الدىڭعى بۋىننىڭ وراسان تاجىريبەسى مەن ءبىلىمى ۇرپاقتار ساباقتاستىعى نەگىزىندە الماسىپ, ناتيجەسىندە حالىق دەنساۋلىعىنىڭ جاقسارۋىنا, قوعامدا سالاماتتى ءومىر سالتىنىڭ قالىپتاسۋىنا وڭ اسەر ەتتى.
مەديتسينانىڭ ماڭىزدىلىعىن ارتتىرۋ ماقساتى مەن ساپالى قىزمەتى تۋرالى ەلباسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا كەڭىنەن ايتىلدى. سوندىقتان گيپپوكرات انتىنا ادالدىق سالانى دامىتۋعا دا سونى سەرپىن بەرەدى.
بۇگىنگى تاڭدا جۇرەك-قان تامىرلارى اۋرۋى الەمدى الاڭداتىپ وتىرعان كۇردەلى ماسەلە. اتالعان كەسەلدەن كوپ جاعدايدا ادامداردىڭ كوز جۇماتىنى دا شىندىق. دەگەنمەن, تولىققاندى مەديتسينانىڭ تەتىگىن بىلەتىن بىلىكتى دارىگەردىڭ ادام ءومىرىن اراشالاپ قالۋدا ۇلەسى زور. ايتالىق, ون جىلدان بەرى جۇمىس ىستەپ كەلە جاتقان «تاراز عىلىمي-كلينيكالىق كارديوحيرۋرگيا جانە ترانس-
پلانتولوگيا ورتالىعى» جا-
ۋاپكەرشىلىگى شەكتەۋلى سەرىكتەستىگى بۇل تۇرعىدا ايتارلىقتاي جۇمىس اتقارىپ كەلەدى. كاسىپورىننىڭ باس ديرەكتورى سەيىتحان جوشىباەۆ جىل سايىن جۇزدەگەن ادامنىڭ جۇرەگىنە وتا جاساپ, ءاربىر ناۋقاستىڭ جالعاننىڭ جارىعىن قايتا كورۋىنە سەپتەسىپ وتىر.
جالپى, سەيىتحان جوشىباەۆ
ەلىمىزگە مەديتسينا عىلىمدارىنىڭ دوكتورى, قازاقستان رەسپۋبليكاسىنىڭ ەڭبەك سىڭىرگەن دارىگەرى رەتىندە بەلگىلى. قىرعىز مەملەكەتتىك مەديتسينا ينستيتۋتىن جانە ماسكەۋ جۇرەك-قان تامىرلارى عىلىمي-زەرتتەۋ ينستيتۋتىنىڭ اسپيرانتۋراسىن تامامداعان جاس مامان قىرعىزستاننىڭ نارىن جانە تالاس قالالارىندا دارىگەردىڭ اسسيستەنتى بولىپ جۇمىس ىستەيدى. كەيىننەن بىشكەك قالاسىنداعى رەسپۋبليكالىق كلينيكالىق اۋرۋحانادا حيرۋرگ, مەديتسينا ينستيتۋتىنىڭ كافەدراسىندا جالپى حيرۋرگيا كومەكشىسى جانە كەۋدە, جۇرەك كافەدراسىنىڭ مەڭگەرۋشىسى قىزمەتىندە بولدى. اۋليەاتانىڭ قۇلان وڭىرىندە دۇنيەگە كەلىپ, تۋعان جەردىڭ تىلسىمىن سەزىنىپ وسكەن سەيىتحان جوشىباەۆ سان قىرلى ەڭبەك جولىنان ءوتىپ, بىلىكتى مامان رەتىندە تۋعان ەلگە ورالادى. اراعا شيرەك عاسىرعا جۋىق ۋاقىت سالىپ الماتىعا كەلگەن ول سىزعانوۆ اتىنداعى جۇرەك-قان تامىرلارى ينستيتۋتىنىڭ جەتەكشىسى رەتىندە قىزمەت اتقارادى. ءوزىنىڭ تەرەڭ پاراساتى, باي تاجىريبەسىمەن دارالانا بىلگەن جوشىباەۆتىڭ جارقىن جولى وسى ۋاقىتتاردا قالىپتاسادى.
