الماتى مەملەكەتتىك كولىك جانە كوممۋنيكاتسيالار كوللەدجىندە وتكەن جيىنعا شاھارداعى 82 كوللەدج ديرەكتورلارى مەن مۇعالىمدەرى, الماتى قالاسى ءبىلىم باسقارماسىنىڭ باسشىلىعى, بەلسەندى ستۋدەنتتەر, «نۇر وتان» پارتياسىنىڭ «جاس وتان» جاستار قاناتىنىڭ مۇشەلەرى قاتىستى.
مەملەكەت پەن قوعام ءۇشىن سالدارى اۋىر قيىندىقتار تۋدىرىپ, قاتەر توندىرەتىن جەمقورلىق قاۋىپتەرىنە, دەموكراتيالىق ينستيتۋتتار بەدەلىنىڭ, ادەپتىك قۇندىلىقتار مەن ادىلدىكتىڭ تومەندەۋىنە الاڭداۋشىلىق بىلدىرگەن قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وكىلدەرى پاراقورلىقتىڭ ەلىمىزدىڭ بۇكىل ءبىلىم جۇيەسىنە توندىرەر قاۋىپ-قاتەرىن تۇسىندىرە كەلە, الماتى قالاسى كوللەدجدەرىنىڭ اتالمىش حارتيانى قابىلداۋى ارقىلى سىبايلاس جەمقورلىقتىڭ الدىن الۋدا ۇلكەن ۇلەس قوساتىنىن اتاپ ءوتتى.
قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتى باسشىسىنىڭ ورىنباسارى گەننادي دانياروۆ ءوز سوزىندە كوللەدج ستۋدەنتتەرىن رۋحاني ادامگەرشىك پەن ازاماتتىق-پاتريوتتىق جولىندا تاربيەلەۋدىڭ باستى قۇرالدارىنىڭ ءبىرى – ادالدىقتى, سىبايلاس جەمقورلىققا قارسى تۇرا ءبىلۋ مادەنيەتىن, ساياسي-قۇقىقتىق ءبىلىمىن, ادامگەرشىلىك-ەتيكالىق قۇندىلىقتارىن قالىپتاستىرۋ – بۇگىنگى كۇننىڭ باستى تالابى ەكەنىن ايتتى. ءبىلىم جۇيەسىندەگى سىبايلاس جەمقورلىق قاۋپىنىڭ ءتۇرلى دەڭگەيلى قاتەرلەرىنە توقتالا كەلە, گەننادي قوجاحمەت ۇلى: ء«بىلىم العان ورداسىنان سىبايلاس جەمقورلىق ادەتىن جۇقتىرىپ, ونىڭ جاسالۋ تەتىكتەرىن تانىپ-بىلگەن تۇلەك ەرتەڭگى كۇنى بەلگىلى ءبىر ماماندىق يەسى اتانىپ, مەملەكەتتىك باسقارۋ ورگاندارىنىڭ, قارجى, ەكونوميكا جانە باسقا دا نارىقتىق قۇرىلىمداردىڭ قىزمەتكەرىنە اينالعاندا ەلدىڭ كونستيتۋتسيالىق نەگىزدەرىنە, ۇلتتىق قاۋىپسىزدىگىنە وراسان قاۋىپ توندىرەتىن تۇلعاعا اينالۋى مۇمكىن», – دەدى.
