ءدال قازىرگى كەزدە مەديا ورتالىقتاعى جۋرناليستەرگە ارنالعان ۇلكەن ءبىر زال لىق تولى. الەمنىڭ تۇكپىر-تۇكپىرىنەن جانە ەلىمىزدىڭ وڭىرلەرىنەن كەلگەن بۇقارالىق اقپارات قۇرالدارى وكىلدەرىنىڭ تىم كوپتىگىنەن, اككرەديتاتسيا مەن قاتىسۋشىلارعا قىزمەت كورسەتۋ ورتالىقتارىنىڭ زالدارى بوساتىلىپ بەرىلۋدە. ءار زالداعى ارنايى LED ەكرانداردان وتاندىق جانە شەتەلدىك تىلشىلەر الەم كوز تىككەن ەكسپو-2017 كورمەسىنىڭ اشىلۋ سالتاناتىن تاماشالاپ, جازا الادى.
«بىزدە ماسس-مەدياعا ارنالعان 500 ورىن بار ەدى. الايدا, كەلگەن جۋرناليستەردىڭ سانى مىڭنان اسىپ كەتتى. قازىر مۇندا شامامەن 1200 جۋرناليست وتىر. ونىڭ 400-ءى ءوزىمىزدىڭ باق وكىلدەرى بولسا, قالعان 800-ءى – شەتەلدىك تىلشىلەر», دەيدى «استانا ەكسپو-2017» ۇلتتىق كومپانياسى قوعاممەن بايلانىس دەپارتامەنتىنىڭ ديرەكتورى سەرگەي كۋيانوۆ.
الدىن-الا ءمالىم بولعانداي, 19:00-دەن كەيىن ەكسپو ايماعىنا مەملەكەت پەن ۇكىمەت باسشىلارى كەلەدى. ال اشىلۋ سالتاناتى 20:17-گە بەلگىلەنىپ وتىر. س.كۋيانوۆتىڭ ايتۋىنشا, تىكەلەي ترانسلياتسيانى بارلىق قازاقستاندىق ارنالار الىپ وتىر. ال ترانسلياتسيانىڭ تولىق نۇسقاسىن «حابار» اگەنتتىگى مەن «قازاقستان» ۇلتتىق ارناسى كورسەتپەك. بۇدان بولەك, «Astana EXPO-2017» رەسمي سايتى مەن «Youtbe» عالامتور ارناسىنان كورۋگە بولادى. سونىمەن قاتار, تىكەلەي ەفيردى «CNN» مەن «BBC» ارنالارى دا سۇراپ وتىرعان كورىنەدى.
اسحات رايقۇل,
«ەگەمەن قازاقستان»
سۋرەتتى تۇسىرگەن
ەرلان وماروۆ,
«ەگەمەن قازاقستان»
