«رەسپۋبليكاداعى كاسىپوداقتاردىڭ مىندەتى – جۇمىسشىلاردىڭ قۇقىقتارىن ءتۇسىندىرۋ جانە قورعاۋ. ءبىزدىڭ فەدەراتسيا ەلدىڭ تۇكپىر-تۇكپىرىندە بىلتىر قابىلدانعان جاڭا «ەڭبەك كودەكسى» مەن 2014 جىلى قابىلدانعان ءوزىمىزدىڭ «كاسىپوداقتار تۋرالى» زاڭدى ءتۇسىندىرۋ جۇمىستارىن جۇرگىزۋدە», – دەدى قازاقستان رەسپۋبليكاسى كاسىپوداقتار فەدەراتسياسىنىڭ توراعاسى ابىلعازى قۇسايىنوۆ.
«مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ نەگىزگى مىندەتتەمەلەرىن جۇزەگە اسىرۋ الەۋمەتتىك جاڭارتۋدىڭ كەپىلى», – دەدى كاسىپوداق قوزعالىسىنىڭ وكىلدەرى.
سونىمەن قاتار, فەدەراتسيا توراعاسى مەكەمەلەردىڭ قاراماعىنداعى قىزمەتكەرلەر قۇقىعىن بۇزۋ ماسەلەسى تۋرالى دا پىكىرىمەن ءبولىستى. «قازىرگى ۋاقىتتا جۇمىس بەرۋشىلەردىڭ تاراپىنان جۇمىسكەرلەر قۇقىقتارىنىڭ بۇزىلۋ دەرەكتەرى ازايىپ كەلەدى. ويتكەنى, داۋلاسقان تاراپتار ماسەلەنى زاڭعا جۇگىنە وتىرىپ شەشەتىن بولعان. دەگەنمەن, ءبىز دە بوساڭسىماي, جۇمىسكەرلەر قۇقىقتارىن قورعاۋ مەن ونىڭ بۇزىلۋىنىڭ الدىن الۋ شارالارىن تۇراقتى وتكىزىپ تۇرامىز. ماسەلەن, 2017 جىلدىڭ العاشقى توقسانىنىڭ وزىندە ءبىز رەسپۋبليكا بويىنشا 2 مىڭداي ازاماتتى قابىلدادىق. ولاردىڭ بىزگە ارىزدانىپ كەلگەندە ايتاتىن ماسەلەلەرى نەگىزىنەن جۇمىسقا ورنالاسۋ, نەگىزسىز جۇمىستان قۋىلۋ جانە جالاقىنىڭ ۋاقتىلى تولەنبەۋى. كاسىپوداقتار بۇل ماسەلەلەردىڭ ءبارىن شەشۋگە ءتيىستى مەملەكەتتىك ورگانداردى تارتىپ, ەشبىر ازاماتتىڭ ارىزىن بوس قايتارماۋعا تىرىسادى», – دەدى ابىلعازى قۇسايىنوۆ.
ايتا كەتەيىك, قازاقستاندا جۇمىسشىلار قۇقىقتارىنىڭ بۇزىلۋ دەرەكتەرىنىڭ باسىم كوپشىلىگى جالاقىنىڭ ۋاقتىلى تولەنبەۋى ەكەنى انىق. بۇل, اسىرەسە, جەكەمەنشىك سەكتورعا قاتىستى. وسى ورايدا, كاسىپوداقتار فەدەراتسياسىنىڭ توراعاسى مۇنداي ماسەلەلەر ەڭبەك جانە حالىقتى الەۋمەتتىك قورعاۋ مينيسترلىگىمەن جانە باس پروكۋراتۋرامەن بىرلەسىپ شەشىلەتىنىن ايتتى.
باۋىرجان مۇقانوۆ,
«ەگەمەن قازاقستان»