ەلباسىنىڭ «ماڭگىلىك ەل» ۇلتتىق يدەياسىنداعى ادامگەرشىلىك قاعيداتتارىن نەگىزگە الا وتىرىپ, وركەنيەتتى ەلگە اينالۋ جولىندا وسكەلەڭ ۇرپاقتىڭ الار ورنى ەرەكشە ەكەندىگىنە توقتالعان الماتى قالاسى ءبىلىم باسقارماسى باسشىسىنىڭ ورىنباسارى ءلاززات جىلقىباەۆا: «بيىلعى جىلى مەملەكەت تاراپىنان اقىسىز ءبىلىم بەرۋ ماقساتىندا كوللەدجدەرگە 2500 ورىن ءبولىپ وتىر. ياعني, بيىل 2500 بالا تەگىن ءبىلىم الا الماق. 9-شى نەمەسە 11-ءشى سىنىپتان كەيىن الماتىعا اعىلعان جاستار بازار جاعالاپ ءجۇرىپ قالماي, ەڭ بولماسا, ارنايى ءبىلىم الۋى ءتيىس. قازىر جالپى نارىق, اسىرەسە الماتى قالاسى تەحنيكالىق جانە كاسىپتىك ورتا ءبىلىمى بار ماماندارعا اسا ءزارۋ بولىپ وتىر. وعان ۋنيۆەرسيادانى ۇيىمداستىرۋ بارىسىندا ايرىقشا كوزىمىز جەتكەن ەدى. ماسەلەن, 50-گە جۋىق قىزمەتكەرى بار ءبىر قوناقۇي اشىلسا, ونىڭ ارى كەتسە ۇشەۋى عانا باسشىلىق قىزمەت اتقارۋى مۇمكىن, ال قالعان 45-ءى ورتا كاسىپتىك ءبىلىمى بار قىزمەتكەرلەر بولماق. ياعني, سىزدەر وقىتقان تۇلەكتەر بىلىكتىلىگىنە قوعامنىڭ اسا ءزارۋ ەكەنىن ۇمىتپاعايسىزدار. ال سول تۇلەكتەردىڭ ەرتەڭگى كۇنى مەملەكەتىمىزدىڭ وركەندەۋى جولىندا ايانباي ەڭبەك ەتۋىنە, ادال دا ءادىل بولىنا ىقپال ەتۋشى, باعىت-باعدار كورسەتۋشى ورتا – ءوزى ءبىلىم العان وقۋ ورنى ەكەنىن ەستەن شىعارماساڭىزدار ەكەن», – دەي كەلە, تەحنيكالىق جانە كاسىپتىك ءبىلىم جۇيەسىندە ەڭبەك ەتىپ جاتقان ۇستازداردى وقۋ ورىندارىنداعى جەمقورلىق فاكتىلەرىن اشۋ جولىندا جۇمىلا اتسالىسۋعا شاقىردى.
ءبىلىم سالاسىنداعى بىلىمگە قولجەتىمدىلىكتىڭ ساپاسى مەن ادىلەتتىلىگىنە مەيلىنشە تەرىس اسەر ەتەتىن, جەكە پايدا تابۋ ءۇشىن ءوز قىزمەتتىك بابىن پايدالاناتىن سىبايلاس جەمقورلىقتى بولدىرماۋ تاسىلدەرىنىڭ ءبىرى – جاريالىلىق ەكەنىن ايتقان الماتى قالالىق فيليالىنىڭ «جاس وتان» جاستار قاناتىنىڭ توراعاسى ءمادي احمەتوۆ ءوز ۇسىنىسىن ءبىلدىردى: «ەلباسىنىڭ «بولاشاققا باعدار: رۋحاني جاڭعىرۋ» دەگەن ماقالاسىندا اشىق قوعام قالىپتاستىرۋدىڭ ماڭىزىن اتاپ ءوتتى, ياعني, اشىق قوعام – جەمقورلىققا مۇلدەم توسقاۋىل قويۋ ەكەنى تۇسىنىكتى. ستۋدەنتتەر جەمقورلىق فاكتىلەرىن اشىق ايتۋدان قورقىپ, كوپ جاعدايدى جاسىرىپ قالۋى مۇمكىن. سوندىقتان ءاربىر كوللەدجدە «اقپاراتتىق بۇرىش» اشىپ, وعان شاعىن جاشىك قويساق جانە بەلگىلى ءبىر ءنومىر بويىنشا حابارلاسۋعا قولايلى تەلەفون جەلىسىن اشساق, كەز كەلگەن ستۋدەنت نەمەسە قىزمەتكەر سىبايلاس جەمقورلىققا قارسى تۇرۋعا ۇلەس قوسىپ, اشىقتىققا ۇمتىلار ەدى».
ۇيىمداستىرۋشىلار جينالعان قاۋىمعا پارا الۋعا قاتىستى وي سالار, اششى ساباق بولار ۆيدەوروليكتەر كورسەتىلدى.
ايتا كەتسەك, قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەن ءبىلىم جانە عىلىم مينيسترلىگىنىڭ ءبىلىم سالاسىنداعى سىبايلاس جەمقورلىقتىڭ الدىن الۋ, بولدىرماۋ جانە سىبايلاس جەمقورلىققا قارسى مادەنيەتتى قالىپتاستىرۋ تۋرالى 2015 جىلعى مەموراندۋمىنا سايكەس, بيىلعى جىلدان باستاپ بارلىق وقۋ ورىندارى, ونىڭ ىشىندە, 31 مامىر كۇنى الماتىداعى 38 جوعارى وقۋ ورنى قول قويعان حارتيادا سىبايلاس جەمقورلىققا قارسى جۇمىس ىستەۋدىڭ نەگىزگى باعىتتارى مەن ماقسات-مىندەتتەرى ايقىن كورسەتىلگەن.
ميرا بايبەك,
«ەگەمەن قازاقستان»
