وسك سايلاۋ پروتسەسىن ۇيىمداستىرۋ جانە وسك مۇشەلەرىنىڭ قىزمەتىن قامتاماسىز ەتۋ ءبولىمىنىڭ مەڭگەرۋشىسى ماقساتحان ءاناپيننىڭ بايانداۋىنشا, وبلىستىق, استانا جانە الماتى قالالىق سايلاۋ كوميسسيالارى قازاقستان رەسپۋبليكاسى پارلامەنتى سەناتى دەپۋتاتتارىنىڭ 16 مانداتىنا ۇسىنىلعان 89 ۇمىتكەردىڭ ىشىنەن 52 كانديداتتى تىركەدى. تىركەلگەن كانديداتتاردىڭ ىشىندە 47 ەر ادام جانە 5 ايەل ادام بار. كاسىپ توبى بويىنشا 4-ەۋى پارلامەنت سەناتىنىڭ قازىرگى دەپۋتاتتارى, 3-ەۋى ءماسليحاتتاردىڭ دەپۋتاتتارى, 15-ءى مەملەكەتتىك ۇيىمداردىڭ, كاسىپورىنداردىڭ جانە مەكەمەلەردىڭ قىزمەتكەرلەرى, 11-ءى مەملەكەتتىك قىزمەتشىلەر, 16-سى كوممەرتسيالىق قۇرىلىمداردىڭ قىزمەتكەرلەرى بولىپ كەلەدى.
ماماندىعىنا كەلسەك, دارىگەر – 3, ينجەنەر – 16, زاڭگەر − 6, ساياساتتانۋشى – 1, وقىتۋشى – 8, ەكونوميست − 11, اۋىل شارۋاشىلىعى قىزمەتكەرى − 7 , باسقا ماماندىق يەلەرى − 2 ادام. «تىركەۋ بارىسىندا جەكە ءوتىنىشى بويىنشا 17 كانديدات, كىرىستەرى مەن مۇلكى تۋرالى ۇسىنىلعان مالىمەتتەردىڭ سايكەس ەمەستىگى بويىنشا 13 كانديدات الىنىپ تاستالدى, 7 ۇمىتكەرگە قاجەتتى قۇجاتتاردى ۇسىنباۋىنا بايلانىستى تىركەۋدەن باس تارتىلدى, − دەدى ول. − كانديداتتاردىڭ ورتاشا جاسى − 51,5 جاس». بايانداماشىنىڭ اتاپ وتۋىنشە, تىركەلگەن كانديداتتار تىزىمىندە قازىرگى سەناتورلار − ن.قىلىشباەۆ, ج.نۇرعاليەۆ, م.باقتيار ۇلى, ب.شەلپەكوۆ بار. سونداي-اق, كانديداتتار قاتارىنا پارلامەنت ءماجىلىسىنىڭ ەكس-دەپۋتاتى د.نوكەتاەۆا مەن گرەك-ريم كۇرەسىنىڭ حاس شەبەرى ءشامىل سەرىكوۆتىڭ ۇلى تيمۋر سەرىكوۆ تە كىرىپ وتىر.
سونىمەن قاتار, وتىرىستا «2017 جىلعى 28 ماۋسىمعا تاعايىندالعان قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋعا سايلاۋ بيۋللەتەندەرىن دايىنداۋ تۋرالى» قاۋلى قابىلداندى. قاۋلىعا سايكەس وبلىستىق, استانا جانە الماتى قالالىق سايلاۋ كوميسسيالارىنا ءتيىستى اكىمشىلىك-اۋماقتىق بىرلىك تاڭداۋشىلارىنىڭ سانىنا سايكەس سايلاۋ بيۋللەتەندەرىن دايىنداۋ تاپسىرىلدى. بۇدان بولەك, وتىرىستا «2017 جىلعى 28 ماۋسىمعا تاعايىندالعان پارلامەنت سەناتىنىڭ دەپۋتاتتارىن سايلاۋدى وتكىزۋ كەزىندە ورتالىق سايلاۋ كوميسسياسى ينتەرنەت-رەسۋرسىنىڭ فۋنكتسيونالىن پايدالانۋ رەگلامەنتىن بەكىتۋ تۋرالى» قاۋلى دا قابىلداندى.
بۇل جوبا سايلاۋ جۇيەسىن تسيفرلاندىرۋ شەڭبەرىندە ەلەكتوراتتىق پروتسەستەردى بايقاۋدىڭ نەعۇرلىم كەڭ مۇمكىندىكتەرىن بەرۋ ءۇشىن ازىرلەنگەن. ەلەكتروندى تىركەۋ تاڭداۋشىلاردىڭ كەلۋى تۋرالى, سونداي-اق وڭىرلەردە داۋىستاردى ساناۋ ءراسىمى اياقتالعان سوڭ داۋىس بەرۋدىڭ الدىن الا قورىتىندىلارى تۋرالى اقپاراتتى ورتسايلاۋكومنىڭ رەسمي سايتىندا ونلاين رەجىمدە ورنالاستىرۋعا مۇمكىندىك بەرەدى. وسك مۇشەسى كونستانتين پەتروۆتىڭ بايانداۋىنشا, قازىرگى ۋاقىتتا ورتسايلاۋكوم تاڭداۋشىلاردى ەلەكتروندى تىركەۋدىڭ قاناتقاقتى جوباسىن تەحنيكالىق قامتاماسىز ەتۋ جونىندەگى جۇمىستاردى باستادى. ازىرلەنگەن فۋنكتسيونالدى تەستىلەۋ سىناقتارى كەلەسى اپتاعا جوسپارلانىپ وتىر. بۇگىنگە دەيىن ورتسايلاۋكومعا كانديداتتاردان ەكى ءوتىنىش كەلىپ ءتۇستى, ولارعا سايلاۋ زاڭناماسىنىڭ نورمالارىن تۇسىندىرە وتىرىپ, جاۋاپتار بەرىلدى.
«2017 جىلعى 8 ماۋسىمنان سەنات دەپۋتاتتىعىنا تىركەلگەن كانديداتتاردىڭ بارلىعى 2017 جىلعى 27 ماۋسىم كۇنگى ساعات 24.00-گە دەيىن سوزىلاتىن سايلاۋ الدىنداعى ۇگىتكە كىرىسۋ مۇمكىندىگىنە يە, − دەدى ك.پەتروۆ. − بارلىق كانديداتتارعا ۇگىت جۇمىسىن جۇرگىزۋ ءۇشىن بىردەي جاعدايلارعا كەپىلدىك بەرىلگەن. ۇگىت ناۋقانى بارىسىندا سايلاۋ زاڭناماسى نورمالارىنىڭ ساقتالۋىن باقىلاۋدى قامتاماسىز ەتۋ ماقساتىندا ورتسايلاۋكوم, وبلىستىق, استانا جانە الماتى قالالىق سايلاۋ كوميسسيالارى باق مونيتورينگىن جۇزەگە اسىراتىن بولادى».
كەڭەيتىلگەن وتىرىستىڭ جۇمىسىنا وبلىستىق, استانا جانە الماتى قالالىق سايلاۋ كوميسسيالارىنىڭ توراعالارى مەن حاتشىلارى جانە استانا قالاسى ءماسليحاتىنىڭ دەپۋتاتتارى قاتىستى.
