قازىر ەكسپو-2017 كورمەسىنىڭ «بولاشاقتىڭ ەنەرگياسى» اتتى تاقىرىبى جالپى جۇرتشىلىققا ەتەنە تانىس, تۇسىنىكتى ۇعىمعا اينالعان. اۋانى لاستاماي كولىك جۇرگىزۋ, ەلەكتر ەنەرگياسىن كومىر جاقپاي, ورگانيكالىق قالدىقتاردان ءوندىرۋ, ەكولوگيالىق تازا ازىق الۋ – وسى توق بايگەگە قوسىلۋ ەمەس پە؟
– الەمنىڭ ءار تۇكپىرىنەن كورمەنى تاماشالاۋعا كەلگەندەر قوستاناي وبلىسىنان قويىلعان 4 جوبانى كوزى شالادى دەپ ويلايمىز. قاراسۋ اۋدانىنداعى «قارامان ي ك» جاۋاپكەرشىلىگى شەكتەۋلى سەرىكتەستىگىندە سيىر تەزەگىنەن وندىرىلگەن ەلەكتر ەنەرگياسى شارۋاشىلىقتىڭ بۇكىل قاجەتىنە جاراپ, ونىڭ سىرتىندا اۋىلدى جارىقتاندىرىپ وتىر. تەزەكتەن گاز, ودان ەلەكتر ەنەرگياسى وندىرىلەدى. ەشقانداي كومىر دە, جەر استىنان الىنعان گاز دا, مۇناي دا كەرەك ەمەس! « S.M.F. Sistem» ماتا ەمەس ماتەريالدار فابريكاسى» كادىمگى جەر-كوكتى الىپ جاتاتىن پوليەتيلەن ىدىستارىن وڭدەپ, سينتەپون, گەوتەكستيل جاسايدى. ال اتاقتى «سارىارقااۆتوپروم» ماشينا جاساۋ زاۋىتى ەلەكتر ەنەرگياسىمەن جۇرەتىن JAC ەلەكتروموبيل جەڭىل ماشيناسىن شىعارۋدى باستادى. «تۇرار» ءسۇت فەرماسىنىڭ يننوۆاتسيالىق قادامدارى جەردى ورگانيكالىق وڭدەۋگە, ەكولوگيالىق تازا ءونىم وندىرۋگە باعىتتالعان, –دەيدى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ ءبولىم باسشىسى تالعات كوتەنباەۆ. جاقىندا عانا «سارىارقااۆتوپروم» زاۋىتىنان قۇراستىرىلعان, سىرى كەپپەگەن 20 اۆتوبۋس ەكسپو-عا قىزمەت ەتۋگە اتتاندى. ول اۆتوبۋستاردىڭ ديزەلمەن دە, گازبەن دە جۇرە بەرەتىن ەرەكشەلىگى بار. جەلدىڭ قۋاتىن پايدالانۋ, ينفراقۇرىلىم, اۋىل شارۋاشىلىعى, بالىق اۋلاۋ كاسىبى, قالدىقتاردى جويۋ, تازالاۋ جۇيەسى, سۋ ەنەرگەتيكاسى, تەحنولوگيا, ەنەرگيانى ءتيىمدى پايدالانۋ جونىندەگى جوبالار ەكسپو قوناقتارىنا ينتەراكتيۆتىك تاقتالار ارقىلى ۇسىنىلادى.
ناۋرىزىم مەملەكەتتىك تابيعي قورىعىنىڭ اتىنا قازىر دۇنيە ءجۇزى قانىق دەسەك ارتىق ايتقاندىق ەمەس. 2008 جىلى بۇرىن وسى تابيعات مارجانى يۋنەسكو-نىڭ بۇكىلالەمدىك مۇرالار تىزىمىنە ەنگىزىلگەن بولاتىن. قورىق «Recommended by EXPO» تۋريستىك مارشرۋتتار تىزىمىنە ەندى. دەمەك, ەكسپو-عا كەلەتىن تۋريستەر اراسىندا وسى تابيعات تاماشاسىن ءبىر كورىپ كەتۋگە ىنتىزارلار دا تابىلار. «BEST kz» تۋريستىك اگەنتتىگىنىڭ ديرەكتورى گۇلميرا قاپەنوۆانىڭ ايتۋىنا قاراعاندا, ناۋرىزىم قورىعى ەكسپو-عا جان-جاقتى دايىندالدى. وندا جەرگىلىكتى كاسىپكەر بيىل قوناقۇي سالدى, دالانىڭ اسەمدىگىن كورگىسى كەلگەن تۋريسكە لوگيستيكا جونىنەن قولايلىلىقتىڭ ءبارى بار.
