دەڭگەيدەگى اۋقىمدى شاراعا قاتىسۋعا مۇمكىندىك العان 37 قىزىلوردالىق تۇرعىننىڭ اراسىندا «قىزىلوردا تازالىعى» مەن «قىزىلوردا سۋ جۇيەسى» مەملەكەتتىك كوممۋنالدىق كاسىپورنىنىڭ ماماندارى دا بار. شىعارىپ سالۋ شاراسىنا ارنايى قاتىسقان قالا اكىمىنىڭ ورىنباسارى نۇرلان ماقسۇتوۆ جولاۋشىلاردىڭ ساپارلارىنا ساتتىلىك تىلەدى.
«ەكسپو-2017 - بارشا قازاقستاندىقتار اسىعا كۇتىپ جۇرگەن ماڭىزدى شارا. ول ءبىلىم مەن يننوۆاتسيالىق سالادا تاجىريبە الماسۋ, مادەني-رۋحاني بايلانىستى نىعايتۋ جانە ىنتىماقتاستىقتى دامىتۋ ماقساتتارىن كوزدەيدى. بەدەلدى شاراعا 100-دەن استام ەل مەن 10-عا تارتا ءتۇرلى باعىتتاعى حالىقارالىق ۇيىم مۇشەلەرى قاتىسۋعا نيەت بىلدىرگەن. وسىنداي ىرگەلى شارانى تاماشالاۋعا مۇمكىندىك العان جاندارعا اقجول تىلەيمىن», دەدى قالا اكىمىنىڭ ورىنباسارى.
ايتا كەتەيىك, بۇعان دەيىن قالا اكىمدىگى مەن «ترانستۋرسەرۆيس-قىزىلوردا» جولاۋشىلار كومپانياسى اراسىندا تاسىمالداۋ جۇمىستارى بويىنشا ارنايى كەلىسسوز جاسالعان ەدى. ناتيجەسىندە كورمەنىڭ ءوتۋ مەرزىمى كەزەڭدەرىندە وبلىس ورتالىعىنان 4 اۆتوبۋس پەن «قىزىلوردا-پەتروپاۆل», «قىزىلوردا-كوكشەتاۋ» جانە «تالگو» جۇردەك پويىزدارى قاتىنايدى دەپ جوسپارلانعان. كورمەگە وڭىردەن تاۋلىگىنە 150-گە جۋىق جولاۋشى بارادى دەپ جوسپارلانىپ وتىر.
