الماتى كۇندەرى ءان-كۇيمەن ورىلمەك
ەكسپو اياسىنداعى كوپشىلىك باسقوسۋلاردىڭ ءبىرى – الماتىنىڭ مادەني كۇندەرى. 11-19 ماۋسىم ارالىعىندا وتەتىن جيىندا 400-دەن استام ەسترادا جۇلدىزى, قولونەرشى, شىعارماشىلىق وكىلدەرى شەتەلدىك قوناقتارعا ونەرلەرىن پاش ەتەدى. «قازاقستان» ورتالىق كونتسەرت زالىندا ۇيىمداستىرىلاتىن «ماحابباتپەن, الماتىدان!» اتتى العاشقى كونتسەرتتىك باعدارلاماعا ەسترادا جۇلدىزدارى روزا رىمباەۆا, قايرات نۇرتاس, مارجان اراپباەۆا, ءمادينا سادۋاقاسوۆا, «دوس-مۇقاسان», «جىگىتتەر» توپتارى, «سارىن» دۋەتى, «سالتانات» ءانسامبلى جانە باسقالار ونەر كورسەتپەك. 12-16 ماۋسىم ارالىعىندا الماتى مەملەكەتتىك قۋىرشاق تەاترى ق.قۋانىشباەۆ اتىنداعى مۋزىكالىق-دراما تەاترىندا كۇنىنە ەكى رەت «قۇلىنشاق پەن بولتىرىك», «ۆەسەلىە مەدۆەجاتا» اتتى ۇزدىك سپەكتاكلدەرىن قازاق جانە ورىس تىلدەرىندە ۇسىنادى. 16-17 ماۋسىم ارالىعىندا «الاتاۋ» ءداستۇرلى ونەر تەاترى ۇجىمىنىڭ «جاستار» تەاترىندا «اسقاقتاي بەر, قازاقتىڭ سازدى اۋەنى» اتتى مۋزىكالىق كەشى وتەدى.
كوپشىلىك اپتا بويى «ەتنواۋىل الماتى» كورمەسىن تاماشالايدى. مۇندا ۇزدىك سۋرەتشىلەر مەن قولونەرشىلەر ءوز تۋىندىلارىن قويىپ, شەبەرلىك ساباقتارىنا شاقىرادى. 17 ماۋسىمدا كورمە قوناقتارى «سازگەن سازى» فولكلورلىق-ەتنوگرافيالىق ءانسامبلىنىڭ كونتسەرتىن كورسە, كەلەسى كۇنى كورمەنىڭ امفيتەاترىندا مادەني كۇندەردىڭ «اسقار تاۋلى الماتى!» اتتى قورىتىندى كونتسەرتى وتەدى. وعان ۇلتتىق ءان-كۇي ونەرىنىڭ تارلاندارى اسىلبەك ەڭسەپوۆ, ەربولات شالدىبەكوۆ, رامازان ستامعازيەۆ, ەدىل قۇسايىنوۆ, شولپان دارجانوۆا, ساۋلە جۇماباي, « ۇلىتاۋ», «ارت دالا», «الاش ۇلى» توپتارى, «جەتىگەن», «سازگەن سازى», «سالتانات» انسامبلدەرى جانە باسقالار قاتىسادى دەپ كۇتىلۋدە.
جەلاياق ەكىباستۇزعا جەتتى
مامىر ايىنىڭ سوڭىندا شىعىسقازاقستاندىق عالىمجان توقتار ەكسپو-2017 حالىقارالىق كورمەسىنە قاتىسۋ ءۇشىن استاناعا دەيىن جۇگىرۋگە بەل بايلاعان بولاتىن. ول ءوزىنىڭ بۇل ارەكەتى ارقىلى ەلىمىزگە جانە كورمەگە قولداۋ كورسەتەتىنىن جەتكىزگەن. وسكەمەندەگى قابانباي باتىر ەسكەرتكىشىنەن باستاپ جۇگىرگەن مارافونشى كۇنى كەشە ەكىباستۇزعا ايالداپ, تۇرعىنداردى قالانىڭ 60 جىلدىق مەرەيتويىمەن قۇتتىقتادى.
«مارافونشىمەن ەكىباستۇز قالاسىنىڭ شەتىندەگى ستەللادا كەزدەسىپ, سۇحباتتاستىق. وندا تۇسكى ساعات 12 كەزىندە كەلگەن ول شامامەن 10-15 مينۋتتاي ايالداپ, پاۆلودار – استانا اۆتوجولىمەن ءارى قاراي كەتتى. جۇگىرىسىن 10 ماۋسىم كۇنى استانادا اياقتايدى. سوندا بارلىعى 1000 شاقىرىم جولدى جاياۋ باعىندىرماق», دەيدى ەكىباستۇز قالالىق دەنە شىنىقتىرۋ جانە سپورت ءبولىمىنىڭ باس مامانى تالعات ساكەن.
عالىمجان توقتار وسكەمەن قالاسىنداعى حالىققا قىزمەت كورسەتۋ ورتالىعىندا ينسپەكتور بولىپ جۇمىس ىستەيدى. ەكسپو-2017 كورمەسىنىڭ قۇرمەتىنە استاناعا دەيىن جاياۋ جۇگىرىپ بارۋ ءۇشىن 26 مامىر كۇنى جولعا شىققان ول كۇنىنە 10 ساعات جۇگىرىپ, شامامەن 60-70 شاقىرىم جولدى ارتقا تاستايدى. اۋا رايى قولايلى بولسا, 80 شاقىرىمعا دەيىن جەتكىزەتىنىن ايتقان. ال سپورتشىنىڭ جارى ەركەگۇل مۇقيات كولىكپەن ىلەسىپ, بارلىق جول بارىسىن بەينەتاسپاعا تۇسىرۋدە.
