وتىرىس بارىسىندا قازاقستان رەسپۋبليكاسىنىڭ پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆا بۇگىنگە دەيىن جۇمىس توبى 4 نەگىزگى باعىت – ادەبيەت, تەاتر جانە كينو, كلاسسيكالىق جانە ءداستۇرلى مۋزىكا, بەينەلەۋ ونەرى بويىنشا زاماناۋي مادەنيەتتىڭ وزىق ۇلگىلەرى ءتىزىمىن جيناقتاۋ جانە جۇيەلەۋدىڭ بەلسەندى تۇردە باستالىپ كەتكەندىگىن اتاپ ءوتتى.
ىرىكتەۋ ناتيجەسىندە شىعارمالاردىڭ شورت-پاراعى جاسالىپ, وندا ءوز كەزەگىندە اۆتورلاردىڭ مەملەكەتتىك, قوعامدىق جانە حالىقارالىق سىيلىقتارى, حالىقارالىق فەستيۆالدارعا جانە باسقا دا شەتەلدىك بايقاۋعا قاتىسۋى سياقتى ەلەۋلى ەڭبەگى ەسكەرىلەدى.
جۇمىس توبىنىڭ مۇشەسى, مەملەكەتتىك سىيلىقتىڭ لاۋرەاتى, اقىن نەسىپبەك ايت ۇلى جۇمىستىڭ دەر كەزىندە قولعا الىنىپ وتىرعاندىعىن تىلگە تيەك ەتتى. «ارينە, بىزگە وسى ءتارىزدى ساراپشى توپتاردى قۇرۋ قاجەت. شىعارمالار تولىققاندى ىرىكتەۋدەن وتكەننەن كەيىن اۋدارما سالاسىنداعى بىلىكتى مامانداردى تارتۋ كەرەك. ويتكەنى, اۆتورلارىمىزدىڭ شىعارمالارىن جوعارى دەڭگەيگە كوتەرۋ كەرەك ەكەنىن جاقسى تۇسىنەمىز. ء بىزدىڭ اۆتورلارىمىز كۇللى الەمگە تانىلىپ, باي مادەني مۇرالارىمىزدان مەيلىنشە كوپ ادام حاباردار بولۋى ءۇشىن دە وسىلاي ىستەۋگە ءتيىستىمىز», دەدى نەسىپبەك ايت ۇلى.
ع.جۇبانوۆا اتىنداعى مەملەكەتتىك شەكتى اسپاپتار كۆارتەتىنىڭ كوركەمدىك جەتەكشىسى ەرنار مىڭتاەۆ «جاھانداعى زاماناۋي قازاقستاندىق مادەنيەت» جوباسىن جۇزەگە اسىرۋدىڭ تالانتتى اۆتورلارعا, كومپوزيتورلارعا وزدەرىنىڭ قارىم-قابىلەتىن شەت ەلدەردە تابىستى كورسەتۋگە ەرەكشە مۇمكىندىك بەرەتىندىگىنە توقتالدى.
شىعارمالاردى ىرىكتەۋ, سارالاۋ ءۇش كەزەڭنەن تۇراتىنىن ايتا كەتەيىك. كەڭ اۋقىمدا تالقىلاۋدان جانە ارنايى ساراپتامادان كەيىن جۇمىستار ءتىزىمى جۇمىس توبىنىڭ كەڭەيتىلگەن وتىرىسىندا قارالىپ, ودان سوڭ ۇلتتىق كوميسسيانىڭ قاراۋىنا بەكىتۋ ءۇشىن جىبەرىلەدى.
جۇمىس توبىنىڭ الدىڭعى وتكەن وتىرىسىندا شىعارمالاردى ىرىكتەۋدىڭ ناقتى ولشەمدەرى بەكىتىلگەن بولاتىن. بىرىنشىدەن, شىعارما قازاقستاننىڭ تاۋەلسىزدىگى جىلدارىندا جارىق كورگەن بولۋى ءتيىس. ەكىنشىدەن, قوعامدا تانىمالدىلىققا يە اۆتورلارعا باسىمدىق بەرىلەدى. ۇشىنشىدەن, شىعارما (كىتاپ, فيلموگرافيا, تەاترلاندىرىلعان قويىلىم) قوعامدا بەلگىلى بولۋى كەرەك. تورتىنشىدەن, شىعارمانىڭ جاڭاشىلدىعى, بىرىزدىلىگى, ينتەللەكتۋالدىعى, وبرازدىلىعى, حالىقشىلدىعى ەسكەرىلەدى. بەسىنشىدەن, شىعارما جوعارى كاسىبي دەڭگەيدە بولۋى ءتيىس, مادەنيەت ولشەمدەرىنە, ادەبي تالعامعا, ساحنالىق مادەنيەتكە ساي بولعانى ابزال. التىنشىدان, شىعارما زورلىق-زومبىلىقتى, ءدىني ارازدىقتى, ناشاقورلىقتى ناسيحاتتاماۋى كەرەك. جەتىنشىدەن, قازاقستاندا تۇراتىن بارلىق ەتنوستار مەن مادەنيەتتىڭ ۇلتتىق ۇيلەسىمىن ەسكەرگەنى ءجون.