– ناۋرىزىمعا كەلگەن تۋريست الدىمەن دۇنيەنىڭ باسقا جەرىندە كەزدەسپەيتىن سەلەۋلى دالانىڭ سۇلۋلىعىن جانە قازاق حالقىنىڭ الۋان ءتۇرلى, باي ءداستۇرىن تاماشالايدى, ۇلتتىق تاماعى ءتىل ۇيىرەتىن داستارقانىنان ءدام تاتادى. قازىردىڭ وزىندە قىتاي تۋريستەرى ناۋرىزىمعا قىزىعۋشىلىق تانىتىپ وتىر. الايدا, ولار ەكسكۋرسيانى ەتنوستىق قىتاي جۇرگىزسە دەگەن تالاپ-تىلەگىن جەتكىزىپ جاتىر. شەتەلدىك تۋريستەر ءۇشىن ناۋرىزىمعا التى ورىندىق ۇشاقپەن ەكى كۇندىك اۆياتۋر ۇسىنىلادى. ول ءار تۋريستكە 510 دوللارعا تۇسەدى, ال اۆتوكولىكپەن باراتىن دجيپ-تۋردىڭ قۇنى 13500 تەڭگە تۇرادى, – دەيدى گۇلميرا قاپەنوۆا.
جالپى, قوستانايلىق تۋريستىك اگەنتتىكتەر شەتەلدىك تۋريستەرگە 26 ءتۇرلى تۋريستىك باعىت دايىندادى. ەكسپو وتەتىن 93 كۇندە قوستاناي وبلىسى استانادا ءۇش رەت, ياعني 24-25 ماۋسىمدا, 22-23 شىلدەدە جانە 26-27 تامىزدا ازىق-ت ۇلىك جارمەڭكەسىن وتكىزەدى. وسى ءۇش جارمەڭكەدە استاناعا 1800 توننا ازىق-ت ۇلىك جەتكىزىلەدى. ەكسپو اياسىندا ەلوردادا وبلىستاردىڭ مادەنيەت كۇندەرى وتەتىنى بەلگىلى. تامىز ايىنىڭ 5-ءى مەن 9-ى ارالىعىندا استانا مەن قالا قوناقتارى قوستانايلىق ونەرپازداردىڭ, قولونەرشىلەردىڭ, سۋرەتشىلەردىڭ ونەرىنە كۋا بولادى. وبلىستان اتتانعان 100 ۆولونتەر قازىر ەكسپو-عا قىزمەت ەتۋدى باستاپ تا كەتتى.
ەلىمىزدىڭ الەم الدىنداعى بەدەلىن, ابىرويىن اسقاقتاتار كورمەنىڭ جاقسى وتۋىنە وسىلاي اتسالىساتىن قوستانايلىقتار اتاقتى شارانىڭ قىزىعىنان دا قالمايدى. بۇگىنگە دەيىن وبلىس تۇرعىندارى ەكسپو-عا 32000 بيلەت ساتىپ الدى. 16 مىڭنان اسا مەكتەپ وقۋشىلارى, 11 مىڭنان اسا جوعارى وقۋ ورىندارى مەن كوللەدجدەر ستۋدەنتتەرى كانيكۋلدا ەكسپو-نى تاماشالايدى. قوستانايلىق سپورتشىلار استانادا وتەتىن رەسپۋبليكالىق, حالىقارالىق سپورت جارىستارىنا قاتىسادى.
ەكسپو-2017 حالىقارالىق كورمەسى قوستانايلىقتاردىڭ ەلگە, جەرگە, وتانعا دەگەن اسقاق رۋحىن كوتەردى.
ءنازيرا جارىمبەتوۆا,
«ەگەمەن قازاقستان»
قوستاناي