ەرىكتى قاريا ەكسپو-عا قىزمەت ەتەدى
كورمەگە قاتىستى تاعى ءبىر قىزىقتى جاڭالىق: استانا قالاسى اكىمدىگى جاستار ساياساتى ماسەلەلەرى باسقارماسىنىڭ باسشىسى اسحات ورالوۆ ەرىكتىلەر اراسىندا قارتتار دا بار ەكەنىن ايتتى. «ەرىكتىلەردىڭ جۇزگە جۋىعى ەرەسەكتەر مەن زەينەتكەرلەر. ارنايى فورما العان ولار جۇمىسقا ساقاداي-ساي. ەڭ ۇلكەن ەرىكتىنىڭ جاسى جەتپىستەن اسقان, زەينەتكەر. ەڭ جاسى ون بەستە, ول نازارباەۆ زياتكەرلىك مەكتەبىندە وقيدى. 18 جاسقا دەيىنگى بارلىق ەرىكتىلەردى تەك اتا-انالارىنىڭ رۇقساتىمەن عانا قابىلدادىق», دەيدى اكىمدىك وكىلى.
ا.ورالوۆ ەرىكتىلەر قۇرامىنىڭ ۇلتتارى دا ءارتۇرلى ەكەنىن جەتكىزدى. ولاردىڭ قاتارىندا تەك استانالىقتار عانا ەمەس, شەتەلدىك ستۋدەنتتەر دە بار ەكەن. ماسەلەن, قىتايدا ءبىلىم الىپ جاتقان, قىتاي جانە اعىلشىن تىلدەرىن ەركىن مەڭگەرگەن 24 ستۋدەنت شىلدە ايىندا كەلەدى جانە تامىز ايىندا ولارعا تاعى 59 ادام قوسىلادى. سونىمەن بىرگە, ميلانداعى ەكسپو-دا ەرىكتى بولعان 12 يتاليالىق ازامات ءوتىنىم بەرگەن. ولار ماۋسىم ايىنىڭ سوڭىندا كەلمەك.
ەڭ بەلسەندىلەرى وقۋ گرانتتارىن يەلەنەدى
جالپى, كورمە جۇمىسىنا ەرىكتى بولۋعا ءۇش مىڭنان استام استانالىق ستۋدەنت ءوتىنىش بىلدىرگەن. ولاردىڭ اراسىنان كەمىندە ءۇش ءتىل بىلەتىن 1500 ەرىكتى ىرىكتەلگەن. ايتا كەتەرلىگى, ەكسپو-2017 كورمەسىندە 6 مىڭنان استام ەرىكتى جۇمىس ىستەسە, 4500-ءى كورمە اۋماعىندا, 1500-ءى اۋەجاي, تەمىر جول ۆوكزالى, جەدەل مامانداندىرىلعان قىزمەتتەر, مادەني نىساندار, قوناقۇيلەر سىندى قالانىڭ ماڭىزدى نىساندارىندا قىزمەت ەتەدى. ال قالا اكىمدىگى ەكسپو كورمەسىندە بەلسەندىلىك تانىتقان 20 ستۋدەنتكە ءبىر جىلدىق وقۋ گرانتىن بولمەك. جاستار ساياساتى ماسەلەلەرى باسقارماسىنىڭ باسشىسى اسحات ورالوۆتىڭ مالىمەتىنشە, جەڭىمپازداردى سۋپەرۆايزەرلەر (ەرىكتىلەردىڭ ۇيلەستىرۋشىلەرى) انىقتايدى. «ودان بولەك, ولار العىس حاتتار, سىيلىقتار مەن جۇلدەلەر الادى. سونداي-اق, ەرىكتىلەردىڭ ارنايى فورماسى ازىرلەندى, وندا ءۇش جەيدە, بەيسبولكا, كۇرتە, ريۋكزاك جانە تەرموس بار», دەيدى ول.
تاعى ايتا كەتەرلىگى, ەرىكتىلەردىڭ بارلىعى «نيكا» وقىتۋ ورتالىعىندا ارنايى دايىندىقتان ءوتىپ, ءتالىم العان. وندا قالا تاريحى, استانانىڭ كورىكتى ورىندارى, ەكسپو تاريحىن وقىپ, شەتەلدىك قوناقتارمەن كەلىسسوزدەر جۇرگىزۋدىڭ قىر-سىرىن مەڭگەردى. وقىتۋ اياقتالعان سوڭ بارشا ەرىكتىگە سەرتيفيكاتتار تاپسىرىلىپتى.
ەرىكتىلەردىڭ جەمىستى جۇمىس ىستەۋى ءۇشىن قالا اكىمدىگى بارلىق قولايلى جاعدايدى جاسادى: ءبىر اۋىسىمدا 500 ەرىكتى قالاعا شىعادى, ولار ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەر ۇيىنە تەگىن ورنالاستىرىلادى جانە بارلىعى ىستىق تاماقپەن, تەگىن اۆتوبۋس بيلەتتەرىمەن قامتاماسىز ەتىلەدى. سونىمەن قاتار, بوس ۋاقىتتارىندا قالادا وتەتىن نەگىزگى كونتسەرتتەر مەن ءىس-شارالارعا تەگىن كىرە الادى جانە ەرىكتىلەر ءۇشىن وتاندىق جۇلدىزدارمەن بەيرەسمي كەزدەسۋ, مۋزىكالىق كەشتەر ۇيىمداستىرىلادى.
اسحات رايقۇل,
«ەگەمەن قازاقستان»
