ەلەكتر قۋاتى ءسونىپ قالدى, پليتكا قۇلادى, كورشى كولىگىن دۇرىس قويمادى, ەمحانادا دورەكىلىك تانىتتى, قۇبىر جارىلدى, توبەلەستىڭ كۋاگەرى بولدىڭىز با؟ ەندى استانالىقتارعا وزدەرىنىڭ تۇرمىستىق ماسەلەلەرىن شەشۋ ءۇشىن بىرنەشە مەكەمەلەرگە حابارلاسۋدىڭ قاجەتى جوق. بار بولعانى, احۋال ورتالىعىنىڭ 109 ءنومىرىن تەرسە, جەتكىلىكتى.
ەلوردانىڭ ديسپەتچەرلىك ورتالىعى ءبىر اي بۇرىن جۇمىسىن باستاعان بولاتىن. وسى ۋاقىت ارالىعىندا تۇرعىندار اراسىندا كەڭ قولدانىلا باستادى. ورتالىق جۇمىسىنىڭ ناتيجەسى مەن قىزمەتتىڭ بولاشاعى تۋرالى ەلوردا اكىمدىگىنىڭ مەديا ورتالىعىنا استانا قالاسى اكىمىنىڭ ورىنباسارى اندرەي لۋكين ايتىپ بەردى.
- بۇگىنگى تاڭدا قالاداعى احۋالدى جەدەل باقىلاۋ ءۇشىن ءۇش مىڭ بەينەكامەرالار ورناتىلعان. سولار ارقىلى بارلىق اقپارات ورتالىققا تۇسەدى. جىل سوڭىنا دەيىن كامەرالار سانىن ون مىڭعا دەيىن جەتكىزۋ جوسپارلانعان. كامەرالار قالانىڭ بارلىق بۇرىشتارىن باقىلايدى. وپەراتوردىڭ مىندەتى احۋالدى قاداعالاپ وتىرۋ, تۇرعىنداردىڭ قوڭىراۋلارى مەن شاعىمدارىنا جاۋاپ بەرۋ. بۇل رەتتە سۇراقتاردىڭ ءارتۇرلى بولاتىنىن ايتا كەتكەن ءجون. بۇل – ينفراقۇرىلىم, تج, ءتۇسىندىرۋ, اقپارات بەرۋ تاعى دا باسقا ماعىنادا بولۋى مۇمكىن. وپەراتورلار تاۋلىك بويى جۇمىس ىستەيدى. ولاردىڭ جۇمىسى شتاتان تىس جاعدايلاردى انىقتاۋ, قۇقىق بۇزۋشىلىقتى بولدىرماۋ, تۇرعىندارعا كومەكتەسۋ, - دەيدى اندرەي لۋكين.
احۋال ورتالىعىندا بارلىق مەملەكەتتىك ورگانداردىڭ وكىلدەرى بولادى. سوندىقتان ولار قىزمەت جۇمىسىنىڭ بارىنشا ءتيىمدى بولۋىن قامتاماسىز ەتەدى.
- مەملەكەتتىك ورگان وكىلدەرى ورتالىقتا تۇراقتى جۇمىس ىستەيدى. ولار دەنساۋلىق ساقتاۋ, ءبىلىم, تۇكش, قۇرىلىس جانە باسقا دا سالا ماماندارى. ماڭىزدىلىعى سول, شتاتتان تىس جاعدايعا نەمەسە ينفراقۇرىلىمعا قاتىستى قانداي دا ءبىر اقپاراتتى العان بويدا بارلىق مالىمەت ءبىزدىڭ احۋال ورتالىعىنداعى جاۋاپتى ماماندارعا جەتكىزىلەدى. مىسالى, دەنساۋلىق ساقتاۋ باسقارماسىنان ءبولىم مامانى بولادى, ول حابارلامانى العان بەتتە ورناتىلعان تەلەفون نەمەسە راتسيا بايلانىسىمەن ۆەدومستۆولىق باعىنىشتى مەكەمەلەرگە تاپسىرما بەرەدى. ەمحانالارعا اۋرۋحانالارعا جەدەل جاردەم ستانتسيالارىنا ت.ب. ولار دا تاپسىرما العان ساتتەن جىلدام ارەكەت ەتەدى جانە بەلگىلەنگەن ۋاقىت رەگلامەنتىنە ساي ماسەلەنى جويادى, - دەيدى لۋكين.
