وندا ەلىمىزدىڭ مەرەيىن ۇستەم ەتەتىن, مارتەبەسىن ارتتىرىپ, ابىرويىن اسقاقتاتا تۇسەتىن الەمدىك دەڭگەيدەگى تاريحي ءىس-شارانىڭ قارساڭىندا تۇرعانىمىز اتاپ كورسەتىلەدى.
بارشاڭىزعا بەلگىلى, ەلىمىزدە 10 ماۋسىمدا ەكسپو-2017 حالىقارالىق كورمەسى باستالادى. وسىعان دەيىن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءسامميتىن, استانا ەكونوميكالىق فورۋمىن, ينۆەستيتسيالىق فورۋم, دۇنيەجۇزىلىك يسلام ەكونوميكالىق فورۋمىن, تاعى باسقا حالىقارالىق دارەجەدەگى شارالاردى جوعارى دەڭگەيدە ۇيىمداستىرعان مەملەكەتىمىز ەكسپو-2017 كورمەسىن دە ابىرويمەن وتكىزەدى دەگەن سەنىمدەمىز, دەلىنگەن ۇندەۋدە.
الەمنىڭ بارلىق مەملەكەتتەرىنەن ميلليوننان استام ادامدى جينايتىن وسى اۋقىمدى جوبانىڭ ەلىمىز ەكونوميكاسىنا جاڭا سەرپىن بەرەتىنى دە كولدەنەڭ تارتىلىپ, وسى سەبەپتى اتالعان ءىس-شارانى وتكىزۋگە قولعابىس كورسەتۋ, ەل الدىنداعى ازاماتتىق بورىشىمىز بولىپ تابىلاتىنىنا باسا نازار اۋدارىلادى. ويتكەنى, ءبىر جارىم عاسىردان استام تاريحى بار ەكسپو-2017 حالىقارالىق كورمەسىن جوعارى دەڭگەيدە ۇيىمداستىرۋ ءتۇرلى سالادا جۇمىس ىستەيتىن ادامدارعا ۇلكەن جاۋاپكەرشىلىك جۇكتەيدى.
ەلىمىزدىڭ تاريحىندا التىن ارىپتەرمەن جازىلاتىن ايتۋلى ءىس-شارا – حالقىمىزدىڭ ءدىنى مەن ءداستۇرىن, ادەبيەتى مەن مادەنيەتىن, رۋحانياتى مەن تاريحىن تانىستىرۋدىڭ, ۇلتتىق قۇندىلىقتارىمىزدى كورسەتۋدىڭ, قازاق ەلىنىڭ جەتكەن جەتىستىگىن الەمگە پاش ەتۋدىڭ مول مۇمكىندىگى.
وسى ورايدا, قازاقستان مۇسىلماندارىنىڭ ءدىني باسقارماسى بارشا وتانداستارىمىزدى شەت ەلدەن كەلگەن قوناقتارعا جىلى شىراي تانىتىپ, ولارمەن جاقسى مامىلە ورناتۋعا, قىزمەت ساپاسىن ارتتىرىپ, سان عاسىرلىق تاريحى بار حالقىمىزدىڭ ۇلتتىق رۋحاني مۇراسى مەن ادەت-عۇرپىن, سونداي-اق, باستى بايلىعىمىز سانالعان ەلىمىزدەگى دىنارالىق كەلىسىم مەن ۇلتارالىق بىرلىگىمىزدى كورسەتۋگە شاقىرادى.
پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) ءوزىنىڭ حاديس-شاريفىندە: ء«بىر ەلدىڭ باسشىسى (وكىلى) كەلسە وعان لايىقتى قۇرمەت كورسەتىڭدەر», – دەگەن. قوناقجايلىلىق – قازاقى قاسيەت. قازاقتىڭ قوناقجايلىلىق, دارحاندىق, جومارتتىق قاسيەتى – بۇرىنعى كوشپەلى اتا-بابالاردان ۇزىلمەي كەلە جاتقان ءداستۇر.
اللا تاعالا ەل يگىلىگى جولىنداعى باستامالارىمىزدى, جاقسىلىققا جۇمىلدىرىپ, يماندىلىققا ۇيىتاتىن ىزگى ءىس-شارالارىمىزدى بەرەكەلى ەتكەي! جاراتۋشى يەمىز تاۋەلسىزدىگىمىزدى باياندى, ەگەمەن ەلىمىزدىڭ بولاشاعىن جارقىن, حالقىمىزدىڭ بىرلىگىن بەكەم ەتكەي. ءامين! – دەلىنەدى ۇندەۋدە.
«ەگەمەن-اقپارات»