وزگەنىڭ جۇرەگىنە ءومىر سىيلاۋ ءۇشىن دە ۇلكەن جۇرەك كەرەك. ءاردايىم ادالدىعى مەن ادامدىعىنان جاڭىلماعان سەيىتحان جوشىباەۆ وتاندىق مەديتسينادا سارا جولىن سالىپ قانا قويماي, تاجىريبە الماسۋ ماقساتىندا موڭعوليا, ۆەنگريا, گەرمانيا, ءۇندىستان, اقش, انگليا, كانادا, پولشا, چەحيا مەملەكەتتەرىنىڭ ارنايى مامانداندىرىلعان كلينيكالارىندا بولدى. الەمدى شارپىعان جۇرەك-قان تامىرلارى اۋرۋلارىن جەڭۋدىڭ جولىن قاراستىردى. ال اۋرۋدىڭ الدىن الۋدا جانە ناۋقاستى ەمدەۋدە ءوزىنىڭ ءومىر بويى جيناعان تاجىريبەسىن جاس ماماندارعا كورسەتە ءبىلدى. بۇگىندە تاراز قالاسىندا ەڭبەك ەتىپ جاتقان مەديتسينا بىلگىرىنىڭ ءالى دە وزىنەن كەيىنگى بۋىنعا ۇيرەتەرى كوپ.
تالاپ تالانتقا جالعاسىپ, ەڭبەك تاباندىلىقتان جاراسىم تاپسا, وندا مۇنىڭ ءبارى ادامدى تۇلعالىق بيىككە جەتەلەيدى. ەڭ باستىسى, حالىق جۇرەگىندە اق حالاتتى ابزال جان رەتىندە قالعان دارىگەرلىك مىندەتكە دە قاجەتى وسى. ولار ءۇشىن وزگەنىڭ ءومىرىن ساقتاپ قالۋدان, وزگەگە باقىت سىيلاۋدان ارتىق باقىت بولماسا كەرەك. ال ادام بالاسىن ارمان اسقارىنا جەتەلەيتىن دە, قيال بەسىگىندە بولەيتىن دە جۇرەك اتتى الىپ كۇشتىڭ قۋاتى قاشاندا قىمبات. سەيىتحان جوشىباەۆ العا قويعان ماقساتىنا جەتكەن ازامات. ەلىنىڭ بىلىكتى مامانى, ارداگەر ازاماتى رەتىندە دە ايتارلىقتاي تابىسقا جەتتى. تالاي جىلعى ەتكەن ەڭبەگى مەن توككەن تەرىنىڭ ناتيجەسى رەتىندە ەلباسىنىڭ قولىنان ەلىمىزدىڭ ەڭ جوعارى مەملەكەتتىك ماراپاتتارى ساناتىنداعى ءىى دارەجەلى «بارىس» وردەنىن الۋى دا ايتارلىقتاي بەلەس ەدى.
بۇگىندە سەيىتحان جوشى-
باەۆتى بىلمەيتىندەر كەمدە-كەم. جۇرەك دەيتىن الىپ قۋاتتى جاراتىلىستى باعىندىرا بىلگەن ازامات تالاي ادامعا جارقىن ءومىر سىيلاعان ارداقتى ادام رەتىندە تانىلدى. ماماندىق مارتەبەسىن كوتەرگەن جانە سول ماماندىققا ادالدىق تانىتا بىلگەن ارداگەر تۇلعا ءالى دە كەسەلدىڭ جولىن كەسۋدە ەڭبەكتەنىپ ءجۇر. ءبىر عىلىم دوكتورىن جانە توعىز عىلىم كانديداتىن دايىنداعان ۇلاعاتتى ۇستاز رەتىندە دە شاكىرتتەرى مەن حالىقتىڭ ىقىلاسىنا بولەندى.
حاميت ەسامان,
«ەگەمەن قازاقستان»
جامبىل وبلىسى