قالا اكىمى ورىنباسارىنىڭ ايتۋىنشا, ەرەجەدە اتالعان ماسەلەلەردى جويۋ مەرزىمى دە كورسەتىلگەن. قوسىمشا رەسۋسرتار قاجەت بولعان جاعدايدا ارىزدانۋشىعا حابارلانادى.
- ەگەر اشىق ليۋك بولسا, ءبىر ساعاتتىڭ ىشىندە قالپىنا كەلۋى ءتيىس. ال, ەگەر باسقا قۇرىلىس كومپانيالارىنىڭ ارالاسۋى قاجەت بولماسا, ايتالىق, ءبىر جەردىڭ پليتكاسى ءتۇسىپ قالسا, جوندەۋگە ەكى ساعات ۋاقىت بەرىلەدى. كەيدە ءتۇرلى تەحنيكالىق سەبەپتەرگە بايلانىستى ۇلگەرمەي جاتامىز, مىسالى, ماتەريالداردى جەتكىزۋ نە بولماسا اۋىستىرۋ قاجەت بولسا, ءبىز ارىزدانۋشىعا ماسەلەنى ايتىپ, تۇسىندىرەمىز, - دەيدى ا.لۋكين.
قالا اكىمى ورىنباسارىنىڭ ايتۋىنشا, تۇرعىندار تاراپىنان ءوتىنىش-تالاپتاردىڭ باسىم بولىگى كوممۋنالدى ماسەلەلەرگە قاتىستى. دەگەنمەن, ءتۇرلى جاعدايدار بولادى.
- OpenAir شاراسى كەزىندە بىزگە بالالارىن جوعالتىپ العاندارى تۋرالى قىرىققا جۋىق حابارلاما ءتۇستى. ياعني, كونتسەرتتى تاماشالاۋعا كەلگەن اتا-انالار بالالارىنا كوز قىرىن سالماعان. ولار ءبىزدىڭ كومەگىمىزگە جۇگىندى, ءبىز سول جەردە جۇرگەن ىشكى ىستەر ورگاندارى, قۇقىقتىق ءتارتىپ, ەرىكتىلەر, ارنايى قىزمەتتىڭ ماماندارى ارقىلى بىردەن كومەككە كەلدىك. سونىڭ ارقاسىندا از ۋاقىتتىڭ ىشىندە بالالاردى تاۋىپ, اتا-انالارىنا تابىستادىق, - دەدى لۋكين.
ورتالىقتىڭ جۇمىس ىستەگەنىنە ءبىر اي عانا بولعانىنا قاراماستان ۇلكەن سۇرانىسقا يە. تۇرعىنداردان بولەك, شەتەلدىكتەر دە باعا تۋرالى نەمەسە باسقا دا انىقتامالىق سۇراقتارعا قاتىستى ءجيى حابارلاسادى. ورتالىقتىڭ وپەراتورلارى التى تىلدە كەڭەس بەرە الادى. تاۋلىك ىشىندە ورتاشا ەسەپپەن 600-گە جۋىق قوڭىراۋ كەلىپ تۇسەدى. اتالعان قىزمەت تۇرىنە الداعى ۋاقىتتا سۇرانىس ارتۋى مۇمكىن.
- قولداعى رەسۋرستار وپەراتورلار مەن تەلەفون جەلىلەرىنىڭ سانىن كوبەيتۋگە مۇمكىندىك بەرەدى. ءبىز وعان دايىنبىز. ورتالىقتىڭ وپەراتورلارىنا بارلىق تۇرمىستىق جاعداي جاسالعان: اسحانا, كيىنەتىن بولمە, ايەلدەر مەن ەرلەرگە ارنالعان جاتاتىن, جۋىناتىن ورىن. مۇندا جۇزدەن استام ادام جۇمىس ىستەپ جاتىر. قاجەت بولعان جاعدايدا ولاردىڭ شتاتتىق كەستە ساي جۇمىس ىستەۋلەرى ءۇشىن تاعى دا ادامداردى جۇمىسقا الاتىن بولامىز, - دەپ تۇيىندەدى ءسوزىن ا.لۋكين.
