مارتەبەلى مەيماندى ەلوردا اۋەجايىنان قر دەنساۋلىق ساقتاۋ ءمينيسترى ەلجان ءبىرتانوۆ, استانا قالاسى اكىمىنىڭ ورىنباسارى ەرمەك امانشاەۆ جانە سەربياداعى قازاقستان ەلشىسى نۇرباح رۇستەموۆ كۇتىپ الدى.
ايتا كەتەرلىگى, ەرتەڭ كەشكىسىن وتەتىن حالىقارالىق مامانداندىرىلعان كورمەنىڭ سالتاناتتى اشىلۋ راسىمىنە 17 ەلدىڭ مەملەكەت جانە ۇكىمەت باسشىلارى قاتىساتىن بولادى.
«شانحاي ىنتىماقتاستىق ۇيىمى وتىرىسى اياقتالعاننان كەيىن ەكسپو-نىڭ سالتاناتتى اشىلۋى بولادى. ءبىز اشىلۋ سالتاناتىنا 17 ەلدىڭ مەملەكەت جانە ۇكىمەت باسشىلارىن كۇتىپ وتىرمىز. مۇنان بولەك, قاتىسۋشى ەلدەردىڭ اتىنان زاڭنامالىق ورگانداردىڭ وكىلدەرى, مينيسترلەرى قاتىساتىن بولادى. قازىرگى ۋاقىتتا بىزدە وسىنداي ناقتىلانعان مالىمەت بار», دەدى سىرتقى ىستەر ءمينيسترى قايرات ءابدىراحمانوۆ.
بۇعان دەيىن ەلوردادا وتەتىن شانحاي ىنتىماقتاستىق ۇيىمى سامميتىنە قاتىسۋ ءۇشىن اۋعانستان پرەزيدەنتى اشراف گاني احمادزاي, موڭعوليا پرەزيدەنتى تساحياگين ەلبەگدورج, قحر توراعاسى سي تسزينپين, وزبەكستان پرەزيدەنتى شاۆكات ميرزيەەۆ, پاكىستان پرەزيدەنتى مامنۋن حۋسەين, رەسەي پرەزيدەنتى ۆلاديمير ءپۋتيننىڭ كەلگەنىن حابارلاعان بولاتىنبىز.
شىۇ ءسامميتى بارىسىندا پاكىستان مەن ءۇندىستان اتالعان ۇيىمعا مۇشەلىككە قابىلدانادى دەپ كۇتىلۋدە. وسىلايشا, شىۇ جەر تۇرعىندارىنىڭ 40 پايىزىن, الەم ەكونوميكاسىنىڭ شامامەن ۇشتەن ءبىرىن قامتيتىن بولادى. بۇگىندە ۇيىمعا رەسەي, قىتاي, قازاقستان, قىرعىزستان, تاجىكستان جانە وزبەكستان ەلدەرى مۇشە. قازىرگى ۋاقىتتا شىۇ توراعاسى - قازاقستان. ەرتەڭگى سامميت بارىسىندا توراعالىق قىتاي تاراپىنا وتەدى.
